2 PEDRO
Marí ke Pedro lanaꞌaká piño purákaꞌaloji Jesucristo jaꞌapiyá jemaꞌajéñojlo
1
Jesucristo wakáraꞌakarena riyukuna iꞌimajé nakiyana nuká; rijwaꞌaté jápajeri kaja nuká. Nulanaꞌaká ijló marí purákaꞌaloji, ipechu iꞌimakale kaphí Tupana chojé, wapechu iꞌimaká richojé ke kaja. Iná pechu iꞌimakachu kaphí richojé, palani wani inajlo riká. Nakaje palá nojé marí ejaꞌawá chu iꞌimakare, riká chaje wani palaka wajló riká. Wachiꞌinárikana Tupana. Weꞌematájeri Jesucristo, unká laꞌalare puꞌuwaré riká.
2 Nuwata rilaꞌaká inaku palá wani; nuwata kaja rilaꞌaká palá ipechu. Rilaꞌá iná palá wani, iná jemaꞌaká aú richaje, richájeno ke Tupana, wawakáraꞌajeri Jesucristo waꞌaté, jaꞌapiyá.
Tupana Pechu palamane aú iná jemaꞌá raꞌapiyá. Marí riyukuna
3 Tupana, piyukeja nakaje laꞌajerí, aꞌarí wajló Ripechu, walaꞌakáloje piyukeja nakaje riwátaka ke raꞌapiyá jemaꞌakana aú.
4 Weꞌemakáloje riká ke penaje raꞌá wajló Ripechu. Marí ke wajló riká, waweꞌepíkale Jesucristo jaꞌapiyá iꞌimakana nakojé, raú weꞌemaó puꞌuwaré laꞌakaná liyá.
5 Kaphí péchuruna iká Jesucristo chojé, Tupana purákaꞌalo chojé waꞌaté. Ñakele ipechu lokópaꞌala ilaꞌajika marí ke: Ilaꞌá ipéchuwa kaphí, iꞌimakáloje palá laꞌajeñó penaje. Waꞌaté kaja aꞌá Ripurákaꞌalo inakojó, iweꞌepíkaloje palá laꞌakaná nakojé raú penaje.
6-7 Waꞌaté iyurí iliyó ipechu keja laꞌakana; waꞌaté ijñaꞌá kachuwa kaje panaku; waꞌaté iweꞌepí itukumó Tupana wátaka ke laꞌakana; waꞌaté iweꞌepí khaí ajopana Jesucristo jaꞌapiyá jemaꞌajeño nakú. Iwata kaja íkiꞌija Tupana, ajopana inaꞌukena waꞌaté.
8 Pajimato rilaꞌakana aú palá laꞌajeñó iká, unká mapéjaruna kalé iká Tupánajlo ilé ke laꞌakana aú. Raú kaja unká mapeja kalé jemaꞌaká wawakáraꞌajeri Jesucristo yukuna.
9 Eyá unká laꞌalaño numaká ke, unká weꞌepílaño rinakojé keja neká. Tupana kaꞌarí nanakiyá puꞌuwaré nalaꞌakare, raú rilaꞌá palá neká, eꞌiyonaja kalé napechu kapicháñaa riká.
10 Nojena, Tupana iꞌiwapakárena rijluwa iká. Ñakele iꞌimá wéchiruna nakaje riwátaka ke laꞌakana nakú, raú iweꞌepeje riꞌiwapakárena nakiyana joꞌó iká. Numakare nakú laꞌakana aú, unká iyurílaje raꞌapiyá jemaꞌakana.
11 Ilé ke laꞌakana aú Tupana kemájeri inaku, imujlúkaꞌakaloje wawakáraꞌajeri, weꞌematájeri kaja Jesucristo iꞌimaká ejo, iꞌimakáloje matajnako rijwaꞌaté penaje.
12 Jemaꞌakáloje palá raꞌapiyá penaje, pulapeno ke nuꞌumaká ijló riyukuna iweꞌepika rinakojé eꞌiyonaja. Kaja kaphí ipechu kewákaje purákaꞌaloji chojé. Ipechu kapicháñaaka piyá riká, nuꞌumá piño ijló riyukuna meꞌetení.
13 Nuꞌumajika ejaꞌawá chu ketana nulaꞌajika jenakú, ipechu kapicháñaaka piyá raꞌapiyá jemaꞌakana. Noꞌó nunakojó ilé ke laꞌakana.
14 Kaja wawakáraꞌajeri Jesucristo aꞌá nojló puꞌuwaká, nuweꞌepíkaloje unká nuꞌumalaje júpija re joꞌó kaja marí ejaꞌawá chu.
15 Ñakele nulaꞌá nupechu ejé, nuyuríkaloje marí purákaꞌaloji ijló, ipechu kapicháñaaka piyá riká nutakaꞌajíkaja ejomi.
16 Piyuke laꞌaká nakaje Jesucristo. Riká yukuna weꞌemá ijló; weꞌemá kaja ijló ripaꞌajiko piño majó yukuna. Unká mapeja kalé wakeñoꞌota riyukuna wapechu keja, weká amaño wawakáraꞌajeri laꞌaká piyukeja wani nakaje iꞌimaká.
17 Weꞌemaká ipuré jiꞌiwata nakú rijwaꞌaté iꞌimaká wakajé, Tupana wakáraꞌari kajrú mejámaꞌatani rawaꞌó iꞌimaká. Wamákare riꞌimaká, palá wani Tupana puraꞌakó rinaku jeꞌechú chiyá, rimá: “Marí nuꞌurí, íkiꞌija nuwátakare, puꞌují wani nupechu rinaku”.
18 Ilé ke wemaꞌaká ripuraꞌakó rijwaꞌaté jeꞌechú chiyá iꞌimaká. Palani wani rapukuna iꞌimaká, Tupana iꞌimakale re.
19 Ripurákaꞌalo lanaꞌakéjami kemaká rinaku, ke wamaka riꞌimaká. Ñakele aꞌá inakojó Ripurákaꞌalo, raꞌapátajeño michuna lanaꞌakare iꞌimaká. Kewaka riká; riꞌimá palá wani wajló Jesucristo yukuna, waweꞌepíkaloje rinakojé raú penaje.
20 Iweꞌepí marí: Unká Tupana purákaꞌalo jaꞌapátajeño michuna lanaꞌaké Ripurákaꞌalo napechu keja; unká kaja nalanaꞌaké riká, naweꞌepíkare rinakojé ke;
21 unká kaja naꞌapátake riká ajopánajlo, nawátajika keja. Tupana Pechu kemájika najló, ke naꞌapátajika najló riyukuna.