Salmo 6
1 Chios c̱haꞌ,
bi wsheshlengachoꞌ nadꞌ,
daa chshaa liꞌ.
Ni bi wsakꞌziꞌgachoꞌ nadꞌ daa chlloo nadꞌ.
2 Biyeshꞌlallꞌgachi nadꞌ,
Chios c̱haꞌ,
ṉaa bi shawaa.
Biyongach nadꞌ,
ḻaꞌ doxentiaꞌ ba nsis.
3 Naꞌ ḻe ba chakshejlallꞌ yic̱hjlallꞌdawaani.
Chios c̱haꞌ,
¿batra gaklenoꞌ nadꞌ?
4 Bileꞌshiꞌgachi nadꞌ,
Chios c̱haꞌ,
naꞌ bislagach nadꞌ lo yeḻꞌ witaꞌ;
bislagach nadꞌ daa nakoꞌ beṉꞌ chiyeshꞌlallii.
5 Ḻaꞌ shi ba witꞌ aga willjadinchidꞌ liꞌ.
Aga no gakch weꞌlaꞌo liꞌ katꞌ ba yoꞌe ḻoo banaꞌ.
6 Ba bidolallaa daa chbellyeshaa.
Yogꞌ yel chlaljꞌ nis xc̱hell c̱haꞌni gani diaꞌ,
naꞌ chisbisan blag c̱haꞌni.
7 Ba chc̱hoḻ jalawꞌki daa ḻe chbellꞌ,
naꞌ ba chde c̱hegakin ni c̱he beṉꞌkaꞌ chakziꞌ chakzbani nadꞌ.
8 Ḻi ikwas kwitii,
ka leꞌ chonle dii malaꞌ,
ḻaꞌ Chios c̱haꞌnaꞌ ba bzenagueꞌ ka chbellyeshaa.
9 Chios c̱haꞌnaꞌ ba bzenagueꞌ daa chṉabꞌ yeḻꞌ goklen c̱heꞌnaꞌ.
Ba bzenagueꞌ daa wṉabidee.
10 Beṉꞌkaꞌ chakziꞌ chakzbani nadꞌ yiyii yidogakileꞌ naꞌ ḻe gakshejlallꞌgakeꞌ.
Naꞌ do chiyii chidoꞌzgakileꞌ yixoṉjdogakeꞌ.