1 JUAN
Kajmuchaji iná iꞌimakare aú matajnako jeꞌechú chu yukuna marí
1
Inaꞌuké Jesucristo iꞌimaká. Unká chiyó ejaꞌawá iꞌimá, kaja riꞌimaké. Riꞌimaká marí ejaꞌawá chu wakajé wamá riꞌimaká; wemaꞌá kaja ripuraꞌakó; wajapa kaja rinaku wayátheꞌela aú iꞌimaká. Riká penájemi aꞌarí inajlo kajmuchaji iná iꞌimakáloje matajnako jeꞌechú chu raú.
2 Puꞌuwaká riꞌimaká wajló aú wamá riꞌimaká, ñakele weꞌemá riyukuna ajopánajlo. Unká tajnákajo penaje kalé riká wemá nakú. Tupana waꞌaté riꞌimá iꞌimaká, eyá puꞌuwaká riꞌimaká marí ejaꞌawá chu.
3 Riká wamákare yukuna weꞌemá ijló, eyá Ripurákaꞌalo, rimakare nakú wajló, waꞌapata kaja ijló, ipechu iꞌimakáloje rinaku wapechu iꞌimaká rinaku ke kaja. Tupana pechu chuwá wapechu; Riꞌirí Jesucristo pechu chuwá kaja wapechu, raú pajluwa japi keja weká pajwaꞌatéchaka. Ñaké kaja ipechu iꞌimakáloje penaje weꞌemá riyukuna ijló.
4 Riyukuna walanaꞌá ijló, ipechu iꞌimakáloje rinaku puꞌují wajwaꞌaté.
5 Tupana yukuna, Jesucristo iꞌimakare wajló iꞌimaká, waꞌapata kaja ijló. Riká kemari Tupana nakú: “Unká méñoꞌojo kalajeruni iꞌimalá mejámaꞌatani waꞌaté pajñakani. Ñaké kaja Tupana, palá laꞌajerí riká, ñakele unká riweꞌepila puꞌuwaré laꞌakaná”.
6 Apala wemá kaꞌajná wanakuwá: “Tupana Pechu chuwá wapechu”, ke. Eꞌiyonaja puꞌuwaré laꞌakaná nakú ja kaꞌajná weká. Ilé ke laꞌajeñó weꞌemakachu, mapeja wapajlaka wanakuwá.
7 Palá laꞌaká Tupana. Ñakele walaꞌaká aú palá ripalamane aú, weꞌemá pajluwa japi keja rijwaꞌaté. Ñakele ripalamane aú walaꞌá kaja palá, rilaꞌaká ke kaja, panakojéchaka ke wapechu iꞌimakale Tupana iꞌirí Jesucristo pechu waꞌaté. Riká takaꞌarí aꞌawaná apiyákakanami nakojé wachaya iꞌimaká. Riwakajé kajrú rira iꞌijnaká itapuwa aphumi chiyá iꞌimaká. Ilé ke ritaꞌaká wapumí chojé, puꞌuwaré walaꞌakare pachá, ripalamane wayuríkoloje unká japi laꞌalaño puꞌuwaré ke Tupánajlo.
8 Apala pimá kaꞌajná pinakuwá: “Unká nulaꞌalá puꞌuwaré”, ke, pipechu iꞌimakale: “Kewaka numakare nunakuwá”. Eꞌiyonaja unká kewaka kalé riká, Tupana kemakale piyukeja inaꞌukena nakú: “Puꞌuwaré laꞌajeñó waja neká”, ke.
9 Pimakachu pinakuwá: “Kewaka puꞌuwaré laꞌajerí nuká, Tupana kemaká nunaku ke”, e riweꞌepeje pimuꞌují. Ramajo pichaje puꞌuwaré pilaꞌakare liyá, raú piꞌimajé unká japi laꞌalá puꞌuwaré ke rijló.
10 Pimá kaja kaꞌajná pinakuwá: “Unká nulaꞌalá puꞌuwaré”, ke. Ilé ke pimaká pinakuwá aú, pilaꞌá Tupana pajlákachi ke pijluwa, unkale pemaꞌalá Ripurákaꞌalo jaꞌapiyá, Ripurákaꞌalo kemakale piyukeja inaꞌukena nakú: “Puꞌuwaré laꞌajeñó waja neká”, ke.