Wachaya puraꞌajero Jesucristo
2
Nulakena, nulanaꞌá ijló marí, unkale nuwátala ilaꞌaká puꞌuwaré. Eꞌiyonaja iná laꞌakachu puꞌuwaré, Jesucristo puraꞌó iná chaya Tupana waꞌaté. Unká laꞌalá puꞌuwaré riká.
2 Jesucristo takaꞌarí wachaya iꞌimaká, raú Tupana amákoloje wachaje puꞌuwaré walaꞌakare liyá. Unká wacháyaja kalé ritakaꞌá iꞌimaká; piyuke inaꞌuké, ejaꞌawá chu iꞌimakaño, chaya waꞌató ritakaꞌá kaja iꞌimaká.
3 Tupana wakáraꞌaka ke laꞌajeñó weꞌemakachu, waweꞌepí naka riká.
4 Apala pajluwa kaꞌajná kemari rinakuwá: “Nuweꞌepí naka Tupana”, ke. Eꞌiyonaja unká rilaꞌalá riwakáraꞌaka ke, raú iná weꞌepí pajlákachi riká, unká kewákaje purákaꞌaloji iꞌimalá ripechu nakú.
5 Eyá Tupana wakáraꞌaka ke laꞌajerí wátari íkiꞌija riká, ajopana inaꞌukena waꞌaté, raú iná weꞌepí Tupana pechu chuwá kaja ripechu.
6 Apú kaꞌajná kemari rinakuwá: “Tupana pechu chuwá nupechu”, ke. Puꞌuwaká rilaꞌakachu palá, Jesucristo laꞌaká iꞌimaká ke kaja, raú iná weꞌepí kewaka rimaká rinakuwá.
7 Nojena, íkiꞌija nuwátakarena, nulanaꞌá ijló mékeka Jesucristo wakáraꞌaka weká, wawátakaloje íkiꞌija pekowáaka yukuna. Unká meyáleje kalé rimá rinaku, kaja júpimi eyá, jemaꞌá mékeka riwakáraꞌaka wawátakaloje íkiꞌija pekowáaka yukuna.
8 Nakeñoꞌoká Jesucristo yukuna iꞌimakana ijló wakajé, neꞌemá ijló riyukuna iꞌimaká. Riwakáraꞌa weká, wawátakaloje íkiꞌija pekowáaka. Meyáleje keja wajló riyukuna, Jesucristo wátakale weká íkiꞌija. Ñaké kaja wawátaka íkiꞌija pekowáaka. Ilé kaje aú iyurí puꞌuwaré laꞌakaná iliyó; chuwa, kaja palá laꞌakanaja iweꞌepí itukumó. Kalajeruni kapichako mejámaꞌatani aú, ke kaja riká ijló.
9 Apala pimá kaja pinakuwá: “Unká nulaꞌalá puꞌuwaré”, ke. Eꞌiyonaja kaꞌajná chapú pipechu pejena, ajopana Jesucristo jaꞌapiyá jemaꞌajeño nakú. Ilé ke pipechu iꞌimaká aú, iná weꞌepí re joꞌó kaja joꞌó puꞌuwaré laꞌajerí piká.
10 Palá laꞌajerí iná, iná wátakachu íkiꞌija iná ejena. Raú unká iná jaꞌaló puꞌuwaré laꞌakaná ejo.
11 Chapú péchuri rejena nakú, re joꞌó kaja joꞌó puꞌuwaré laꞌajerí riká. Kalajerúwaka jaꞌapákaño, unká weꞌepila méñoꞌojoka neꞌejnaká, ke kaja riká.
12 Iká yuwanajlo nulanaꞌá marí purákaꞌaloji:
Kaja Tupana amákarona chaje iká, puꞌuwaré ilaꞌakare liyá.
Palá Jesucristo laꞌaká iká raú, ripalamane ramó ichaje.
13 Yuwaná chiꞌinajlo waꞌató nulanaꞌá kaja marí,
iweꞌepíkale naka Jesucristo.
Ejaꞌawá keñoꞌokó wakajé, kaja re riꞌimaké.
Walijímakanajlo, ináyanajlo waꞌató, nulanaꞌá kaja marí,
unkale jemaꞌalá Jiñá Chiꞌinárikana jaꞌapiyá.
14 Nuwakáraꞌa kaja yuwanajlo marí purákaꞌaloji,
waraꞌapá Tupana waꞌatéjena kaja neꞌemakale.
Nuwakáraꞌa kaja yuwaná chiꞌinajlo marí,
naweꞌepíkale Jesucristo nakojé.
Kaja riꞌimaké, ejaꞌawá keñoꞌokó piyá.
Nuwakáraꞌa kaja marí walijímakanajlo, ináyanajlo waꞌaté,
kaphí péchuruna neꞌemakale.
Napechu nakuja Tupana purákaꞌalo,
raú unká meke laꞌajé nemaꞌalá Jiñá Chiꞌinárikana jaꞌapiyá.
15 Iwátaniña puꞌuwaré laꞌakaná, ilaꞌaká piyá unká jemaꞌalaño Tupana jaꞌapiyá laꞌaká ke kaja marí ejaꞌawá chu. Iná wátakachu ñaké laꞌakana, unká iná wátala Tupana.
16 Unká riwakáraꞌala inaꞌuké laꞌaká keꞌiyapé nakaje napechu keja. Leꞌejepelaji kaje amaro najló. Riká aꞌarí nameꞌé rijluwa, nawátakaloje richaje, richaje ke, piyukeja nakaje najluwa. Nanane aú nalaꞌá nekó cháꞌatajeño ke wani. Kajrú inaꞌukena, marí ejaꞌawá chu iꞌimakaño, laꞌaká ñaké; unká Tupana liyaje kalé ilé ke laꞌakana.
17 Kaja ejaꞌawá keñoꞌó kapichákajo, piyuke nakaje inaꞌuké wátakare najluwa waꞌaté. Tupana wátaka ke laꞌakaño, nekaja kalé iꞌimajeño makapichako jeꞌechú chu.
Iná weꞌepíkaloje kewákaje yukuna, pajlakaje yukuna liyá penaje marí
18 Nuwátakarena, yewicha ejaꞌawá iphaka kaja penaje rená chojé. Kaja jemaꞌá nemaká iꞌimaká: “Pajluwaja, chapú wani péchuri Jesucristo nakú riꞌimajika, iphájeri majó”. Kaja riphá rená chojé; chuwa re chaꞌapá inaꞌukena, chapú péchuruna Jesucristo nakú. Ilé kaje aú waweꞌepí yewíchaja ejaꞌawá iphaka kaja penaje rená chojé.
19 Chapú péchuruna Jesucristo nakú iꞌimaño wanakiyana waꞌaté iꞌimaká. Kaja naꞌapáñaa weꞌemaká, unkale wapechu ke kalé napechu iꞌimakale. Wapechu ke kaja napechu iꞌimakela, unká nayurílajla weká. Naꞌapá waliyá iꞌimaká, raú waweꞌepí mékajenaka neká, unká wapechu ke kalé péchuruna neꞌemaká.
20 Jesucristo, unká weꞌepila puꞌuwaré laꞌakaná, aꞌarí ijló Tupana Pechu, raú iweꞌepí kewákaje purákaꞌaloji nakojé.
21 Nuwakáraꞌa ijló marí purákaꞌaloji, iweꞌepíkale kewákaje purákaꞌaloji nakojé. Unká nulanaꞌalá ijló riká, iweꞌepíkaloje rinakojé penaje, kaja iweꞌepí rinakojé, ñakele iweꞌepí unká pajlakaje iꞌimalá kewákaje purákaꞌaloji eꞌiyá.
22 Marí kaje aú iná weꞌepí mékajeka pajlákachi, kemari Jesucristo nakú: “Unká Tupana kalé wakáraꞌari rilaꞌaká rijápakaꞌala marí ejaꞌawá chu iꞌimaká”. Ilé ke rimaká aú iná weꞌepí pajlákachi riká. Chapú péchuri kaja riká Jesucristo nakú, unkale riwátala Tupana, Riꞌirí waꞌaté.
23 Neꞌiyajena kemaño Jesucristo nakú: “Unká Tupana wakáraꞌakare kalé riká”. Ilé ke nemakachu rinaku, iná weꞌepí unká Tupana waꞌatéjena kalé neká. Eyá kemaño rinaku: “Tupana wakáraꞌari rilaꞌaká nakaje marí ejaꞌawá chu iꞌimaká”, raú iná weꞌepí Tupana waꞌatéjena neká.
24 Ñaké iꞌimakale, aꞌá inakojó Tupana purákaꞌalo, aꞌaká rinakojó iꞌimaká, ikeñoꞌoká raꞌapiyá jemaꞌakana wakajé eyá, ke kaja. Raú iká iꞌimajeño ñakeja wani pajluwa japi keja Tupana waꞌaté, eyá ñaké kaja Riꞌirí waꞌaté.
25 Jesucristo aꞌarí wajló kajmuchaji, weꞌemakáloje matajnako jeꞌechú chu raú. Rimaká wanaku iꞌimaká ke, ke raꞌajika wajló riká.
26 Marí ke nulanaꞌaká ijló, jemaꞌaká piyá ijwaꞌaté pajlákaño jaꞌapiyá.
27 Jesucristo aꞌarí raꞌapiyá jemaꞌajéñojlo Ripechu. Riká jewíñaꞌatari iká piyukeja kewákaje purákaꞌaloji nakú. Iyuró ñakeja Ripechu jaꞌapiyá; rewíñaꞌataka iká ke ilaꞌá piyukeja nakaje palá.