2 JUAN
Marí ke Juan wakáraꞌaka pajluwájarujlo purákaꞌaloji
1
Kaja phíyuꞌuke cha nuká, wakáraꞌari pijló marí purákaꞌaloji, piyánijlo waꞌaté. Tupana jaꞌapiyá jemaꞌajeño nakiyana iká pajñakani nujwaꞌaté, ñakele íkiꞌija nuwátaka iká. Unká nukaja kalé wátari íkiꞌija iká; ñaké kaja ajopana, kewákaje purákaꞌaloji nakojé weꞌepéjeño nakiyana, wátaka iká íkiꞌija.
2 Íkiꞌija nuwátaka iká, rejenowaja weꞌemakale ijwaꞌaté kewákaje purákaꞌaloji jaꞌapiyá. Kaja keja weꞌemajika raꞌapiyá matajnako.
3 Nuwata waraꞌapá Tupana, Riꞌirí waꞌaté, laꞌaká inaku palá, iꞌimakáloje palá penaje. Kewákaje purákaꞌaloji chuwá nuwata riꞌimaká ijló ñaké, íkiꞌija Tupana wátakarena iꞌimakale.
4 Puꞌují nupechu, nuweꞌepíkale piyani nakiyana aꞌaká nanakojó kewákaje purákaꞌaloji, raú nalaꞌá waraꞌapá Tupana wakáraꞌaka ke.
5 Nojena, mawó numaká ijló, iwátakaloje pekowáaka íkiꞌija. Unká wajé kalé ñaké laꞌakana numá nakú ijló; kaja keja Tupana wakáraꞌaka walaꞌaká, wakeñoꞌoká raꞌapiyá jemaꞌakana iꞌimaká eyá wakajé.
6 Iná wátakachu íkiꞌija Tupana, iná laꞌá Ripurákaꞌalo kemaká ke. Ikeñoꞌoká raꞌapiyá jemaꞌakana wakajé, iweꞌepí mékeka riwakáraꞌaka weká, wawátakaloje íkiꞌija pekowáaka penaje.
Pajlákachina yukuna marí
7 Re kajrú pajlákachina marí ejaꞌawá chu, unká naꞌalá nanakojó Jesucristo yukuna. Apoꞌojó napuraꞌakó rinaku, nemá: “Riꞌimaká marí ejaꞌawá chu wakajé, unká inaꞌuké ke kalé riꞌimaká, weká ke”, ke nemaká. Pajlákachina ilé ke kemakaño, chapú napechu Jesucristo nakú.
8 Aꞌaniña ilé kajena purákaꞌalo inakojó, napichátaka piyá ijló kewákaje purákaꞌaloji, kaja palá laꞌakana nakuja iká. Ilé ke ilaꞌakale, palá nakaje iꞌimajika ijló jeꞌechú chu.
9 Apala pajluwa kaꞌajná iꞌimari Tupana yukuna inaꞌukejlo. Unká Jesucristo purákaꞌalo chuwá kalé kaꞌajná riꞌimá riyukuna najló, raú iná weꞌepí unká ripechu iꞌimalá Tupana pechu chuwá. Eyá iꞌiwapataro Jesucristo purákaꞌalo cha pechu, Jesucristo pechu chuwá; Tupana pechu chuwá kaja ripechu.
10 Apala apú kaꞌajná iphájeri inaku. Unká kaꞌajná rewíñaꞌatalaje iká nakaje nakú, Jesucristo jewíñaꞌataka rinaku ke kaja. Iyuríniña ilé kaje mujlúkaꞌaka iñakaré chojé, rewíñaꞌatakaloje iká penaje. Imaniña kaja rijló: “Eko Tupana laꞌá piká palá”, ke.
11 Ilé ke imájika ee rijló, aꞌajé riñathé nakaje unká kewákaje kalé jewíñaꞌatakana nakú aú.
Kaja penaje Juan kemakare nakú marí
12 Re kajrú nakaje nuwata nakú kemakana ijló, eꞌiyonaja unká nuwátala rilanaꞌakana meꞌetení. Nuwata ichaje iꞌijnakana. Riwakajé nupuraꞌajó ijwaꞌaté rinaku, raú puꞌují wapechu iꞌimakáloje.
13 Wanakiyana maare iꞌimakaño kemaño kaja inaku: “Eko palá najló kaꞌajnó”, ke.
Kaja.