Salmo 10
1 Chios c̱haꞌ,
¿berac̱he nḻaalaꞌozoꞌ nadꞌ,
naꞌ bi chaklenoꞌ nadꞌ lawi daa chak c̱haꞌ?
2 Beṉꞌ malkaꞌ lo yeḻꞌ chep chaꞌlallꞌ c̱heꞌkaꞌ
chsakꞌziꞌgakeꞌ beṉꞌ yeshꞌkaꞌ.
Naꞌ yidobshgagakileꞌ daa cheengakileꞌ gongakileꞌ beṉꞌ.
3 Beṉꞌ malkaꞌ chshalj chshongakeꞌ c̱heyi diikaꞌ chzelallꞌgakeꞌ gongakeꞌ.
Chṉegakeꞌ wen c̱he beṉꞌkaꞌ chzelallꞌ bi de c̱he beṉꞌ,
naꞌ chṉegakeꞌ zban c̱he Chiozaꞌ.
4 Chep chaꞌlallꞌgakeꞌ naꞌ chakgakileꞌ aga chyalljgakileꞌ Chiozaꞌ,
naꞌ ni latꞌ bi yooyic̱hjgakeꞌneꞌ.
5 Yogꞌ daa chongakeꞌ toshiizi chchejan wen,
naꞌ bi zegakeꞌ wṉeyi daa chc̱hogloꞌ c̱he beṉꞌ.
Chxill-ligakeꞌ beṉꞌkaꞌ chwiyi ḻegakeꞌ.
6 Naꞌ chakgakileꞌ aga no gak bi goni ḻegakeꞌ;
ni biga bi gak c̱hegakeꞌ.
7 Lillinzə chyishjgakeꞌ biaꞌ blagꞌ c̱he beṉꞌ,
leyi choeꞌgakeꞌ dillꞌ wxiyeꞌ naꞌ chwall chshebgakeꞌ beṉꞌ.
Naꞌ dillꞌkaꞌ xoa choꞌa ḻolleekaꞌ chzoaziꞌyaan naꞌ chsakꞌziꞌn beṉꞌ.
8 Naꞌ choꞌa yellkaꞌ chkwashꞌgakeꞌ chbeꞌnogakeꞌ beṉꞌdoꞌ bibi choneꞌ c̱hegakeꞌ kwenc̱he witgakeꞌneꞌ.
Naꞌ toshiizi chbeꞌnogakeꞌ beenaꞌ bi gak soshyiꞌ ḻegakeꞌ.
9 Ka chon to bell zṉia,
chbezb sem banaꞌ gaob,
kanꞌ chon beṉꞌkaꞌ chinogakeꞌ gatꞌ latj witgakeꞌ beṉꞌdoꞌnaꞌ bi gak soshyiꞌe ḻegakeꞌ.
Naꞌ ka chzapgakeꞌneꞌ naꞌ chongakileꞌneꞌ kon ka nan c̱hegakeꞌ.
10 Naꞌ chbeꞌḻoshꞌgakeꞌ kwenc̱he tokonganzi chzapgakeꞌ beṉꞌdoꞌkaꞌ bi gak soshyiꞌ ḻegakeꞌ.
11 Naꞌ beṉꞌ malkaꞌ chakgakileꞌ bi chakbeꞌi Chiozaꞌ diikaꞌ chongakeꞌ,
ni bi chleꞌileꞌ bin chongakeꞌ.
12 Bliꞌgach yeḻꞌ wak c̱hoꞌnaꞌ,
Chios c̱haꞌ,
naꞌ beꞌgach yeḻꞌ zakꞌziꞌ c̱he beṉꞌ malkaꞌ.
Naꞌ bi kwej yic̱hjoꞌ beṉꞌdoꞌkaꞌ chsakꞌziꞌgakeꞌ.
13 ¿Berac̱he chṉez beṉꞌ malkaꞌ zban c̱he Chiozaꞌ?
Naꞌ chakzgakileꞌ aga bi xya gao Chiozaꞌ c̱heyi diikaꞌ chongakeꞌ.
14 Per liꞌ chleꞌiloꞌ ka chongakileꞌ beṉꞌ,
naꞌ ngoo yic̱hjoꞌn,
naꞌ goniloꞌ ḻegakeꞌ kon ka chiyaḻꞌ gak c̱hegakeꞌ.
Linꞌ nx̱enilallꞌ beṉꞌdoꞌkaꞌ bi gak soshyiꞌ ḻegakeꞌ,
naꞌ linꞌ chaklenoꞌ beṉꞌ wizebkaꞌ.
15 Ben ka bich bi gak gon beṉꞌ malkaꞌ.
Bsakꞌziꞌgakeꞌ ax̱t ki yiyoll yido koo c̱hixj dii mal c̱heꞌkaꞌ.
16 X̱ancho Chiozaꞌ chṉabiꞌe toshiizi.
Beṉꞌkaꞌ bi nonḻilallꞌgakeꞌneꞌ yiyol yinitgakeꞌ naꞌ bich soagakeꞌ yell c̱heꞌni.
17 Chios c̱haꞌ,
liꞌ chzenagoꞌ c̱he beṉꞌdoꞌkaꞌ chsakꞌziꞌ beṉꞌ ḻegakeꞌ katꞌ choeꞌḻwillgakeꞌ liꞌ.
Liꞌ chtipoꞌ lallꞌgakeꞌ naꞌ zioꞌ wṉeyi c̱hegakeꞌ.
18 Liꞌ chaklenoꞌ beṉꞌ wizebkaꞌ naꞌ beṉꞌkaꞌ chc̱hiꞌ chsakꞌ beṉꞌ ḻegakeꞌ,
kwenc̱he beenaꞌ wyaꞌ wbiṉi bishte yell-lioni,
bich wwall wshebeꞌ ḻegakeꞌ.