2 Íkiꞌija nuwátakare piká. Nupuraꞌono Tupana waꞌaté pinaku, piyukeja nakaje iꞌimakáloje palá pijló; nupuraꞌó kaja rijwaꞌaté pinaku, piꞌimakáloje peyajwé penaje. Nuweꞌepí palá péchuri piká, ñakele nuwata kaja piꞌimaká peyajwé.

3 Inakiyana iphaño majó nunaku iꞌimaká. Neká iꞌimaño nojló piyukuna, nemá: “Kaphí joꞌó ripechu Tupana chojé; palá kaja raꞌaká kewákaje purákaꞌaloji rinakojó”, ke. Ilé kaje yukuna jemaꞌakana aú, puꞌují wani nupechu laꞌakó.

4 Nulakena laꞌakachu kewákaje purákaꞌaloji kemaká ke, puꞌují wani nupechu laꞌakó raú, unká na apú laꞌalá nupechu nojló ñaké.

5 Íkiꞌija nuwátakare piká, nuweꞌepí pilaꞌaká palá wanakiyana ilérowa iꞌimakaño nakú, ajopana teꞌeré eyájena neꞌemaká eꞌiyonaja.

6 Neꞌemá wajló piyukuna maare Jesucristo jaꞌapiyá jemaꞌajeño awakákaꞌalo eꞌiyá, nemá: “Íkiꞌija riwátaka Tupana, ajopana inaꞌukena waꞌaté”, ke. Eyá numá piño pijló: Eko paꞌá ajopana teꞌeré eyájena ñathé, nakaje nalaꞌajíkare nakú kamuꞌují aú, Tupana wátaka ke, náchoꞌokoloje palá reyá penaje.

7 Apú ewá, apú ewá ke, naꞌapaka Jesucristo yukuna iꞌimakana nakú. Re kaꞌajná neꞌiyajena wátaño nañathé aꞌakana, nakaje nalaꞌakare nakú kamuꞌují aú. Unkájika ee Jesucristo jaꞌapiyá jemaꞌajeño kalé neꞌemajika, unká najñaꞌalaje naꞌapiyá riká.

8 Ñakele weká, Jesucristo jaꞌapiyá jemaꞌajeño, aꞌañó wanakojó neká, waꞌakáloje nañathé nakaje aꞌakana najló aú, neꞌejnakáloje kewákaje purákaꞌaloji yukuna iꞌimajé ajopánajlo, ajopánajlo ke.

9 Nuwakáraꞌa purákaꞌaloji ijló iꞌimaká, raú nulaꞌakáloje jenakú penaje, eꞌiyonaja unká Diótrefes jemaꞌalá noꞌopiyá iꞌimaká. Rikoja riwátaka iwakáraꞌajeri iꞌimakana.

10 Nuphájika inaku wakajé, nuꞌumajé pijló riyukuna piyukeja. Kajrú richapújraꞌako nunaku mapeja. Unká paala rijló rejeja puꞌuwaré laꞌakaná iꞌimalá, raú rilaꞌá richaje puꞌuwaré marí ke laꞌakana aú: unká riwátala ajopana Jesucristo jaꞌapiyá jemaꞌajeño iphaka inaku; unká kaja riyurila ajopana laꞌaká neká palá. Ilé kaje jimaje ráchoꞌota neká awakákaꞌalo ñakarelana chiyá.

11 Íkiꞌija nuwátakare piká, pilaꞌaniña puꞌuwaré, puꞌuwaré laꞌajeñó laꞌaká ke kaja. Pilaꞌá palá, palá laꞌajeñó laꞌaká ke. Tupana leꞌejena inaꞌukena laꞌañó palá; eyá unká laꞌalaño palá, unká rileꞌejena kalé neká.

12 Piyukeja inaꞌuké puraꞌañó palá Demetrio nakú. Kewaka nemaká rinaku, weká amaño kaja rilaꞌaká palá. Piweꞌepí kaja kewaka nakaje numakare nakú.

13 Re kajrú nakaje nuwata nakú kemakana pijló, eꞌiyonaja meꞌetení unká nuwátala rilanaꞌakana pijló.

14 Meketánaja iꞌimajemi nuwata pichaje iꞌijnakana kaꞌajnó, rejéchami wapuraꞌakóloje palá rinaku pajwaꞌatéchaka.

15 Nuwata pipechu iꞌimaká palá. Piyukeja, palá pinaku péchuruna maare iꞌimakaño, kemaño pinaku: “Eko palá rijló kaꞌajnó”, ke. Eko palá kaja ilérowa iꞌimakaño, palá nunaku péchurunajlo piyukeja.