1 PEDRO
Purákaꞌaloji Pedro wakáraꞌakare Jesucristo jaꞌapiyá jemaꞌajéñojlo marí
1
Jesucristo wakáraꞌakarena riyukuna iꞌimajé nakiyana Pedro iꞌimaká. Riká lanaꞌarí Jesucristo jaꞌapiyá jemaꞌajeño, ajopana teꞌeré nakojé iꞌijnakáñojlo, marí ke: Re inakiyana Ponto e, Galacia e, Capadocia teꞌeré e, Asia teꞌeré e, eyá Bitinia teꞌeré nakú.
2 Kaja Tupana iꞌiwapá rijluwa iꞌimaká, júpimi ripechu nakú riꞌimaká ke. Raꞌá ijló Ripechu iꞌimaká, jemaꞌakáloje raꞌapiyá penaje. Jesucristo takaꞌaká wachaya iꞌimaká wakajé, kajrú rira iꞌijnaká itapuwa aphumi chiyá. Ilé ke Tupana wajaka riꞌimaká wapumí chojé, raú weꞌemakáloje unká japi laꞌalaño puꞌuwaré ke rijló. Eko iꞌimá palá wani ilérowa pajwaꞌatéchaka Tupana palamane.
Jeꞌechú chu iꞌimajíkaño yukuna marí
3 Wapuraꞌachó palá wani Tupana, wawakáraꞌajeri Jesucristo jaraꞌapá nakú, riweꞌepíkale wamuꞌují. Jesucristo makápoꞌoko piño iꞌimaká aú, raꞌá wajló wajé iꞌimakaje. Riká laꞌarí kaphí wapechu wajló, waweꞌepíkale ñaké kaja rimakápoꞌotajika weká.
4 Raú waweꞌepí raꞌajé kaja wajló nakaje rilamáꞌatakare wapé jeꞌechú chu. Nakaje rilamáꞌatakare wajló unká kapichálajo, unká kaja puꞌuwaré kaje iꞌimalá re. Ñakeja wani nakaje iꞌimajika palá rewá.
5 Kaphí ipechu iꞌimakale Tupana chojé, raꞌá rinakojó iká, piyukeja laꞌajerí riꞌimakale. Riꞌimatá kaja iká kapichákajo liyá, júpimi ripechu nakú riꞌimaká ke. Ñakele riꞌimajé ijló ñaké, kaja penaje ejaꞌawá iphájika rená chojé wakajé.
6 Ilé ke nakaje iꞌimajíkale ijló, ipechu iꞌimá puꞌují riweꞌepíkana aú. Apú eyá ke amájika chapú kaje yajwé, eꞌiyonaja ipechu iꞌimá puꞌují.
7 Nataꞌaká oro (uwiru) keraꞌathani aú, naweꞌepíkaloje oro wánika riká penaje, puꞌuwareni reꞌiyá iꞌimakare jáchoꞌokoloje, nakupákaloje riká reꞌiyayá penaje. Ke kaja Tupana atáꞌaka weká chapú kaje yajwé amákana aú, ramákaloje kewaka wánika kaphí wapechu richojé. Kaphí péchuruna richojé ñaꞌañó panaku piyukeja chapú kajé yajwé namákare, raú oro wemí chaje palaka neká Tupánajlo. Ilé ke ratáꞌajika rijwaꞌatéjena, raú riweꞌepíkaloje mékajenaka kewaka wani kaphí péchuruna richojé. Neká nakú rilaꞌajé palá, Jesucristo iphájika majó wakajé.
8 Kajrú wani iwátaka Jesucristo, unká joꞌó amala riká eꞌiyonaja; kaphí ipechu richojé, unká amala riká eꞌiyonaja. Puꞌují wani ipechu rinaku, eꞌiyonaja unká wani purákaꞌaloji iꞌimalá, imakáloje rijló rinaku ñaké.
9 Puꞌují ipechu, iweꞌepíkale Tupana iꞌimatájika iká kapichákajo liyá.
10 Kajrú Tupana purákaꞌalo jaꞌapátajeño michuna jewíñaꞌako mékeka Tupana iꞌimatájika inaꞌuké kapichákajo liyá nakú iꞌimaká. Napuraꞌó kaja naka Tupana aꞌajika ripalamane aú iꞌimakáñojlo.
11 Unká chiyó Jesucristo iphá majó iꞌimaká, rewíñaꞌatake Ripechu aú ripurákaꞌalo jaꞌapátajeño michuna, naweꞌepíkaloje mékeka rijñaꞌajika chapú kaje yajwé panaku, eyá mékeka palá wani riꞌimajika rijló rejomi. Nawátake kaja weꞌepíkana na inaꞌukeka riꞌimaká, eyá na wakajeka nakaje rimakare nakú iꞌimajika nakojé.
12 Tupana Pechu aꞌarí najló puꞌuwaká, naweꞌepíkaloje unká najlúwaja kalé neꞌemaké ripurákaꞌalo yukuna. Ajopánajlo penaje neꞌemaké riyukuna, ñakele napurákaꞌalomi yuró wajló penaje. Tupana wakáraꞌari Ripechu jeꞌechú chiyá chaꞌapá inaꞌukena eꞌiyajé iꞌimaká. Neká penájemi jaꞌapátaño mékeka Tupana iꞌimataka inaꞌuké kapichákajo liyá yukuna. Palani riyukuna. Rijwaꞌatéjena, jeꞌechú chiyájena, wátaño kaja rinakojé weꞌepíkana.
13 Ñakele iꞌijnatá ipéchuwa palá nakaje ilaꞌajíkare nakú, ilaꞌakáloje palá raú. Ilaꞌá kaphí ipéchuwa, Tupana laꞌajíkale inaku palá wani Jesucristo iphájika majó wakajé.
Tupana wátaka weꞌemaká palá iꞌimakaño yukuna marí
14 Tupana yaní iꞌimakale, jemaꞌá palá raꞌapiyá. Ñakele ilaꞌaniña nakaje puꞌuwaré, júpimi ilaꞌajika, unká chiyó iweꞌepí Tupana nakojé, ke.
15 Lanakiya, iꞌimá chuwa palá laꞌakaná nakú, Tupana unká laꞌalá puꞌuwaré waꞌatéjena iꞌimakale.
16 Ripurákaꞌalo kemari: “Iꞌimá palá laꞌakaná nakú, palá laꞌajerí wani nuꞌumakale”.
17 Rejenowaja Tupana kemájika wanaku mékeka rijló nakaje walaꞌakare iꞌimaká. Mékeka walaꞌaká rijló nakaje iꞌimaká lokópaꞌala rilaꞌajé wanaku palá kaꞌajná, chapú kaꞌajná. Ñakele imájika ee rinaku: “Waraꞌapá riká”, ke, iphá raꞌapí, marí ejaꞌawá chu iꞌimajika ketana.
18 Kaja iweꞌepí Tupana iꞌimataka iká pajlakaje purákaꞌaloji, ichiꞌiná michuna kemájikare nakú ijló iꞌimaká, liyá. Ñakele unká na penaje napurákaꞌalomi iꞌimalá chuwa. Kajrú Jesucristo aꞌaká iwemí iꞌimaká, riꞌimatákaloje iká kapichákajo liyá. Unká raꞌalá iwemí nakaje mapeja kapichako: oro, plata, kaje aú.
19 Jesucristo aꞌarí weꞌematákana wemí rira, iꞌijnakare itapuwa aphumi chiyá nenoka riꞌimaká wakajé, aú. Riká nenó puꞌuwaré walaꞌakare chaya, unká rilaꞌalá puꞌuwaré iꞌimaká eꞌiyonaja.
20 Unká chiyó Tupana keñoꞌota ejaꞌawá iꞌimaká, rimá Jesucristo nakú iꞌimaká, ritakaꞌakáloje inaꞌuké chaya penaje. Kaja riphá majó iꞌimaká, rilaꞌakáloje inaku palá wani penaje.
21 Jesucristo, Tupana makápoꞌotakare iꞌimaká penájemi, palamane aú jemaꞌá palá Tupana jaꞌapiyá iꞌimaká. Ripalamane kaja ipechu kaphí Tupana chojé. Nakaje rimakare nakú ijló iꞌimajeri ñaké.
22 Aꞌakale inakojó kewákaje purákaꞌaloji aú, ikaꞌá inakiyó puꞌuwaré kaje ipechu nakú iꞌimakare, iꞌimakáloje palá péchuruna penaje. Ñakele iwata chuwa íkiꞌija ajopana Jesucristo jaꞌapiyá jemaꞌajeño. Numá piño ijló, iwátakaloje íkiꞌija pekowáaka piyukeja ipechu aú, nakaje ilaꞌakare aú waꞌató.
23 Chuwa, wajé péchuruna iká, Tupana leꞌejena iꞌimakale. Ripurákaꞌalo aꞌakana inakojó aú, riyani iká. Unká tajnákajo penaje kalé Tupana, ñakele unká tajnákajo penaje kaja kalé iꞌimajika.
24 Tupana purákaꞌalo kemari inaꞌuké nakú:
“Meketánaja jimichi iꞌimaká, rejomi rimeríyaꞌo.
Ñaké kaja riwí, meketánaja riká, rejomi riwijíñoꞌo.
Rejomi rikujrúkaꞌato piyuke.
Ñaké kaja piyukeja nakaje inaꞌuké laꞌakare iꞌimajika meketánaja.
25 Eyá Tupana purákaꞌalo, unká ñaké kalé.
Ñakeja wani riꞌimajika matajnako”.
Piyukeja Tupana purákaꞌalo, rimakare nakú iꞌimaká, wanakiyana jaꞌapata ijló, jemaꞌakáloje raꞌapiyá penaje. Ñakele jemaꞌakale raꞌapiyá, iꞌimajé matajnako jeꞌechú chu ripalamane.