4
Nojena, íkiꞌija nuwátakarena, jemaꞌaniña piyuke inaꞌuké jaꞌapiyá kemaño nanakuwá: “Tupana jaꞌapiyá ke waꞌapátaka ijló ripurákaꞌalo”, ke. Paineko iꞌimá nakoꞌoná, raú iweꞌepíkaloje mékajenaka neká. Re kaꞌajná Tupana Pechu neꞌiyá, unká kaꞌajná. Re kajrú inaꞌukena kemaño mapeja nakuwá: “Tupana jaꞌapiyá ke waꞌapátaka ijló Ripurákaꞌalo”, ke.
2 Marí kaje aú iweꞌepeje mékajena eꞌiyá kewaka Tupana Pechu: Puꞌuwaká nemájika Ripechu jaꞌapiyá ke marí ke Jesucristo nakú: “Marí ejaꞌawá chu riꞌimaké wakajé, weká ke riꞌimaká inaꞌuké”. Ilé ke nemaká aú, iná weꞌepí re neꞌiyá Tupana Pechu.
3 Unká kemalaño ñaké Jesucristo nakú Tupana Pechu jaꞌapiyá ke, unká Ripechu iꞌimalá neꞌiyá. Re apú péchuji neꞌiyá, ñaké iꞌimakale, chapú napechu Jesucristo nakú. Kaja nakaje, júpimi nemájikare nakú ijló iꞌimaká, iphari rená chojé. Kaja cha re kajrú inaꞌukena meꞌetení, chapú péchuruna Jesucristo nakú.
4 Íkiꞌija nuwátakarena, Tupana waꞌatéjena iká. Ripechu iꞌimakale eꞌiyá, unká aꞌalá inakojó pajlákachina purákaꞌalo.
5 Chapú péchuruna Jesucristo nakú puraꞌañó nakaje marí ejaꞌawá chu iꞌimakare nakuja. Napechu ke iꞌimakaño jemaꞌañó naꞌapiyá, napechu iꞌimakale chapú kaja Jesucristo nakú najwaꞌaté.
6 Eyá weká, Tupana waꞌatéjena, ñakele weꞌemá riyukuna inaꞌukejlo. Weꞌepiño rinakojé, jemaꞌañó waꞌapiyá riká; eyá unká weꞌepílaño rinakojé, unká kaja jemaꞌalaño waꞌapiyá. Ilé kaje aú waweꞌepí mékajenaka iꞌimaká kewákaje purákaꞌaloji jaꞌapiyá; raú kaja waweꞌepí mékajenaka iꞌimaká pajlakaje purákaꞌaloji jaꞌapiyá.
Tupana wajwena inaꞌuké yukuna marí
7 Nojena, íkiꞌija nuwátakarena, iwata íkiꞌija pekowáaka. Tupana Pechu jaꞌapiyá iꞌimakana aú iná wata íkiꞌija pekowáaka. Raú kaja iná weꞌepí Tupana nakojé.
8 Íkiꞌija Tupana wátaka inaꞌuké. Ñakele rilaꞌá iná pechu palá, iná wátakaloje kaja íkiꞌija ajopana inaꞌukena. Unká wátalaño íkiꞌija ajopana inaꞌukena, unká kaja weꞌepílaño Tupana nakojé.
9 Tupana wakáraꞌari Riꞌirí wani marí ejaꞌawá chojé iꞌimaká. Pajluwaja Riꞌirí. Riwakáraꞌa riꞌimaká, raꞌakáloje wajló kajmuchaji, weꞌemakáloje matajnako jeꞌechú chu. Ilé kaje aú waweꞌepí riwátaka weká íkiꞌija.
10 Unká weká kalé wátaño íkiꞌija riꞌimaká paineko; riká wátari weꞌemaká íkiꞌija paineko. Ñakele riwakáraꞌa Riꞌirí majó iꞌimaká, ritakaꞌakáloje wapumí chojé, puꞌuwaré walaꞌakare pachá. Jesucristo palamane aú Tupana amó wachaje, puꞌuwaré walaꞌakare liyá.
11 Nojena, íkiꞌija nuwátakarena, íkiꞌija Tupana wátaka weká, ñakele palani wawátaka kaja íkiꞌija pekowáaka.
12 Unká na kalé amari Tupana; waweꞌepí re riká wajwaꞌaté, wawátakachu íkiꞌija pekowáaka.
13 Tupana aꞌarí wajló Ripechu, raú waweꞌepí wajwaꞌaté riká.
14 Weká amaño Riꞌirí iꞌimaká, riká riwakáraꞌakare majó inaꞌuké iꞌimatájeri penaje. Riyukuna weꞌemá ajopánajlo, ajopánajlo ke.
15 Nemaká aú Jesucristo nakú: “Tupana iꞌirí riká”, ke, iná weꞌepí Tupana Pechu iꞌimaká neꞌiyá, Tupana waꞌaté kaja napechu.
16 Waweꞌepí íkiꞌija Tupana wátaka weká. Wawátakachu íkiꞌija pekowáaka, waweꞌepí kaja Ripechu chuwá wapechu.
17 Ñaké iꞌimakale wawata íkiꞌija pekowáaka. Akijñojo Tupana kemaje wanaku, mékeka rijló nakaje walaꞌakare, marí ejaꞌawá chu weꞌemaká ketana iꞌimaká. Riwakajé unká wawó laꞌalajo ripiyá, walaꞌakale marí ejaꞌawá chu Jesucristo laꞌaká iꞌimaká ke kaja.
18 Wawátakachu íkiꞌija Tupana, unká wawó laꞌalajo ripiyá. Eꞌiyonaja iná pechu iꞌimakachu rinaku: “Riwajaje kaꞌajná nuká”, ke, unká joꞌó wawátala riká íkiꞌija, riwátaka weká ke.
19 Wawata íkiꞌija Tupana, riká wátakale íkiꞌija weꞌemaká paineko.
20 Apala pimá kaꞌajná pinakuwá: “Íkiꞌija nuwátaka Tupana”, ke. Eꞌiyonaja kaꞌajná chapú piwó apú pinakiyana cha, raú iná weꞌepí pajlákachi piká. Iná nakiyana, iná amákarena neká. Unkachu iná wátala neká íkiꞌija, unká méñoꞌojo iná wátala íkiꞌija Tupana, unká iná amálare.
21 Marí ke Jesucristo wakáraꞌaka weká: “Iwata íkiꞌija Tupana, waꞌaté iwata kaja íkiꞌija ejena”.