Salmo 8
1 Chios, beṉꞌ nak X̱anntoꞌ,
doxen yell-lioni zeyi c̱hoꞌ nakoꞌ ḻiizelozi beṉꞌ choo beṉꞌ xen,
naꞌ tollaꞌ nak xan yabanaꞌ balaaṉ xen c̱hoꞌnaꞌ.
2 Chc̱hinoꞌ choꞌa ḻollꞌ biꞌ xkwidꞌdoꞌkaꞌ naꞌ bdoꞌkaꞌ ni challꞌ chxop choḻ chṉegakbꞌ liꞌ,
kwenc̱he kwekllin beṉꞌkaꞌ chakziꞌ chakzbani liꞌ naꞌ beṉꞌkaꞌ chizoshyiꞌ liꞌ.
3 Katꞌ chwiaꞌ xan yabanaꞌ daa bx̱e bsiloꞌ,
naꞌ beoꞌdoꞌnaꞌ len beljdoꞌkaꞌ bllioꞌn,
4 naꞌch niaꞌ: ¿Nora nakntoꞌ, netoꞌ beṉꞌ yell-lio, chiꞌ yic̱hjzoꞌ netoꞌ,
naꞌ zezoꞌ wṉeyi c̱he netoꞌ nakntoꞌ xiiṉ beṉec̱h?
5 Naꞌ zi latꞌzə ki benoꞌ netoꞌ ka anjl c̱hoꞌkaꞌ,
naꞌ noṉoꞌ netoꞌ to balaaṉ xen wal.
6 Naꞌ bzoꞌ netoꞌ iṉabiaꞌntoꞌ lao yogꞌte diikaꞌ bx̱e bsiloꞌ,
naꞌ benoꞌ yogꞌḻoḻten lallꞌ naꞌntoꞌ:
7 no xilꞌ, no gooṉ, naꞌ yogꞌḻoḻ ba lleꞌ yaa yao,
8 no bakaꞌ chzo xan yabanaꞌ, no beḻkaꞌ lleꞌ ḻoo nisdoꞌnaꞌ,
naꞌ yogꞌ bakaꞌ chesh chalj ḻoꞌinnaꞌ.
9 Chios, beṉꞌ nak X̱anntoꞌ,
¡doxen yell-lioni zeyi c̱hoꞌ nakoꞌ ḻiizelozi beṉꞌ choo beṉꞌ xen!