SANTIAGO
Marí purákaꞌaloji Santiago lanaꞌakare
1
Tupana, Jesucristo waꞌaté, jápajeri nuká. Wawakáraꞌajeri wani Jesucristo. Eko palá ijló kaꞌajnó. Iyamá iphata jiꞌimaji nakojé kele (12) iká Israel michú aꞌajútaya michuna iꞌimaká, rilakénami iká. Kaja itamákaꞌato paliyáaka apoꞌojó, apoꞌojó ke, ajopana teꞌeré nakojé.
Péchuji Tupana aꞌakare inaꞌukejlo yukuna marí
2 Nojena, ipechu iꞌimá puꞌují piyukeja chapú kaje yajwé amákare aú.
3 Kaja iweꞌepí chapú kaje yajwé amákana aú iná weꞌepí mékeka iná pechu Tupana nakú.
4 Ilaꞌá ipéchuwa kaphí rijló, jáchoꞌoko piyá raꞌapiyá iꞌimakana chiyá. Ijñaꞌá ilé kaje chapú kaje yajwé panaku, raú ipechu iphátaje Tupana wátaka ke laꞌakana. Raú iꞌimajé palá laꞌakaná nakuja reyá aꞌajná ñoꞌojó.
5 Re kaꞌajná inakiyana, unká weꞌepila na penájeka iná amaka chapú kaje yajwé. Ilé kajénajlo numá: Ikejaꞌa Tupana liyá weꞌepíkaje, raú raꞌajé ijló riká, iweꞌepíkaloje na penájeka iná amaka chapú kaje yajwé penaje. Kajrú Tupana aꞌaká iná ñathé, unká rakhaꞌalá iná, iná puraꞌakochu rijwaꞌaté.
6 Riwata pipechu iꞌimaká kaphí richojé, pikejáꞌajika ee nakaje riliyá. Unká riwátala pipechu iꞌimaká nakaje pikejáꞌakare riliyá nakú: “¿E kaꞌajná riꞌimajika nojló ñaké, unká kaꞌajná?” Ilé ke pipechu iꞌimajika ee, juni yokola, mapeja karená yokoꞌokare, ke pipechu iꞌimajika ijló.
7 Ilé ke riꞌimajika ee, pipechu iꞌimaniña: “Tupana laꞌajé nojló nakaje nukejáꞌaka riliyá”, ke.
8 Unká nakaje iꞌimalaje palá keꞌiyapé péchurunajlo. Kaja chuwajá ke, neꞌejnataka napéchuwa palá nakaje nakú, eyá muní ke, apoꞌojó kaja napechu.
9 Apala kamuꞌují laꞌajerí kaꞌajná, pajluwa Jesucristo jaꞌapiyá jemaꞌajeri. Rapáñaꞌaniño raꞌapiwá, kamuꞌují rilaꞌakale, palá Tupana pechu iꞌimakale rinaku.
10-11 Eyá apú kaꞌajná, kajrú wani leꞌejepelari. Riweꞌepíjika ee unká na penaje rileꞌejépela iꞌimalá Tupánajlo, palani unká rapáñaꞌalo raꞌapiwá, riweꞌepíkale rinakuwá kamuꞌují laꞌaká ke. Aꞌawaná iwí iꞌimaká, ke waja piyukeja kajrú leꞌejepeláruna. Kaphí wani kamú kamaré pataká ejéchami, rimeríyaꞌata piyuke aꞌawaná iwí. Riká aú ripalacha kapichó. Ñaké kaja kajrú leꞌejepeláruna iꞌimajika meketánaja. Najápakaꞌala laꞌakaná nakú jimaje natajnajo.
Nájeka inaꞌuké laꞌaká puꞌuwaré yukuna marí
12 Puꞌují péchuri ñaꞌarí chapú kaje yajwé panaku, kaphí ripechu iꞌimakale Tupana chojé. Ilé ke ripechu iꞌimakale rinaku, riꞌimajé palani rijló. Raú Tupana aꞌajé rijló iꞌimakaje, riꞌimakáloje rijwaꞌaté matajnako. Riká iꞌimakaje rarukákare piyukeja wátaño rikajlo.
13 Puꞌuwaré laꞌakaná aꞌajika imeꞌé rijluwa wakajé, imaniña Tupana nakú: “Riká wakáraꞌari puꞌuwaré laꞌakaná aꞌaká wameꞌé rijluwa”, ke. Unká puꞌuwaré laꞌakaná aꞌalá Tupana meꞌé rijluwa, ñakele unká kaja meke laꞌajé riwakáraꞌala puꞌuwaré laꞌakaná aꞌaká ajopana meꞌé rijluwa.
14 Marí ke riká wajló: Puꞌuwaré laꞌakaná iꞌimakale wapechu nakú, walaꞌá ñaké.
15 Puꞌuwaré laꞌakaná iphákachu iná pechu nakojé, iná laꞌakáloje ñaké, iná laꞌá puꞌuwaré raú. Eyá kaja wani puꞌuwaré laꞌakaná cháꞌatakachu iná, iná kapichajo ripachá.
16 Nojena, íkiꞌija nuwátakarena, ipechu iꞌimaniña Tupana nakú: “Riká wakáraꞌari puꞌuwaré laꞌakaná aꞌaká wameꞌé rijluwa”, ke.
17 Piyukeja nakaje palani, Tupana liyaje waja riꞌimakale. Riká keñoꞌótari piyukeja nakaje mokoꞌorí jeꞌechú chu. Riká kamareji rikeñoꞌótakare apiyákaro waja, eyá Tupana unká ñaké kalé, unká rapiyákalo.
18 Tupana wátari weꞌemaká riyani, raú raꞌá wajló wajé iꞌimakaje Ripurákaꞌalo jaꞌapiyá jemaꞌakana aú.
Iná laꞌakáloje Tupana purákaꞌalo kemaká ke penaje yukuna marí
19 Nojena, íkiꞌija nuwátakarena, ipuraꞌaniño kajrú wani, ipuraꞌajiko ee ajopana waꞌaté. Palani paineko jemaꞌaká ajopana jaꞌapiyá, jemaꞌakáloje mékeka nawátaka ijló kemakana. Iyúchaꞌaniño kaja mapeja.
20 Yúchaꞌakajo aú unká iná laꞌalá Tupana wátaka ke.
21 Ñakele iyurí iliyó piyukeja puꞌuwaré laꞌakaná. Ilaꞌaniña kaja inakuwá piyukeja nakaje nakojé weꞌepéjeño ke wani. Iꞌimá Tupana purákaꞌalo jaꞌapiyaja. Raꞌapiyá iꞌimajika ee, riꞌimataje iká kapichákajo liyá.
22 Unká paala Tupana purákaꞌalo jemaꞌakánaja kalé; palani rimaká ke laꞌakaná. Unkachu iná laꞌalá rimaká ke, unká na penaje remaꞌakana iꞌimalá inajlo.
23 Unká laꞌalá Ripurákaꞌalo kemaká ke, iꞌimari mapeja kaná chojé nekó amájeño keja.
24 Namaka nekó kaná chojé ejomi, unká naweꞌepila piño mékeka namákana iꞌimichaka. Kaja napechu kapicháñaa nekó weꞌepíkana. Ñaké kaja unká laꞌalaño Tupana purákaꞌalo kemaká ke.
25 Unkachu iná pechu kapicháñaala Ripurákaꞌalo, iná jemaꞌaká riká ejomi, palá iná laꞌaká raú. Riꞌimakachu iná pechu nakuja, iná laꞌá rimaká ke raú, puꞌují kaja iná pechu raú. Ilé ke riꞌimakachu inajlo, Tupana laꞌajé iná palá wani piyuke nakaje iná laꞌakare aú.
26 Apala pajluwa kaꞌajná iꞌijnatari ripéchuwa rinakuwá: “Nuká laꞌarí piyukeja Tupana purákaꞌalo kemaká ke”. Ilé ke ripechu iꞌimaká rinakuwá, eꞌiyonaja kaꞌajná ripuraꞌó puꞌuwaré ajopana nakú. Ilé kaje riꞌimakale, unká na penaje rimakare ilé ke rinakuwá iꞌimalá.
27 Kewaka pimakachu pinakuwá: “Tupana purákaꞌalo kemaká ke laꞌajerí nuká”, marí ke laꞌajerí piká: Majnúrimina ñathé aꞌajerí piká, eyá iwakajílomina ñathé aꞌajerí kaja piká. Namaka chapú kaje yajwé wakajé, paꞌá kaja nañathé. Kaja keja iná laꞌaká palá, iná pechu iꞌimakale Tupana nakú palá. Unká weꞌepílaño riká, laꞌañó puꞌuwaré; palá péchuri rinaku, unká laꞌalá ñaké.