Salmo 2
1 Bi llabiaꞌ bic̱he chdop chllagzə beṉꞌ zitꞌkaꞌ naꞌ cheengakileꞌ no wshagdiḻgakeꞌ.
Naꞌ chgoozgakeꞌ xṉezi to dii bi so sakgakileꞌ gongakeꞌ.
2 Beṉꞌkaꞌ chṉabiaꞌ yellkaꞌ,
chakgakeꞌ toz
chgoogakeꞌ xṉezin yizoshyiꞌgakeꞌ
X̱ancho Chiozaꞌ len beenaꞌ ba nzoeꞌ kwenc̱he iṉabiꞌe.
3 Naꞌ nagakeꞌ:
“Ḻi da tiḻ-lenchogakeꞌ naꞌ yiyell yilaꞌcho lo neekaꞌ.
Bich weꞌcho latj iṉabiaꞌgakeꞌ choꞌ.”
4 X̱ancho Chiozaꞌ,
beenaꞌ chṉabiaꞌ yabanaꞌ,
chxill-lileꞌ ḻegakeꞌ.
5 Naꞌ yeḻꞌ chllaa c̱heꞌnaꞌzə gall illebgakeꞌ,
naꞌ iṉieꞌ ḻegakeꞌ zṉia,
yee:
6 “Nadꞌ ba bzoaꞌ beenaꞌ iṉabiꞌe
lo yaa Siónnaꞌ,
daa nak latj c̱haꞌ.”
7 Naꞌ wiꞌa dillꞌ daa ba wna X̱ancho Chiozaꞌ.
Ḻeꞌ ba wneꞌ nadꞌ:
“Linꞌ nakoꞌ xiiṉꞌ,
naꞌ ṉaa daa solo iṉabiꞌo iṉezi beṉꞌ nadaan nakꞌ X̱oꞌ.
8 Wṉabi nadꞌ gonꞌ lallꞌ noꞌ yogꞌḻoḻ beṉꞌ lleꞌ doxen yell-lioni,
naꞌ gonꞌ ka gakgakeꞌ lallꞌ noꞌ.
9 Naꞌ iṉabiꞌo ḻegakeꞌ,
naꞌ bi siꞌxenoꞌ c̱he nottez beṉꞌ bi chzenag c̱hoꞌ,
naꞌ wxoxj wtingakoꞌneꞌ ka beṉꞌ chxoxj chtin to yesꞌ yo.”
10 Ka leꞌ beṉꞌ wṉabiaꞌ,
ḻi shajnii dga,
¡naꞌ ḻi gon ka nan!
11 Ḻi yiba yizaki weꞌlaꞌole X̱ancho Chiozaꞌ
naꞌ ḻi gall illebeꞌ.
12 Ḻi koo Xiiṉeꞌnaꞌ balaaṉ
kwenc̱he ki illee naꞌ wlliayee leꞌ,
ḻaꞌ yeḻꞌ chllaa c̱heꞌnaꞌ tolbeꞌ shep c̱hazan.
¡Chakomba yogꞌ beṉꞌkaꞌ nx̱enilallꞌgakeꞌ gap wwieꞌ ḻegakeꞌ!