Salmo 14
1 Beenaꞌ bi nteyi,
neꞌ ḻoo yic̱hjlallꞌdoꞌenaꞌ:
“Aga no Chios zoa.”
Yogꞌzə beṉꞌ ba wxiṉj yic̱hjlallꞌdoꞌekaꞌ,
naꞌ dii zban inlleb chongakeꞌ.
¡Ni sto kochno chon wen!
2 Yabanaꞌte zoaꞌ X̱ancho Chiozaꞌ chwieꞌ beṉꞌ yell-lioni,
shi ga zoa beṉꞌ nteyi,
beṉꞌ yiyiljeꞌ Chiozaꞌ.
3 Per yogꞌz beṉꞌ ba wlaagakeꞌ lo nez ḻinaꞌ,
naꞌ yogꞌzgakeꞌ nxiṉj yic̱hjlallꞌdoꞌekaꞌ.
¡Kokzno zoa chon daa nak wen,
niga tlishee!
4 Beṉꞌkaꞌ chon dii malaꞌ,
yogꞌzeꞌ bi chajnii.
Chisya chislengakeꞌ bi de c̱he beṉꞌ yell c̱haꞌkaꞌ,
ka beṉꞌ chisbill chisto to yeḻꞌ waw,
naꞌ bi choeꞌḻwillgakeꞌ X̱ancho Chiozaꞌ.
5 Naꞌ yeḻꞌ chall chlleb c̱heꞌkaꞌ gonan ka ixiztitgakeꞌ,
daa zoalen Chiozaꞌ beṉꞌkaꞌ chon daa nak shḻi.
6 Beṉꞌ malkaꞌ chtitjgakileꞌ daa ngoo beṉꞌ yeshꞌdoꞌnaꞌ xṉezin goneꞌ,
per Chiozaꞌ chakleneꞌneꞌ.
7 ¡Sheḻꞌ Chiozaꞌ,
beenaꞌ zoa yaa Siónnaꞌ,
yidsleꞌ choꞌ beṉꞌ Israel lo naꞌ beṉꞌ malkaꞌ!
Naꞌ katꞌkaꞌ Chiozaꞌ goneꞌ ka yiyak wen c̱hecho sto shii,
yibachgaicho choꞌ nakcho beṉꞌ Israel,
choꞌ nakcho xiiṉ dia c̱he dii Jacobaꞌ.