Salmo 9
1 Do yic̱hj do lallaa weꞌlawaa liꞌ,
Chios c̱haꞌ.
Wiꞌa dillꞌ c̱he yogꞌ diikaꞌ ba benoꞌ diikaꞌ chon ka chibani beṉꞌ.
2 Chiba chizakidꞌ daa nombiꞌa liꞌ.
Goḻꞌ iṉiaꞌ liꞌ daa nakoꞌ ḻiizelozi beṉꞌ choo beṉꞌ xen.
3 Beṉꞌkaꞌ chakziꞌ chakzbani nadꞌ chixoṉjgakeꞌ daa chakbeꞌgakileꞌ linꞌ chaklenoꞌ nadꞌ,
naꞌ to ka chjsoatishzgakeꞌ chbiayiꞌtegakeꞌ.
4 Linꞌ chṉabiꞌo,
naꞌ chc̱hogbiꞌo c̱he beṉꞌ kon ka chiyaḻꞌ gak c̱hegakeꞌ;
ba biya biyiljoꞌ nadꞌ naꞌ wnoꞌ bibi xtoḻaa de.
5 Ba wdiḻ-lenoꞌ beṉꞌkaꞌ bi chall chlleb liꞌ.
Ba blliayoo ḻegakeꞌ daa nakgakeꞌ beṉꞌ mal,
naꞌ kochno lljadini ḻegakeꞌ shlas.
6 Ba wlliayiꞌ beṉꞌkaꞌ bwiyi choꞌ,
naꞌ blliayoo len yell c̱heꞌkaꞌ,
naꞌ ni bich nxe ganaꞌ wlliagakan.
7 X̱ancho Chiozaꞌ chṉabiꞌe zejḻi kaṉi,
naꞌ goneꞌ yeḻꞌ josc̱his c̱he yogꞌḻoḻ beṉꞌ.
8 Naꞌ wc̱hogloeꞌ c̱he beṉꞌ yell-lioni kon ka chiyaḻꞌ;
naꞌ kaꞌkzə goneꞌ yeḻꞌ josc̱his c̱he yogꞌḻoḻ beṉꞌ lleꞌ zbii zkaaṉ yell-lioni.
9 X̱ancho Chiozaꞌ chkweejeꞌ beṉꞌdoꞌkaꞌ chc̱hiꞌ chsakꞌ beṉꞌ ḻegakeꞌ,
naꞌ chakleneꞌ ḻegakeꞌ katꞌ bi chak c̱hegakeꞌ.
10 Yogꞌ beṉꞌkaꞌ nombiaꞌgakeꞌ liꞌ nx̱enilallꞌgakeꞌ liꞌ.
Ḻaꞌ liꞌ,
Chios c̱haꞌ,
bi chbejyic̱hjoꞌ beṉꞌkaꞌ chiyilj liꞌ.
11 Ḻi goḻ iṉe X̱ancho Chiozaꞌ,
beenaꞌ chṉabiaꞌ yell Siónnaꞌ.
Ḻi c̱hix̱jeꞌi yogꞌḻoḻ beṉꞌ lleꞌ yell-lioni dii wenkaꞌ ba beneꞌ.
12 Chiozaꞌ chiziꞌe wzon c̱he beṉꞌ wen xyakaꞌ,
naꞌ bi chbej yic̱hjeꞌ beṉꞌkaꞌ chonyeshꞌ chṉabgakeꞌ yisleꞌ ḻegakeꞌ lao beṉꞌkaꞌ chsakꞌziꞌ ḻegakeꞌ.
13 Chios c̱haꞌ,
biyeshꞌlallii nadꞌ.
Bwiagach ka chsakꞌziꞌ beṉꞌkaꞌ chakziꞌ chakzbani nadꞌ.
¡Bislagach nadꞌ lao yeḻꞌ witaꞌ!,
14 kwenc̱he weꞌlawaa liꞌ ganaꞌ chdop chllag beṉꞌkaꞌ lleꞌ Jerusalénnaꞌ,
daa llia lo yaa Siónnaꞌ.
Naꞌ wiꞌa dillꞌ laweꞌkaꞌ linꞌ chidoḻoo goḻ iṉentoꞌ,
naꞌ yiba yizakidꞌ daa ba bisloꞌ nadꞌ.
15 Beṉꞌ yellkaꞌ bi nonḻilallꞌ liꞌ,
ḻekzgakeꞌ bixopgakeꞌ ḻoo yechaꞌ daa wdengakeꞌ kwenc̱he nan ixop beṉꞌ yoblə ḻoꞌinnaꞌ.
Naꞌ yaljaꞌ daa bzegakeꞌ senan beṉꞌ,
ḻetezan bizenan ḻegakeꞌ.
16 X̱ancho Chiozaꞌ ba bliꞌe nakeꞌ beṉꞌ chc̱hoglo c̱he beṉꞌ kon ka chiyaḻꞌ.
Naꞌ yaljaꞌ daa bze beṉꞌ malkaꞌ senan beṉꞌ,
ḻetezan bizenan ḻegakeꞌ.
17 Beṉꞌ malkaꞌ,
beṉꞌkaꞌ bi chzenag c̱he Chiozaꞌ,
kwiayiꞌgakeꞌ.
18 Per bi chbej yic̱hjeꞌ beṉꞌkaꞌ chyallj chc̱hini,
ni bi gak kaꞌzə daa nongakeꞌ lez.
19 ¡Bliꞌgach yeḻꞌ wak c̱hoꞌnaꞌ,
Chios c̱haꞌ!
Bi wiꞌo latj gon beṉꞌ yell-lioki daa nazan c̱hegakeꞌ.
Yitop yishagshgoꞌ beṉꞌ yellkaꞌ lawoꞌnaꞌ,
beṉꞌkaꞌ bi nonḻilallꞌ liꞌ,
kwenc̱he wc̱hogloꞌ c̱hegakeꞌ.
20 Ben ka gall illebgakeꞌ liꞌ,
Chios c̱haꞌ.
Ben ka gakbeꞌgakileꞌ nakgakeꞌ beṉꞌ bishte yell-liozə.