Salmo 12
1 Goklen netoꞌ,
Chios c̱haꞌ,
ḻaꞌ kochno beṉꞌkaꞌ chzoa xtilloonaꞌ lleꞌ.
Ba binitlo beṉꞌkaꞌ zoa do yic̱hj do lallꞌgakeꞌ ladj beṉꞌ yell-lioki.
2 Yogꞌzə beṉꞌ chziyeꞌ ljwelleꞌ,
naꞌ chonzgakeꞌ ka choꞌelaꞌo choꞌe dillꞌ beṉꞌ,
naꞌ naktegakeꞌ beṉꞌ c̱hop choꞌa.
3 X̱ancho Chiozaꞌ wlliayee yogꞌḻoḻ beṉꞌkaꞌ chonz ka choꞌelaꞌo choꞌe dillꞌ beṉꞌ
naꞌ beṉꞌkaꞌ chshalj chshon c̱he kwingakeꞌ,
4 beṉꞌkaꞌ nagakeꞌ:
“Ni c̱he choꞌa ḻollꞌntoꞌnin gak ka cheenintoꞌ,
ḻaꞌ ḻennanꞌ gaklenan netoꞌ
naꞌ kono gak iṉabiaꞌ netoꞌ.”
5 Naꞌ X̱ancho Chiozaꞌ neꞌ:
“Chleꞌidꞌ ka chak c̱he beṉꞌ yeshꞌkaꞌ,
ka chsakꞌziꞌ beṉꞌ ḻegakeꞌ,
naꞌ chenidꞌ ka chbellyeshꞌgakeꞌ.
Daan wliꞌa yeḻꞌ wak c̱haꞌnaꞌ gaklenꞌ ḻegakeꞌ,
yislagakee lo naꞌ beṉꞌkaꞌ chc̱hiꞌ chsakꞌ ḻegakeꞌ.”
6 Choꞌa xtillꞌ X̱ancho Chiozaꞌ nakan dowalj dii ḻi dii shaoꞌ.
Nakan ka plat daa ba wde gall shii lo yiꞌnaꞌ
kwenc̱he chzeyan daa bi nakə dowalj.
7 Chios c̱haꞌ,
liꞌ gap wwioꞌ netoꞌ
naꞌ wsej wllonoꞌ netoꞌ lao beṉꞌ malkaꞌ toshiizi.
8 Beṉꞌ malkaꞌ chec̱hj chdagakeꞌ gattezə,
naꞌ yogꞌte beṉꞌ yell-lioni chzix̱ chziagakileꞌ dii malaꞌ.