5
Tupana aꞌarí Riꞌirí Jesucristo weꞌematájeri penaje. Kaphí wapechu iꞌimakachu richojé, Tupana yaní weká. Iná wátakachu íkiꞌija riká, iná wata kaja íkiꞌija riyani.
2 Wawátakachu íkiꞌija Tupana, eyá walaꞌakachu riwakáraꞌaka ke, waweꞌepí kaja wawátaka íkiꞌija riyani, raꞌapiyá jemaꞌajeño.
3 Íkiꞌija iná wátakachu Tupana, iná laꞌá riwakáraꞌaka ke. Nakaje riwakáraꞌakare iná laꞌaká, unká lakaꞌapheji kalé rilaꞌakana.
4 Kaphí wapechu iꞌimakale Tupana chojé, unká walaꞌalá puꞌuwaré ajopana, unká jemaꞌalaño raꞌapiyá laꞌaká ke. Rijwaꞌatéjena yuriño naliyó puꞌuwaré laꞌakaná. Unká nalaꞌalá puꞌuwaré, unká jemaꞌalaño raꞌapiyá laꞌaká ke, kaphí napechu iꞌimakale Jesucristo chojé. Ripalamane aú ja kalé wayurí puꞌuwaré laꞌakaná waliyó.
5 Kaphí Jesucristo chojé péchurunaja kalé weꞌepiño Tupana iꞌirí wani riká; ripalamane aú unká neꞌemalá puꞌuwaré laꞌakaná nakú.
6-7 Waweꞌepí Tupana iꞌirí wani riká, rimakale rinaku: “Nuꞌurí”, ke. Juan el Bautista laꞌaká bautizar riꞌimaká wakajé, Tupana puraꞌaró jeꞌechú chiyá rinaku, rimá: “Nuꞌurí”. Ñaké kaja rimaká rinaku jeꞌechú chiyá, ritakaꞌaká aꞌawaná apiyákakanami nakú wakajé. Kewákaje purákaꞌaloji nakú puraꞌajero, Tupana Pechu, kemari ñaké. Weji kele kemaño rinaku ñaké.
8 Ripechu kemari rinaku: “Tupana iꞌirí riká”, ke; Tupana kemari kaja: “Nuꞌurí riká”, ke, nalaꞌaká bautizar riká wakajé. Eyá nephaka riká aꞌawaná apiyákanami nakú wakajé, rimá piño ñaké kaja. Panakojéchaka ke napurákaꞌalo, ilé kaje aú iná weꞌepí Tupana iꞌirí Jesucristo.
9 Inaꞌuké iꞌimaño Jesucristo yukuna wajló iꞌimaká. Wemaꞌá naꞌapiyá. Tupana iꞌimari kaja Riꞌirí yukuna wajló. Inaꞌuké chaje riweꞌepika riyukuna nakojé, ñakele richaje palaka Tupana jaꞌapiyá jemaꞌakana.
10 Kaphí Tupana iꞌirí chojé péchuruna weꞌepiño kewaka rimaká Riꞌirí nakú; eyá unká kaphí kalé richojé péchuruna laꞌañó Tupana pajlákachi ke najluwa, unkale nemaꞌalá raꞌapiyá nakaje rimakare Riꞌirí nakú.
11 Tupana kemari wanaku iꞌimaká: “Nuká aꞌarí inaꞌukejlo kajmuchaji, neꞌemakáloje matajnako jeꞌechú chu raú. Nuꞌurí, Jesucristo ja kalé aꞌarí ijló riká”, ke rimaká.
12 Iná iꞌimakachu Tupana iꞌirí palamane aú, re inajlo kajmuchaji, iná iꞌimakáloje matajnako jeꞌechú chu raú penaje. Unkachu iná iꞌimalá Riꞌirí palamane aú, unká kaja kajmuchaji iꞌimalá inajlo, raú iná iꞌimakáloje matajnako jeꞌechú chu.
Kaja penaje Juan kemakare nakú najló iꞌimaká marí
13 Tupana iꞌirí jaꞌapiyá jemaꞌajéñojlo nulanaꞌá marí, iweꞌepíkaloje raú iꞌimajika matajnako jeꞌechú chu.
14 Tupana nakojé wapechu watánaꞌa, raꞌakale wajló nakaje wakejáꞌakare riliyá. Palani nakaje wakejáꞌakare riliyá iꞌimakachu rijló, raꞌá wajló riká.
15 Waweꞌepí Tupana jemaꞌaká wapuraꞌakó rijwaꞌaté; waweꞌepí kaja raꞌaká rinakojó nakaje wakejáꞌakare riliyá.
16 Apala pamá pajluwaja Jesucristo jaꞌapiyá jemaꞌajeri laꞌaká puꞌuwaré. Ilé puꞌuwaré rilaꞌakare pachá unká rikapichálajo Tupana liyá, ripajñoꞌotájika ee ripéchuwa, puꞌuwaré rilaꞌakare liyá Tupana ejo. Pipuraꞌó Tupana waꞌaté richaya, remaꞌakáloje raꞌapiyá piño, riꞌimakóloje raú. Apú kaꞌajná laꞌarí puꞌuwaré, pachá iná kapichó wani Tupana liyá. Unká ramálajo richaje ripachá. Ilé ke laꞌajeñó chaya unká iná puraꞌaló rijwaꞌaté.
17 Piyuke puꞌuwaré inaꞌuké laꞌakare, unká paala Tupánajlo riká. Re nakaje unká riwátalare iná laꞌaká, eꞌiyonaja unká iná takaꞌalá ripachá.
18 Waweꞌepí Tupana iꞌimakachu waraꞌapá, weká raꞌapiyá jemaꞌajeño unká iꞌimalaño puꞌuwaré laꞌakaná nakú, júpimi weꞌemajika ke. Tupana iꞌirí mejñátakale weká Jiñá Chiꞌinárikana liyá aú, unká weꞌemalaje puꞌuwaré laꞌakaná nakú.
19 Waweꞌepí Tupana waꞌatéjena weká, eyá unká jemaꞌalaño raꞌapiyá, Jiñá Chiꞌinárikana waꞌatéjena.
20 Waweꞌepí Tupana iꞌirí iphaka majó iꞌimaká. Rikaja kalé laꞌarí wapechu palá, waweꞌepíkaloje Tupana nakojé raú. Wachiꞌinárikana joꞌó riká, Jesucristo; matajnako riꞌimajika, kajmuchaji minárikana kaja riká.
21 Íkiꞌija nuwátakarena, ipechu iꞌimaniña apú nakú kaꞌajná, nakaje jenami nakú kaꞌajná: “Wachiꞌinárikana riká”, ke.
Kaja.