3 Nojena, íkiꞌija nuwátakarena, marí purákaꞌaloji nuwátajla wakáraꞌakana ijló iꞌimaká, richu nuꞌumakáloje ijló Tupana iꞌimataka weká kapichákajo liyá yukuna. Eꞌiyonaja kalé unká wani paala neꞌiyajena laꞌaká, ñakele numá ijló, itáraꞌakoloje kaphí Tupana purákaꞌalo riyuríkare piyukeja rileꞌejena inaꞌukénajlo, weꞌemakáloje raꞌapiyá penaje iꞌimaká chojé.

4 Kaphí péchuruna richojé riꞌimatá kapichákajo liyá, rejomi neꞌemaká piyá puꞌuwaré laꞌakana nakú. Re inaꞌuké puꞌuwaré laꞌajeñó wani, pajlaño wanakiyana, Jesucristo jaꞌapiyá jemaꞌajeño waꞌaté, nawakákoloje najwaꞌaté penaje. Napechu Tupana nakú: “Unká riwajálaje inaꞌuké, puꞌuwaré nalaꞌakare pachá”. Ilé ke napechu iꞌimakale, nalaꞌá mapéjari ke najluwa Tupana purákaꞌalo lanaꞌakéjami. Tupana, Jesucristo, kele palamane weká. Wawakáraꞌajeri riká, waminá kaja riká. Unká kaja naꞌalá nanakojó nakaje rilaꞌakare inaꞌukejlo penaje. Júpimi Tupana purákaꞌalo lanaꞌakéjami kemá ilé ke iꞌimakaño nakú: “Kajrú Tupana wajájika iphájeño naꞌapiwá wawakáraꞌajeri Tupánajlo, Jesucrístojlo waꞌaté. Chapú nalaꞌakare lokoꞌopáneje riwajaje neká”, ke rimaká nanaku.

5 Chuwa, nuꞌumajika piño ijló apú yuku, kaja jemaꞌakare iꞌimaká yukuna, nuwátakale piño rinaku kemakana ijló, ipechu kapicháñaaka piyá riká. Tupana iꞌimatari Israel lakénami Egipto eyájena liyá iꞌimaká. Riꞌimataka neꞌemaká naliyá ejomi, unká neꞌiyajena jemaꞌaké raꞌapiyá, pachá rikapichata neꞌemaká. Ilé ke Tupana wajájika puꞌuwaré laꞌajeñó iꞌimaká.

6 Ñaké kaja Tupana waꞌatéjena, jeꞌechú chiyájena penájemina iꞌimaká. Raꞌá neꞌemaká ajopana wakáraꞌajeño penaje, eꞌiyonaja unká nawátala raꞌapiyá jemaꞌakana, raú náchoꞌo richiyá. Chapú laꞌajeñó neꞌemakale, rikaꞌá neꞌemaká kawakala jakojé, kalajeruni wani chojé. Re neꞌemajé jepoꞌokéjana ke ñakeja, aꞌajná riwajájika unká inaꞌukélaruna wakajé ejená. Rejéchami namájika piño Tupana wajájika neká yajwé, unká wani náchoꞌolajo richiyá.

7 Ñaké kaja júpimi iyamá pajimila eyájena iꞌimaká. Pajluwa ií iꞌimari Sodoma, eyá apú ií iꞌimari Gomorra. Kajrú ilé pajimila eyájena michuna laꞌajika namanáicho ajopana waꞌaté, ajopana waꞌaté ke. Tupana waꞌatéjena, jeꞌechú chiyájena penájemina laꞌajika, ke kaja nalaꞌajika namanáicho ajopana waꞌaté. Ñujuꞌukena wani neꞌemajika. Achiñana pajnoꞌokeño panakuwáaka, nalaꞌakáloje namanáicho pajwaꞌatéchaka penaje. Ñaké kaja nañujure akuwaná inaana kaꞌajika pupuchí pajwaꞌatéchaka. Chuwa, namaka keraꞌathani, unká yakálaje penaje kalé iꞌimajika yajwé. Ilé kaje aú chuwa, piyukeja inaꞌukena weꞌepika meke Tupana wajájika namanáicho laꞌajeñó.

8 Ileruna pajlákachina numakárena nakú, amákeño keꞌiyapé nakaje natapú. Rejomi namájika natapú ke nalaꞌajika chapú nanapona. Unká wani nawátala Tupana nawakáraꞌajeri penaje iꞌimaká; puꞌuwaré kaja napuraꞌakó Tupana waꞌatéjena, jeꞌechú chiyájena, nakú.

9 Miguel, Tupana waꞌatéjena, jeꞌechú chiyájena wakáraꞌajeri iꞌimaká, akhaꞌakaro Jiñá Chiꞌinárikana waꞌaté Moisés michú tami jimaje. Riwó laꞌaró Jiñá Chiꞌinárikana akhaꞌakana jaꞌapí, raú rimá rijló: “Tupana ko akhaꞌá piká ilé kaje pachá”.

10 Eyá ileruna achiñana numakárena nakú, unká wo laꞌakó puꞌuwaré nojé purákaꞌaloji jaꞌapí. Puꞌuwaré napuraꞌajiko nakaje, unká naweꞌepílare nakojé palá, nakú. Nakaje nalaꞌajíkare puꞌuwaré aú napichátake nekó, kamejérina pechu keja napechu iꞌimajíkale najló.

11 ¡Chapú wani nakaje iꞌimajika najló, nalaꞌakale puꞌuwaré! Caín michú laꞌaká puꞌuwaré reꞌewé michú nókana aú, ke kaja nalaꞌaká puꞌuwaré. Neká, numakárena nakú ijló, iꞌimakeño mapeja pajlakaje purákaꞌaloji jaꞌapiyá, raú najñaꞌakáloje liñeru najluwa penaje. Ilé ke kaja Balaam michú laꞌaká iꞌimaká. Eyá re kaja apú iꞌimari unká inaꞌukélari, rií iꞌimari Coré. Chapú ripechu iꞌimajika nawakáraꞌajeño nakú, pachá Tupana kapichata riꞌimaká. Ñaké kaja ileruna achiñana kulaka naowá, chapú napechu iꞌimakale nawakáraꞌajeño nakú.

12 Mapeja kaja napáñaꞌataka inaku, awakákochu aꞌajnewá ajñaje pajwaꞌatéchaka. Keyajupa ipechu ke awakako pajwaꞌatéchaka. Unká na jaꞌapí kalé nephá. Nemá ajopánajlo kajrú nakaje nakú, nalaꞌakáloje palá penaje, eyá neká, unká na kalé nalaꞌá palá.

13 Juni taꞌakheni keja neká. Juni taꞌakheni akhoꞌótari kajrú nakaje, puꞌuwaré nojé rakú iꞌimakare, rikejare eꞌiyowá. Ñaké kaja puꞌuwaré ileruna inaꞌukena laꞌakare amako. Iwijrina kapichako iná meꞌetaka chojónaja keja neká. Kalajeruni wani chojé kupákejana penájena neꞌemajika. Kalajeruni cháꞌatari apú rikalajerucha aú chu neꞌemajé matajnako.

14 Adán michú iꞌimari paineko wani iꞌimaká. Pajluwa kuwáꞌata kele chami inaꞌuké iꞌimaká rapumí chojé, rejéchami Enoc mothoꞌoká iꞌimaká. Riká kemari ilé kajena nakú iꞌimaká, mékeka Tupana laꞌajika neká, puꞌuwaré nalaꞌakare pachá. Rimá nanaku Tupana jaꞌapiyá ke: “Iweꞌepí marí: Wawakáraꞌajeri wani waícha majó íkiꞌiruna wani rijwaꞌatéjena, jeꞌechú chiyájena, waꞌaté.

15 Neká kemájeño piyuke inaꞌukena nakú, mékeka Tupánajlo piyuke nakaje nalaꞌakare, marí ejaꞌawá chu neꞌemaká ketana iꞌimaká. Puꞌuwaré wani nalaꞌajika pachá nawajaje neká; puꞌuwaré napuraꞌakole Tupana nakú, pachá nawajaje kaja neká”, ke rimaká nanaku.

16 Ileruna achiñana, numakárena nakú, kayukújneꞌekena wani neká, mapeja nakhaꞌaká ajopana maná. Mapeja kaja nalaꞌaká najluwa neká, unká inaꞌukélaruna ke. Nalaꞌá nekó mawó nakaje nawátakare nakojé; nanakuwaja kalé napuraꞌó palá. Mapeja napuraꞌakó ajopana inaꞌukena jimaje palá, raú napechu iꞌimakáloje palá nanaku, raú kaja nalaꞌakáloje najló nakaje penaje.

17 Íkiꞌija nuwátakarena iká, iweꞌepí mékeka Jesucristo wakáraꞌakarena riyukuna iꞌimajé kemaká ijló iꞌimaká.

18 Nemá ijló: “Kaja penaje ejaꞌawá iphájika rená chojé piyá wakajé, neꞌiyajena inaꞌukena nakiyana iꞌichajeño Tupana nakú, raꞌapiyá jemaꞌajeño nakú waꞌaté; Ripurákaꞌalo lanaꞌakéjami nakú waꞌató neꞌechajé. Napechu keja nalaꞌajika nakaje, unká Tupana wátalare kaje, ilé kaje laꞌakana nakuja neꞌemajé”, ke nemaká nanaku iꞌimaká.

19 Ileruna inaꞌukena apichátaño ajopana pajwaꞌatéchaka. Napechu keja laꞌakaño neká; unká kaja Tupana Pechu iꞌimalárena eꞌiyá neká.

20 Iká, íkiꞌija nuwátakarenajlo numá: Ipechu iꞌimá richaje, richaje ke, kaphí Jesucristo chojé, Ripurákaꞌalo chojé waꞌaté. Ipuraꞌó kaja Tupana waꞌaté, Ripechu wakáraꞌaka iká ke.

21 Tupana wajwena iká, ñakele iꞌimá ñakeja raꞌapiyá. Jesucristo weꞌepiri wamuꞌují, ñakele raꞌajé wajló kajmuchaji, weꞌemakáloje matajnako raú jeꞌechú chu.

22 Re kaꞌajná inaꞌuké nakiyana apú ewá, apú ewá ke, unká pechu iꞌimalá kaphí Tupana chojé. Iweꞌepí namuꞌují.

23 Iꞌimatá neká ipurákaꞌalo aú ja, neꞌejnaká piyá keraꞌathani chojé. Ñaké kaja iweꞌepíjika ajopana inaꞌukena muꞌují. Amá ikó palá, ilaꞌaká piyá puꞌuwaré najwaꞌaté. Ilaꞌaniña wani nakaje unká Tupana wátalare kaje najwaꞌaté.

24 Re pajluwaja iná Chiꞌinárikana, Tupana. Riká weꞌepiri piyuke wani nakaje nakojé. Jesucristo palamane aú riꞌimatá weká kapichákajo liyá. Riweꞌepí waꞌakana rinakojó, walaꞌaká piyá puꞌuwaré. Riweꞌepí kaja wapechu lamáꞌatakana, weꞌemakáloje palá péchuruna rijló penaje.

25 Rilaꞌajé puꞌují wapechu, weꞌemajika rijwaꞌaté wakajé. Jesucristo palamane aú palá kaphí richojé péchuruna iꞌimajika, ñakele palani wapuraꞌakó palá, nakaje rilaꞌakare nakú. Riweꞌepí piyukeja nakaje laꞌakana. Ajopana chaje wani riká; ajopana chaje wani wakáraꞌajeri kaja riká; kaja keja riꞌimaká júpimi eyá; ñakeja riká meꞌetení; ñakeja riꞌimajika.