Wajé jeꞌechú, ejaꞌawá waꞌaté, yukuna marí
21
Kaja jeꞌechú, ejaꞌawá paineko iꞌimakare, kapicharo; ñaké kaja juni jalomi kapichako rijwaꞌaté. Pumí chiyó nomá wajé jeꞌechú, wajé ejaꞌawá waꞌaté.
2 E nuká Juan amari Tupana leꞌejé pajimila Jerusalén witúkaꞌaka jeꞌechú chiyá, Tupana iꞌimaká eyá. Nawakako wakajé, riꞌiwapaniperu lamáꞌatayo rokó palá wani ripé. Ñaké kaja riká pajimila iꞌimaká lamáꞌatakejami ke rijló.
3 E nomaꞌá apú kemaká kaphí, Tupana iꞌimaká eyá: “Iyakaꞌo, chuwa Tupana iꞌimajika inaꞌuké waꞌaté. Rileꞌejena inaꞌukénaja neꞌemajika; Tupana yuréjero kaja najwaꞌateja.
4 Tupana jalákajeri nejlú chiyá nejlú jalá; unká takaꞌakaje iꞌimalaje re najló; unká kaja namálaje chapú kaje yajwé; unká kaja neyálaje; unká kaja namálaje kewini yajwé; unká riꞌimalaje, júpimi riꞌimaká ejaꞌawá chu, ke”, ke rimaká. a
5 E yáꞌaro ñákaꞌajori chu kemari: “Chuwa nulaꞌajika piño piyuke nakaje wajé”. E rimá nojló: “Pilanaꞌá marí papera kaje chojé; kewákaje nupurákaꞌalo, inaꞌuké pechu iꞌimakáloje kaphí richojé penaje”.
6 E rimá piño: “Kaja. Nuká keñoꞌótari piyukeja nakaje iꞌimaká; nuká kaja tajátajeri riká piyukeja. Núrupi chu makáraꞌataño, wátaño juni iꞌirakana. Ñaké kaja wátaño najluwa kajmuchaji, najló noꞌó riká, neꞌemakáloje matajnako nujwaꞌaté raú penaje. Mapeja noꞌoká inaꞌukejlo riká, unká riwemí iꞌimalá.
7 Nuká kemari kaphí nochojé táraꞌajeñojlo, neꞌemakáloje nuyani ke, kaphí napechu iꞌimakare chojé nuꞌumakale. Ilé ke riꞌimajika unká jáchoꞌolajeño Nupurákaꞌalo jaꞌapiyá jemaꞌakana chiyajlo.
8 Eyá ajopánajlo riꞌimajé chapú. Marí ke iꞌimakaño neꞌemakale pachá, riꞌimajé najló chapú: inaꞌuké piyá keroꞌojeño, unká kaphí kalé péchuruna Tupana chojé, unká inaꞌukélaruna, inaꞌuké nójeño, namanáicho laꞌajeño ajopana waꞌaté, lawichú kaje laꞌajeño, lejñákaje laꞌajeño, puꞌují péchuruna nakaje jenami nakú, nemakare nakú: ‘wachiꞌinárikana riká’, ke, eyá pajlákachina. Ilé ke iꞌimakaño iꞌimajeño kajruni jiyá, azufre aú lukúnaꞌako chu; ilé ke nakapichájiko piño Tupana liyá”.
Wajé Jerusalén yukuna marí
9 E pajluwaja Tupana waꞌatéjeri iphari nunaku. Iyamá kuwáꞌata kele, maapami ke nomákarena, nakiyana riꞌimaká. Tiyela nakapi ke, nalaꞌakáloje chapú ejaꞌawá chu iꞌimakaño raú penaje neꞌemaká. Pajluwaja nanakiyana iphari nunaku, rimá nojló: “Piꞌijná nujwaꞌaté, nuyaꞌatachi pijló Oveja iꞌirí yajalo iꞌimajíkayo”.
10 E Tupana waꞌatéjeri wáꞌari nupechu kajruni wani ipuré ejo. Yenoje riꞌimaká, riká nakiyá riyaꞌatá nojló Tupana leꞌejé pajimila Jerusalén. Nomá riwitúkaꞌaka jeꞌechú chiyá, Tupana eyá.
11 Kajrú mejámaꞌatani Tupana leꞌejé iꞌimaká rinaku. Jipa, kawemí nojé wani ke nomaka riká; kawemí nojé jipa ií jaspe, riká ke riꞌimaká. Jamarálani, cristal ke nomaka riká.
12 Kurara kajruni, yenuwa chipúkaꞌari rinakuwá, jipa nakiyá laꞌakanami riꞌimaká. Iyamá iphata jiꞌimaji nakojé (12) kele rinumaná iꞌimaká apú eyá, apú eyá ke; iyamá iphata jiꞌimaji nakojé kele kaja Tupana waꞌatéjena, jeꞌechú chiyájena, táraꞌaño rinumaná waꞌaphé. Rinumaná nakú lanaꞌakéjami iꞌimari; Israel lakénami aꞌajútaya michuna ií iꞌimari lanaꞌakéjami rinaku.
13 Weji keleno ke rinumaná iꞌimaká; kamú jeñoꞌoká ejo pitá weji kele rinumaná iꞌimaká; eyá riparaꞌalá chojé pumitá iꞌimari weji kele kaja; eyá apoꞌojó pitá, riparaꞌalá chojé pumitá, weji kele kaja rinumaná iꞌimaká; kamú jaꞌakó ejo pitá, weji kele kaja rinumaná iꞌimaká.
14 Iyamá iphata jiꞌimaji nakojé kele jipa pitaró kurara jaꞌapiwá. Jesucristo (El Cordero, Oveja iꞌirí) wakáraꞌakarena ií iꞌimari lanaꞌakéjami rinaku.
15 Tupana waꞌatéjeri, puraꞌakaro nujwaꞌaté iꞌimaká, ñaꞌarí pajimila wapherecha jená. Oro nakiyá laꞌakanami riꞌimaká, rijñaꞌakare aú rená; rijñaꞌá kaja kurara jená, rinumaná jená waꞌaté.
16 Rejenowaja pajimila chita iꞌimaká; kamítaꞌachi ke riꞌimaká. Rená ñaꞌajona aú Tupana waꞌatéjeri ñaꞌarí rená: dos mil doscientos kilómetros ketana riwapherecha iꞌimaká; ñaketana kaja yenuka riꞌimaká.
17 Rijñaꞌá kaja kurara yenuka jená: sesenta y cuatro metros ketana yenójeka riꞌimaká. Ketana rená ñaꞌakó rileꞌejé rená ñaꞌajona aú.
18 Jipa, jaspe palá nojé nakiyá laꞌakanami, kurara iꞌimaká. Oro wani nakiyana laꞌakanami pajimila iꞌimaká, jamarálani ke ramako wíluru ke.
19 Palá nojé jipa, kawemí nojé patoꞌoró jipa nakuwá, kurara jaꞌapiwá toꞌokó nakú. Ripalacha penaje riꞌimaká, palá ramako raú. Marí kaje jipa toꞌoró raꞌapiwá: jaspe, apú zafiro, apú ágata, apú esmeralda,
20 apú crisoprasa, apú jacinto, apú kaja penaje ií iꞌimari amatista.
21 Re nakaje kawemí nojé wani, rií perla; riká waja iꞌimari rinumaná itájona apú, apú ke. Iyamá iphata jiꞌimaji nakojé kele rinumaná iꞌimaká; pajlúwaꞌalano waja perla iꞌimaká rinumaná itájona. Pajimila eꞌiyowá iñeꞌepú toꞌoró, oro nakiyá laꞌakanami riꞌimaká; jamarálani, wíluru ke ramako.
22 Unká nomala re Tupana ñakaré, inaꞌuké pechu iꞌimakáloje puꞌují rinaku richu penaje; unká na penaje riꞌimalá, Tupana iꞌimakale re Riꞌirí Jesucristo waꞌaté. Piyuke laꞌajeri Tupana; nawakáraꞌajeri kaja riká.
23 Unká kaja kamú, keri, kaje iꞌimalá re; unká na penaje riꞌimalá, Tupana iꞌimakale mejámaꞌatani ke najló. Riꞌirí iꞌimari nakamaré.
24 Inaꞌukena, ajopana teꞌeré eyájena, ajopana teꞌeré eyájena ke, amájeño rikamaré chojé. Piyuke ajopana, ajopana ke, wakáraꞌajeño iꞌijnatájeño nakaje palá nojé, kawemí nojé, rejo.
25 Pajimila numaná yuréjero meꞌetákeja weꞌechú ketana; unká netalaje riká, unkale lapí iꞌimalaje re.
26 Palá nojé nakaje ajopana, ajopana ke, kapi iꞌimajíkare, neꞌejnataje riká pajimila ejo.
27 Unká neꞌejnatálaje nakaje puꞌuwaré nojé rejo; unká kaja puꞌuwaré laꞌajeño, unká inaꞌukélaruna, kajena iꞌimalaje re; unká kaja pajlákachina iꞌimalaje re. Kaja Tupana lanaꞌarí inaꞌuké ií Riꞌirí papérane chu, neꞌemakáloje matajnako rijwaꞌaté re penaje, nekaja kalé iꞌimajeño re.