Salmo 7
1 Chios c̱haꞌ,
linꞌ nx̱enilallaa.
Bislagach nadꞌ lo ṉiꞌa naꞌ beṉꞌkaꞌ chino nadꞌ kwenc̱he witgakeꞌ nadꞌ.
2 Ḻaꞌ shi bi gaklenoꞌ nadꞌ,
naꞌ wxoxj wtingakeꞌ nadꞌ ka chon bell zṉiakaꞌ,
naꞌ kono zoa yisla nadꞌ,
shi ṉaa.
3 Chios c̱haꞌ,
shi napꞌ doḻꞌ lawoꞌnaꞌ,
wa shi bi dii mal ba benꞌ c̱he beṉꞌ,
4 shi ba bsakꞌziꞌa beenaꞌ zoalen nadꞌ wen,
wa shi ba bsakꞌziꞌa beenaꞌ chakziꞌ chakzbani nadꞌ ḻaꞌkzi aga bi beneꞌ c̱haꞌ,
5 wlagdoshga beṉꞌkaꞌ chakziꞌ chakzbani nadꞌ ax̱t ki yidoḻꞌgakileꞌ nadꞌ,
naꞌ wlej wshoshjshgagakeꞌ nadꞌ,
naꞌ yisol yiṉitshgagakeꞌ balaaṉ c̱haꞌnaꞌ,
shi ṉaa.
6 Chios c̱haꞌ,
bi shaꞌgachiloꞌ wlliayoogakeꞌ lo yeḻꞌ chllaa c̱hoꞌnaꞌ.
Btiḻgach beṉꞌkaꞌ chllaa chlok nadꞌ.
Bliꞌgach yeḻꞌ wak c̱hoꞌnaꞌ,
naꞌ bengach yeḻꞌ josc̱his c̱haꞌni,
ḻaꞌ ba bllioꞌ biaꞌ wc̱hogloꞌ c̱he beṉꞌ kon ka chiyaḻꞌ gak c̱heꞌ.
7 Ben kwenc̱he beṉꞌkaꞌ lleꞌ yogꞌ yell yidop yillaggakeꞌ lawoꞌnaꞌ,
naꞌ wṉabiaꞌ ḻegakeꞌ.
8 Chios c̱haꞌ,
linꞌ chc̱hogbiꞌo c̱he yogꞌ beṉꞌ lleꞌ yell-lioni.
Bc̱hogbiaꞌ gak wen c̱haꞌ daa chonꞌ daa nak shḻi,
naꞌ zoaꞌ do yic̱hj do lallaa lawoꞌnaꞌ.
9 Chios c̱haꞌ,
toshiizi chonoꞌ daa nak shḻi,
naꞌ chiya chiyiljoꞌ daa yoo ḻoo yic̱hjlallꞌdoꞌ to to beṉꞌ.
Bi wiꞌo latj gon beṉꞌ malkaꞌ daa nazan c̱hegakeꞌ,
naꞌ ben ka gak wen c̱he beṉꞌkaꞌ chon daa nak shḻi lawoꞌnaꞌ.
10 Chios,
beenaꞌ chkweejeꞌ nadꞌ,
chisleꞌ beṉꞌkaꞌ zoa do yic̱hj do lallin.
11 Chiozaꞌ chc̱hogbiꞌe c̱he yogꞌ beṉꞌ kon ka chiyaḻꞌ,
naꞌ toshiizi chllee beṉꞌkaꞌ chon dii malaꞌ.
12 Naꞌ shi beṉꞌkaꞌ chon dii malaꞌ bi yiyaj yilengakileꞌ,
naꞌ yiḻoeꞌ spad c̱heꞌnaꞌ naꞌ wkaadeejeꞌ xis wix̱itꞌ c̱heꞌnaꞌ.
13 Ba nx̱oashawee diikaꞌ gonleneꞌ xyanaꞌ.
Naꞌ ba nzeshawee xis wix̱itꞌ c̱heꞌnaꞌ naꞌ ba nzoeꞌ yiꞌnaꞌ lao xisaꞌ wzaḻaꞌn.
14 Beṉꞌ malaꞌ,
ḻoo yic̱hjlallꞌdoꞌenaꞌ wya wbiṉ dii malaꞌ chyilj chzaneꞌ,
naꞌ chen chleꞌi beṉꞌ yeḻꞌ wxiyeꞌnaꞌ goljlallee.
15 Naꞌ ba beneꞌ to yech zitj,
naꞌ yechaꞌ beneꞌ,
ḻekzeꞌ ibix̱eꞌ ḻoꞌinnaꞌ.
16 Dii mal c̱heꞌnaꞌ choneꞌ,
ḻekzeꞌ yidobileꞌn;
naꞌ yeḻꞌ beṉꞌ zeshꞌ beṉꞌ zban c̱heꞌnaꞌkzə wlliayiꞌn ḻeꞌ.
17 Weꞌlawaa X̱ancho Chiozaꞌ daa nakeꞌ beṉꞌ chon daa nak shḻi toshiizi.
Naꞌ goḻ iṉiaꞌneꞌ daa nakeꞌ ḻiizelozi beṉꞌ choo beṉꞌ xen.