Meke nakaje iꞌimajika kajrú leꞌejepelárunajlo yukuna marí
5
Chuwa jemaꞌá marí, kajrú leꞌejepeláruna: iyá, awíyoꞌo kaja, kajrú wani amájikale chapú kaje yajwé.
2 Piyukeja nakaje ikapi iꞌimakare meꞌetení, kapichájiko. Eyá aꞌarumaká, aꞌajnejí waꞌaté, piꞌiréjina ajñátaje piyuke.
3 Eyá iliñérute lurútaꞌajero kaja. Riká aú naweꞌepeje ijlúwaja ilamáꞌatajika iliñérute iꞌimaká. Pachá keraꞌathani kapichátaka nakaje, ke kaja ikapichájiko, kajrú wani awakátajikale ijlúwaja nakaje iꞌimaká.
4 Eyá unká kaja aꞌalá palá imena eꞌiyá jápajeñojlo najápakaꞌala wemí, raú napuraꞌó inaku. Riká napuraꞌakaro inaku, Tupana piyukeja wani laꞌaká nakaje, jemaꞌarí nakaje nemakare nakú.
5 Marí ejaꞌawá chu kajrú iliñérute, raú ilaꞌá maare mapeja iwátaka ke. Palá nalamáraꞌajeño lamáraꞌaka jémana, napitakó kajrú ejomi nenókaloje neká. Ñaké kaja ipitaká ijluwa nakaje, Tupana wajákaloje iká ripachá.
6 Ipurákaꞌalo aú nawajá ajopana, eyá neꞌiyajena nenó kaja, unká meke nalaꞌalá eꞌiyonaja. Eꞌiyonaja unká meke nalaꞌalá nanakojó iká.
Ilaꞌaká piyá tuꞌujné ipéchuwa yukuna marí
7 Eyá iká, nojena, ilaꞌaniña ikó tuꞌujné nakaje nakú, aꞌajná Jesucristo paꞌajiko piño majó ejená. Kaja iweꞌepí mékeka nakaje icha ijí ejátajeri wátaka kachuwa kaje nakú, nakaje rejátakare arúkaꞌaka ejená. Rejomi kachuwa kaje nakú kaja riwata ritawáꞌako, aꞌajná rarúkaꞌaka ejená. Yawijá ketana riwátaka riká kachuwa kaje aú, rarúkaꞌaka ejená. Rejomi rijñaꞌá palá nojé richa.
8 Ñaké kaja iꞌimá: ilaꞌaniña ikó tuꞌujné, aꞌajná Jesucristo paꞌajiko majó ejená. Kaphí ipechu iꞌimá, yewicha ripaꞌakó majó jená.
9 Nojena, akhaꞌaniña mapeja ajopana maná, Tupana wajaka piyá iká ripachá. Riká kemájeri piyuke inaꞌukena nakú mékeka nalaꞌakana iꞌimajika, nakaje nalaꞌakare lokópaꞌala.
10 Nojena, ilaꞌá mékeka Tupana purákaꞌalo yukuna iꞌimajeño michuna laꞌaká iꞌimaká ke. Kajrú namaka chapú kaje yajwé, eꞌiyonaja unká nayurila Ripurákaꞌalo yukuna iꞌimakana najló.
11 Ilé ke laꞌakaño nakú wemá: “Palá péchuruna neká”, ke. Chapú ajopana laꞌaká neꞌemaká eꞌiyonaja, unká nayurila Tupana jaꞌapiyá jemaꞌakana. Kaja jemaꞌá Job michú yukuna meke ramaka kajrú chapú kaje yajwé iꞌimaká eꞌiyonaja, unká riyurila Tupana chojé kaphí ripéchuwa laꞌakaná. Iweꞌepí kaja meke Tupana laꞌaká rinaku palá wani kaja penaje iꞌimaká. Raú iná weꞌepí kajrú wani Tupana weꞌepika khaí, chapú kaje yajwé amájeño nakú.
12 Nojena, marí numájikare ijló meꞌetení nakú nuwata wani jemaꞌaká raꞌapiyá: Aꞌaniña Tupana ií mapeja, raú ajopana weꞌepíkaloje kewákaka imaká najló; aꞌaniña kaja teꞌerí ií, raú naweꞌepíkaloje kewákaka imaká najló; aꞌaniña apú nakaje ií, raú naweꞌepíkaloje kewákaka imaká. Imájika ee “aꞌa”, ke, kaja keja riꞌimare. Eyá imájika ee “unká”, ke, kaja keja riꞌimare, Tupana wajaka piyá iká.
13 Apala pajluwa inakiyana pechu iꞌimajika ee kamuꞌují, ripuraꞌaro Tupana waꞌaté. Eyá puꞌují ripechu iꞌimajika ee, ratanere rijló.
14 Pajluwa inakiyana iꞌimajika ee ritami, iwaꞌa Jesucristo jaꞌapiyá jemaꞌajéñojlo, napuraꞌakóloje rinaku Tupana waꞌaté. Raú Tupana ií aú nakhoꞌojé nakaje jilami rinakojé, ritejmoꞌotákoloje penaje.
15 Kaphí péchuri iná iꞌimakachu Tupana chojé, iná puraꞌó rijwaꞌaté natámina nakú, ritejmoꞌotákaloje neká penaje. Eyá ramajo kaja nachaje puꞌuwaré nalaꞌakare liyá.
16 Ñakele iꞌimá pajlokaka puꞌuwaré ilaꞌakare yukuna, ipuraꞌakóloje Tupana waꞌaté rinaku pacháyakaka, raú Tupana amajo ichaje. Palá péchuri puraꞌakochu Tupana waꞌaté, raꞌá rinakojó ripurákaꞌalo.
17 Ñaké riꞌimaká Elías, Tupana purákaꞌalo jaꞌapátajeri michujlo. Weká ke kaja riꞌimaká. Riká puraꞌaró Tupana waꞌaté iꞌimaká, juni jaꞌakó piyá, raú inaꞌuké pechu pajnoꞌokóloje Tupana ejo. Ñakele unká wani juni jaꞌaló weji kele jarechí, eyá apú peꞌiyojé ketana.
18 Rejomi ripuraꞌó piño Tupana waꞌaté, juni jaꞌakóloje penaje. Reyá aꞌajná ñoꞌojó nakaje icha ijí nejátakare iphari piño. Riká arúkaꞌari piño rapumí chuwá.
19 Nojena, apala pajluwaja inakiyana yureje riliyó Tupana wátaka ke laꞌakana. Raú kaꞌajná ipuraꞌajó rijwaꞌaté, remaꞌakáloje piño raꞌapiyá penaje.
20 Iweꞌepí marí: Apú yuríkachu puꞌuwaré laꞌakaná riliyó ipurákaꞌalo aú, riꞌimatá riká kapichákajo liyá. Raú Tupana amajo kaja richaje kajrú puꞌuwaré rilaꞌakare liyá.
Kaja.