22
E Tupana waꞌatéjeri yaꞌatarí nojló juni, kajmuchaji aꞌajeri inajlo penaje. Jamarálani wani riꞌimaká, cristal ke jamaraka. Tupana iꞌimari Riꞌirí (Oveja iꞌirí, el Cordero) waꞌaté. Re ripomi iꞌimaká.
2 Iñeꞌepú iꞌijnari pajimila jiwami chuwá, riká iñeꞌepú jiwami chuwá juni toꞌoró peꞌiyowá. Iyamá pumitanó riturenó aꞌawaná lapaꞌakó. Inajlo kajmuchaji aꞌajona penaje riká aꞌawaná iꞌimaká; keri keja rarúkaꞌajika. Pujana ke ripaná iꞌimaká, ajopana, ajopana ke, iꞌimakáloje peyajwéruna raú penaje.
3 Unká Tupana yerúkaꞌala nakaje chaje riká pajimila eꞌiyá, palá waja nakaje iꞌimakale re. Tupana iꞌimajeri nawakáraꞌajeri, Riꞌirí waꞌaté; puꞌují rijwaꞌatéjena pechu iꞌimajika nanaku re.
4 Namaje riká. Rií iꞌimajeri lanaꞌakéjami napulá nakú.
5 Unká lapí iꞌimalaje re; unká kaja kamú iꞌimalaje re; unká kaja nakamaré iꞌimalaje re. Unká na penaje ilé kaje iꞌimalaje najló, Tupana iꞌimajíkale mejámaꞌatani ke najló re. Nawakáraꞌajeri riká, rijwaꞌatéjena wakáraꞌajeño iꞌimajeño kaja rijwaꞌaté. Matajnako neꞌemajika rijwaꞌaté.
6 E Tupana waꞌatéjeri, jeꞌechú chiyaje, kemari piño nojló: “Kewákaje marí purákaꞌaloji, iná aꞌakáloje iná nakojó riká penaje. Tupana aꞌarí Ripechu ripurákaꞌalo jaꞌapátajeñojlo; riká penájemija kaja Tupana wakáraꞌari nuká majó, numakáloje raꞌapiyá jemaꞌajéñojlo mékeka riꞌimajika meketana iꞌimajemi yukuna”, ke rimaká nojló.
7 Rimá piño nojló. Jesús kemari: “Jemaꞌá, meketana iꞌimajemi nuphaje kaꞌajnó, palani riꞌimajika aꞌañó nanakojó marí purákaꞌalojijlo”, ke rimaká nojló.
8 Nuká Juan jemaꞌarí mékeka nemaká; nomá kaja nakaje iꞌimajíkare yaꞌatakó nojló. Marí kaje aú nujlámaꞌo Tupana waꞌatéjeri jiꞌimá nakojé, nupechu iꞌimakale puꞌují rinaku. Riká yaꞌatarí nojló nakaje nomákare iꞌimaká, raú nujlámaꞌo riꞌimá nakojé.
9 E rimá nojló: “Pilaꞌaniña ilé ke nuká. Nakaje laꞌajeri nuká Tupánajlo; piká, ke kaja nuká; Tupana purákaꞌalo jaꞌapátajeño, marí papera kaje purákaꞌalo aꞌakaño nanakojó, kele nakiyana kaja nuká. Ñakele pipechu iꞌimá Tupana nakú puꞌují, unká nunaku kalé”, ke rimaká nojló.
10 Rimá piño: “Pimichoꞌotániña ajopana liyá marí purákaꞌaloji, nakaje iꞌimajíkare nakú rimakale. Meketana iꞌimajemi riꞌimajé, marí purákaꞌaloji kemaká ke.
11 Riphájika rená chojé wakajé, puꞌuwaré laꞌajeñó iꞌimajeño kaja keja puꞌuwaré laꞌajeñó; unká inaꞌukélaruna iꞌimajeño kaja keja unká inaꞌukélaruna; palá laꞌakaño iꞌimajeño kaja keja palá laꞌakaño; Tupana jaꞌapiyá iꞌimakaño iꞌimajeño kaja keja Tupana jaꞌapiyá iꞌimakaño”, ke rimaká nojló.
12 Jesús kemari piño: “Jemaꞌá, meketana iꞌimajemi nuká iꞌijnajeri piño kaꞌajnó ejaꞌawá nakojé. Nujñaꞌajé nujwaꞌató nakaje inaꞌuké laꞌakare wemí; noꞌojé najló riwemí. Nakaje nalaꞌakare lokoꞌopáneje noꞌojé najló riwemí pajluwano, pajluwano ke.
13 Nuká keñoꞌótari piyukeja nakaje ejaꞌawá chu iꞌimakare; nukaja kaja tajátajeri piyuke riká”, ke rimaká.
14 Rimá: “Puꞌují péchuruna neká, yuriño naliyó puꞌuwaré nalaꞌakare, neꞌemakáloje palá péchuruna, reyá aꞌajná ñoꞌojó penaje. Neká ajñájeño aꞌawaná icha, aꞌarí inajlo kajmuchaji, iná iꞌimakáloje matajnako raú penaje; neká iꞌimajeño kaja pajimila, jeꞌechú chu iꞌimakare e.
15 Eyá marí ke iꞌimakaño unká iꞌimalájeño riká pajimila e: lejñaño, namanáicho laꞌajeño ajopana waꞌaté, inaꞌuké nójeño, kele unká iꞌimalájeño re. Puꞌují péchuruna nakaje jenami nemakare nakú: ‘wachiꞌinárikana riká’, ke, unká kaja iꞌimalájeño re; pajlákachina, unká kaja iꞌimalájeño re. Ilé kajena unká iꞌimalájeño Tupana waꞌaté”.
16 E rimá piño nojló: “Nuká Jesús, wakáraꞌari nujwaꞌatéjeri jeꞌechú chiyá, riꞌimakáloje nakaje iꞌimajíkare yukuna ijló penaje. Noꞌopiyá jemaꞌajeño awakaño apaꞌalá chojé, apaꞌalá chojé ke, nekajlo riyukuna yurejo. Nuꞌumaká ejaꞌawá chu wakajé, ‘David michú lakemi riká’, ke nemájika nunaku. Iwijrí patarí lapiyami, ke nuká”.
17 Tupana Pechu, Jesucristo jaꞌapiyá jemaꞌajeño, kele kemaño Jesucrístojlo: “Majó piꞌijná”, ke. Imá ñaké kaja rijló, ke numaká marí purákaꞌaloji jemaꞌajéñojlo.
Núrupi chu makáraꞌataño wátaño juni iꞌirakana. Ñaké kaja iwátajika ee Jesucristo liyá kajmuchaji, ikejaꞌa riliyá riká, raꞌachí ijló riká, raú iꞌimajé matajnako rijwaꞌaté. Mapeja raꞌajika ijló riká, unká riwemí iꞌimalaje.
18 Nuká Juan kemari marí purákaꞌaloji jemaꞌajéñojlo: Apiyákaniña marí purákaꞌaloji. Unká kemalájeño richuwaja rinaku, apichátajeño kari ripurákaꞌaloji lanaꞌakéjami. Pachá namaje chapú kaje yajwé rimakare nakú marí papera kaje chu.
19 Unká jaꞌapátalajeño ajopánajlo rimakare nakú marí papera kaje chu yukuna ke kaja, unká iꞌimalájeño matajnako Tupana waꞌaté rileꞌejé pajimila e. Marí papera kaje chu rimá riká pajimila nakú.
20 Jesucristo amari marí purákaꞌaloji, rimá: “Ke joꞌó riká, meketana iꞌimajemi nuꞌujnajé kaꞌajnó”, ke.
“Ñaké riká. ¡Piꞌijná majó!”, ke numaká wawakáraꞌajeri Jesucrístojlo.
21 Nuwata piyuke iká iꞌimaká palá, wawakáraꞌajeri Jesucristo palamane aú.
Ñaké riꞌimajika.