HEBREOS
Tupana iꞌirí jaꞌapátaka wajló Tupana purákaꞌalo yukuna marí
1
Júpimi Tupana wakáraꞌa naꞌapátaka Ripurákaꞌalo waꞌajútaya michúnajlo iꞌimaká. Pulapé ripuraꞌajiko najwaꞌaté: neꞌiyajénajlo rimaké nakaje nakú natapú chu, eyá neꞌiyajénajlo rimaké rinaku Ripechu aú ja.
2 Eyá weká, kaja penaje iꞌimakaño, jemaꞌañó riyukuna, Tupana iꞌirí jaꞌapátakale wajló iꞌimaká. Riká jaꞌapiyá weká meꞌetení. Riꞌirí waꞌaté Tupana keñoꞌota piyukeja wani nakaje iꞌimaká. Raꞌá kaja riꞌimaká, riꞌimakáloje piyukeja nakaje minárikana penaje.
3 Palájneꞌeke wani Tupana, piyuke wani laꞌajerí kaja riká. Riká ke kaja Riꞌirí; Raraꞌapá pechu keja kaja ripechu. Piyuke nakaje ejaꞌawá chu iꞌimakare, jeꞌechú chu iꞌimakare waꞌató, iꞌimari ñaké ke Ripurákaꞌalo aú. Riꞌirí iꞌimaká marí ejaꞌawá chu wakajé, ritakaꞌá aꞌawaná apiyákakanami nakojé wachaya, rikaꞌakáloje puꞌuwaré walaꞌakare waliyá. Ritakaꞌaká ejomi, ripaꞌó piño rapumí chuwá jeꞌechú chojé. Re Tupana aꞌá riká rijwaꞌaté wakáraꞌajeri penaje.
Tupana waꞌatéjena, jeꞌechú chiyájena, chaje wani Riꞌirí. Marí riyukuna
4 Ajopana Tupana waꞌatéjena, jeꞌechú chiyájena (ángeles), chaje wani Jesucristo, Tupana iꞌirí riꞌimakale.
5 Iná weꞌepí nachaje riká, Tupana kemakale marí ke Riꞌirijlo iꞌimaká:
“Chuwa, inaꞌuké weꞌepíjika Nuꞌurí piká, eyá nuká Paraꞌapá.
Unká rimalá ñaké rijwaꞌatéjena, jeꞌechú chiyájena, nakiyana nakú.
Riꞌiríjloja kalé rimá ilé ke iꞌimaká”.
6 Tupana wakáraꞌari Riꞌirí ejaꞌawá nakojé iꞌimaká, rimothoꞌokáloje marí ejaꞌawá chu penaje. Riwakáraꞌaka riká majó yámona, rimá rijwaꞌatéjena, jeꞌechú chiyájenajlo, marí ke iꞌimaká: “Iphá raꞌapí, ichaje wani riꞌimakale”.
7 Tupana kemari kaja nanaku:
“Nujwaꞌaté jápajeño neká.
Nowíñaꞌata neká karená, keraꞌathani waꞌaté, laꞌaká nakaje ke, nalaꞌakáloje nojló nakaje raú penaje”.
8 Eyá rimá Riꞌirijlo:
“Piká iꞌimajeri inaꞌuké Chiꞌinárikana; neꞌemakana penaje piꞌimajika.
Nawakáraꞌajerija piꞌimajika ñakeja.
Nalaꞌakáloje palá penaje piwakáraꞌaje neká.
9 Kajrú wani piwátaka nalaꞌaká palá,
eyá unká piwátala nalaꞌaká puꞌuwaré.
Ñakele noꞌó piká, piꞌimakáloje ajopana pijwákeꞌena chaje wakáraꞌajeri penaje”,
ke Tupana kemaká rijló iꞌimaká.
10 Rimá piño Riꞌirijlo:
“Piká, nawakáraꞌajeri, keñoꞌótari ejaꞌawá, jeꞌechú waꞌaté iꞌimaká.
Piyukeja nakaje richu iꞌimakare waꞌató, pikeñoꞌota kaja iꞌimaká.
11 Piyukeja nakaje pikeñoꞌótakare iꞌimaká tajnájero.
Aꞌarumakaji jupichumi tajnako, ke kaja ritajnájiko.
Eyá piká, unká tajnákajo penaje kalé iꞌimajika piká.
12 Piká nójeri pachájechaka nakaje pikeñoꞌótakare,
iná noka pachájechaka aꞌarumakaji ke.
Iná apiyákaka aꞌarumakaji, ke kaja papiyájika nakaje pikeñoꞌótakare.
Eyá piká, unká wani apiyákalajo.
Ñakeja piꞌimajika matajnako”,
ke Tupana kemaká Riꞌirijlo.
13 Rimá piño rijló:
“Nowaꞌá piꞌimajé, piwakáraꞌakaloje nujwaꞌaté penaje.
Aꞌajná nucháꞌatajika chapú pinaku péchuruna ejená, piwakáraꞌaje nujwaꞌaté maare”.
Rijloja kalé rimá ñaké iꞌimaká,
eyá rijwaꞌatéjena, jeꞌechú chiyájena nakiyánajlo, unká rimalá ñaké.
14 Tupana waꞌatéjena, jeꞌechú chiyájena, péchujija neká. Rijwaꞌaté jápajeño neká; riwakáraꞌa neká ejaꞌawá chojé, naꞌakáloje inaꞌuké ñathé napechu aú, raꞌapiyá jemaꞌakana aú.