Waweꞌepíkaloje na penájeka Judas wakáraꞌaka najló marí purákaꞌaloji. Riyukuna marí:

Jesucristo iꞌimaká marí ejaꞌawá chu wakajé, riꞌimá inaꞌuké weká ke kaja. Raꞌapiyatéjena penájemina, ajopana waꞌaté, jaꞌapátaño palá richuwaja riyukuna, eꞌiyonaja apoꞌojó wani neꞌiyajena pechu iꞌimaká Tupana nakú. Nemaké Jesucristo nakú: “Unká riꞌimalá inaꞌuké, weká ke kaja, marí ejaꞌawá chu riꞌimaké wakajé. Ripéchuja kalé iꞌimari pajluwaja inaꞌuké eꞌiyá meketánaja”, ke nemájika rinaku.

Nemaké piño marí ke Tupana nakú: “Palájneꞌeke riꞌimaká, unká na rilaꞌalá puꞌuwaré. Marí ejaꞌawá chu inaꞌuké laꞌá puꞌuwaré, raú waweꞌepí unká Tupana keñoꞌótakarena kalé weká. Apala rijwaꞌatéjena, jeꞌechú chiyájena, kaꞌajná keñoꞌótaño weká, nakaje marí ejaꞌawá chu iꞌimakare waꞌaté. Unká paala wanapona walaꞌakare aú puꞌuwaré. Unká Tupana kalé keñoꞌótari weká, ñakele unká kaja raꞌalá rinakojó puꞌuwaré walaꞌakare. Iná laꞌajla iná pechu keja puꞌuwaré, iná wátaka ke, unká Tupana wajálaje weká ripachá”, ke nemájika rinaku. Nemá kaja: “Piyukeja weká iꞌimajeñó kapichákajo liyá Tupana palamane aú; unká na penaje kalé Jesucristo takaꞌarí inaꞌuké chaya iꞌimaká”, ke napechu iꞌimajika apoꞌojó wani Tupana pechu liyá. Nalaꞌaké kaja nekó weꞌepiño ke wani, raú nalaꞌaké ajopana inaꞌukena mapechúruna ke najluwa, unkale napechu iꞌimaké napechu ke kaja.

Inaꞌuké weꞌepíkaloje kewákaje purákaꞌaloji nakojé penaje Judas lanaꞌá marí purákaꞌaloji najló iꞌimaká. Riká yuriro kaja wajló. Riꞌimá wajló riyukuna, waꞌaká piyá wanakojó pajlakaje purákaꞌaloji.