Salmo 11
1 X̱ancho Chiozanꞌ nx̱enilallaa gakleneꞌ nadꞌ.
¿Bic̱he nazle:
“Bxoṉjlatii dga chak c̱hoꞌ,
ka chon byiṉdoꞌkaꞌ lleꞌ yaa yaokaꞌ chizogakb katꞌ chllebgakb?
2 Bwiakachi ka chkaadeej beṉꞌ malkaꞌ xis wix̱itꞌ c̱heꞌkaꞌ,
kwenc̱he do ngashꞌzə wc̱helꞌgakeꞌn beṉꞌkaꞌ ngooshḻilallii.
3 Katꞌ bich wzenag beṉꞌ naꞌ sologakeꞌ biz c̱hegakeꞌ gon,
bich bi de gak gon beṉꞌ ḻi beṉꞌ shaoꞌkaꞌ.”
4 X̱ancho Chiozaꞌ zoeꞌ yabanaꞌ ganaꞌ nak lill xḻatjeꞌ.
X̱ancho Chiozaꞌ llieꞌ yabanaꞌ chṉabiꞌe.
Naꞌ zoeꞌ chwieꞌ beṉꞌ yell-lioni naꞌ ṉez nḻeꞌileꞌ ka chon to togakeꞌ.
5 X̱ancho Chiozaꞌ chwiayeṉee daa chon beṉꞌ ḻi beṉꞌ shawaa naꞌ daa chon beṉꞌ malaꞌ;
naꞌ chleꞌzbanileꞌ beṉꞌkaꞌ nak beṉꞌ zeshꞌ beṉꞌ zban.
6 Goneꞌ ka sakꞌziꞌ beṉꞌ malkaꞌ kon ka chidoḻꞌ gak c̱hegakeꞌ.
Naꞌ wḻetjeꞌ yiꞌnaꞌ xan yabanaꞌ nc̱hix̱an azúfrenaꞌ,
naꞌ gak c̱hegakeꞌ ka chak c̱he no yagdoꞌ dii chdobə beꞌ ḻa wal.
7 Ḻaꞌ X̱ancho Chiozaꞌ nakeꞌ beṉꞌ ḻi beṉꞌ shaoꞌ,
naꞌ ḻe chazlallee gon beṉꞌ daa zej shḻi.
Naꞌ beṉꞌkaꞌ ngooshḻilallii yillingakeꞌ laweꞌnaꞌ.