3
Kaja iweꞌepí meke íkiꞌika waraꞌapá Tupana wátaka weká. Íkiꞌija wani riwátaka weká, raú rimá wanaku: “Nuyani neká”, ke. Riyani joꞌó weká. Unká jemaꞌalaño Tupana jaꞌapiyá, unká weꞌepílaño riyánika weká; unká kaja naweꞌepila rinakojé.
2 Nojena, íkiꞌija nuwátakarena, kaja Tupana yaní weká. Unká joꞌó waweꞌepila palá mékeka weꞌemajika; waweꞌepí Jesucristo iphájika majó wakajé, riká ke kaja weꞌemajika. Riwakajé wamaje mékaje wánika riká.
3 Wátaño ñaké iꞌimakana, kaꞌañó nanakiyó chapú kaje napechu nakú iꞌimakare, napechu iꞌimakáloje palá, Jesucristo pechu iꞌimaká ke kaja penaje.
4 Laꞌarí puꞌuwaré, unká Tupana jaꞌapiyá jemaꞌajeri kalé riká. Unká laꞌalá Tupana wakáraꞌaka ke, puꞌuwaré laꞌajerí riká.
5 Kaja iweꞌepí Jesucristo iphaka majó marí ejaꞌawá nakojé iꞌimaká, rilaꞌakáloje weká unká japi laꞌalaño puꞌuwaré ke Tupánajlo. Unká wani Jesucristo weꞌepila puꞌuwaré laꞌakaná; unká wani chapú kaje iꞌimalá ripechu nakú.
6 Iꞌimari pajluwa japi keja Jesucristo waꞌaté, unká iꞌimalá puꞌuwaré laꞌakaná nakú. Eyá puꞌuwaré laꞌajerí, unká Jesucristo waꞌateje kalé riká, unká kaja riweꞌepila naka riká.
7 Íkiꞌija nuwátakarena, jemaꞌaniña pajlákachina jaꞌapiyá. Palá laꞌajeñó laꞌañó palá, palá péchuruna neꞌemakale. Jesucristo pechu ke kaja napechu iꞌimakale, nalaꞌá palá.
8 Eyá iꞌimari puꞌuwaré laꞌakaná nakuja, Jiñá Chiꞌinárikana waꞌateje riká. Jiñá Chiꞌinárikana keñoꞌorí puꞌuwaré laꞌakaná rikeñoꞌoká iꞌimakaje eyá. Eyá Tupana iꞌirí iphari majó iꞌimaká, rikapichátakaloje riliyá rijápakaꞌala penaje.
9 Iná iꞌimakachu Tupana waꞌateje, unká iná iꞌimalá puꞌuwaré laꞌakaná nakú. Tupana Pechu iꞌimakale iná eꞌiyá, unká méñoꞌojo rijwaꞌatéjena iꞌimalá puꞌuwaré laꞌakaná nakú.
10 Palá iná weꞌepika mékajenaka Tupana waꞌatéjena, eyá mékajenaka Jiñá Chiꞌinárikana waꞌatéjena. Unká laꞌalaño palá, unká kaja wátalaño íkiꞌija ajopana inaꞌukena, unká Tupana waꞌatéjena kalé neká.
Íkiꞌija wawátakaloje pekowáaka penaje yukuna marí
11 Ikeñoꞌoká Jesucristo yukuna jemaꞌakana iꞌimaká wakajé, nemá ijló iꞌimaká: “Iwata íkiꞌija pekowáaka”, ke.
12 Walaꞌaniña Caín michú laꞌaká iꞌimaká ke. Jiñá Chiꞌinárikana waꞌateje riꞌimakale, rinó reꞌewé michú iꞌimaká. Marí kaje jimaje rinó riꞌimaká: Puꞌuwaré laꞌajerí Caín michú iꞌimaká, eyá reꞌewé michú iꞌimari palá laꞌajerí. Nakaje rilaꞌakare iꞌimari palani Tupánajlo, raú Caín amari chapú reꞌewé, rinókaloje riká penaje.
13 Nojena, unká jemaꞌalaño Tupana jaꞌapiyá pechu iꞌimajika ee chapú inaku, ipechu iꞌimaniña: “¿Naje ilé ke napechu wanaku?”, ke.
14 Kaja weꞌemaó kapichákajo chiyá, weꞌemakáloje matajnako penaje. Waweꞌepí ñaké riká wajló, wawátakale íkiꞌija wejena, ajopana Jesucristo jaꞌapiyá jemaꞌajeño waꞌaté. Eyá neká unká wátalaño íkiꞌija ajopana, kapichájeño penájena neká.
15 Chapú péchuri rejena nakú, inaꞌuké nójeri ke riká Tupánajlo. Kaja iweꞌepí unká méñoꞌojo Tupana Pechu iꞌimalá inaꞌuké nójeri eꞌiyá. Unkachu Ripechu iꞌimalá iná eꞌiyá, unká iná iꞌimalaje matajnako jeꞌechú chu rijwaꞌaté.
16 Waweꞌepí Jesucristo wátaka weká íkiꞌija, ñakele riyurí nenókaloje riká wachaya. Palani ñaké kaja wapechu iꞌimakajla wanakiyana nakú, watakaꞌakálojejla nachaya penaje.
17 Re kaꞌajná wajló ñóꞌope nakaje, weꞌemakáloje palá raú penaje. Eyá re kaꞌajná apú wanakiyana, kamuꞌují wani laꞌaká. Eꞌiyonaja unká kaꞌajná waweꞌepila rimuꞌují; unká kaꞌajná waꞌalá rijló nakaje rilaꞌakare nakú kamuꞌují. Unkachu waꞌalá ilé kajena ñathé, iná weꞌepí unká Tupana Pechu jaꞌapiyá kalé weká; Ripechu aú iná wata íkiꞌija ajopana.
18 Íkiꞌija nuwátakarena, unká paala mapeja wemaká wanakiyana nakú: “Íkiꞌija wawátaka neká”, ke. Palá nanaku laꞌakana aú iná weꞌepí íkiꞌija iná wátaka neká.
19 Waweꞌepí Tupana waꞌatéjena weká, íkiꞌija wawátakachu wanakiyana. Ilé ke riꞌimakale wajló, unká wawó laꞌaló Tupana jimaje.
20 Apala iná pechu: “Unká paala kaꞌajná nulaꞌaká”, ke. Eꞌiyonaja Tupana cháꞌatari wapechu, riweꞌepíkale piyukeja nakaje iná pechu nakú iꞌimakare.
21 Íkiꞌija nuwátakarena, wemakachu puꞌuwaré walaꞌakare nakú Tupánajlo, rimaká rinaku ke kaja, e kaphí wapechu iꞌimajika rijwaꞌaté puraꞌakano nakú.
22 Riká aꞌajeri wajló piyuke nakaje wakejáꞌajikare riliyá, walaꞌakale piyuke nakaje riꞌimakáloje palá rinaku penaje.
23 Riká wakáraꞌari wapechu iꞌimaká kaphí Riꞌirí Jesucristo chojé; riwakáraꞌa kaja wawátaka íkiꞌija pekowáaka.
24 Tupana pechu ke raꞌapiyá jemaꞌajeño pechu, rejenowaja wapechu, Ripechu iꞌimakale weꞌiyá. Ripechu raꞌakare wajló aú waweꞌepí ñaké riká.