3 Re kaꞌajná neꞌiyajena ilérowa inaꞌuké wajákelana chu. Iweꞌepí nanaku kamuꞌují. Richu iꞌimakela najwaꞌaté, kamuꞌují kaja ipechu iꞌimakajla. Iweꞌepí kaja kamuꞌují, chapú kaje yajwé amájeño nakú, ñaké kaja amákalejla chapú kaje yajwé kaꞌajnó.

4 Kalúyunajlo numá: Iphá palá paꞌapíchaka. Ilaꞌaniña imanáicho ajopana waꞌaté, Tupana wajájikale ilé ke laꞌajeñó.

5 Iwátaniña íkiꞌija liñeru ijluwa; ipechu iꞌimá palá nakaje ikapi iꞌimakare waꞌaté, Tupana kemakale raꞌapiyá jemaꞌajeño nakú: “Unká wani nuyurílaje neká; unká wani kaja noꞌopáñaalaje neká”, ke rimaká wanaku.

6 Ilé kaje laꞌarí wapechu kaphí, raú kalé wemajla wanakuwá:

8 Júpimi Jesucristo iꞌimaká, keja riká meꞌetení; ñakeja kaja riꞌimajika aꞌajná ñoꞌojó chami.

9 Re kajrú purákaꞌaloji apú kaje wani, apoꞌojó wani riká, jemaꞌaniña raꞌapiyá. Apala nemá aꞌajnejí nakiyana nakú, iná ajñaka piyá riká; unká na penaje kalé riká raꞌapiyá jemaꞌajéñojlo. Íkiꞌija Tupana wátaka weká nakojé weꞌepíkana laꞌarí iná pechu kaphí, iná laꞌakáloje palá penaje.

10 Weká, Jesucristo jaꞌapiyá jemaꞌajeño, chaya Tupana iꞌirí takaꞌarí iꞌimaká, riꞌimatákaloje weká kapichákajo liyá penaje. Unká ñaké kalé riká wátaño Tupana iꞌimataka neká kapichákajo liyá Moisés michú purákaꞌalo jaꞌapiyá jemaꞌajéñojlo.

11 Nenoke napirana nakiyana ejomi, purákaꞌaloji lamáꞌatajeño wakáraꞌajeri ñaꞌakeri pirájina írami nakiyana ukapú chojé, nemakare nakú: “Tupana apukuna wani riká”, ke. Chojé rijñaꞌaké nérami, raꞌakáloje riká Tupánajlo puꞌuwaré inaꞌuké laꞌakare chaya penaje. Kéchami najñaꞌaké napirana, nenójikarena tami, pajimila yámajo. Rejo nakáraꞌatake piyuke wani natami.

12 Pajimila yámajo kaja nenó Jesucristo iꞌimaká; rejé nephá riꞌimaká itapuwa aú aꞌawaná apiyákakanami nakojé; re rírami iꞌijnari itapuwa aphumi chiyá. Wapumí chojé ritakaꞌá iꞌimaká.

13 Ñakele rikaja kalé, Jesucristo kalé, yuriro wajló weꞌematájeri. Neꞌiyajena unká wátalaño riꞌimaká, raú nalaꞌá riká chapú. Ñaké kaja kaꞌajná ajopana laꞌajika weká chapú, raꞌapiyá jemaꞌajeño wemaꞌakale.

14 Unká wañakajela wani kalé marí ejaꞌawá weꞌemakare nakú; jeꞌechú chu wañakajela wani. Riká nakú wapechu.

15 Palánijlaka wapuraꞌakelo ñakeja Tupana nakú ajopana waꞌaté, palá rilaꞌakale weká Jesucristo palamane. Ilé ke laꞌakana palani rijló.

16 Ipechu kapicháñaaniña palá laꞌakaná pekowáaka. Aꞌá kaja pajlokaka nakaje kamuꞌují ilaꞌajíkare nakú. Ilé ke laꞌakana palani Tupánajlo.

17 Jemaꞌá jewíñaꞌataño iká Tupana purákaꞌalo nakú jaꞌapiyá. Ñakeja naꞌaká nanakojó iká, nawátakale ipechu iꞌimaká kaphí richojé. Riká kemájeri nanaku mékeka rijló nakaje nalaꞌakare. Jemaꞌajika ee naꞌapiyá, puꞌují napechu iꞌimajika raú; unkaja ke jemaꞌá naꞌapiyá, kamuꞌují napechu laꞌajiko raú. Ilé kaje iꞌimajeri ijló unká paala.

18 Ipuraꞌó Tupana waꞌaté wanaku, ñakeja weꞌemakáloje palá laꞌajeñó penaje, wapechu iꞌimaká piyá wanakuwá: “Apala unká paala walaꞌaká”, ke.

19 Ipuraꞌó kaja rijwaꞌaté, numaláraꞌako piyá ichaje iꞌijnakana nakú.

20 Tupana makápoꞌori wawakáraꞌajeri Jesucristo, íkiꞌija wawátakare. Rileꞌejena inaꞌukena amájeri riká. Wajé purákaꞌaloji jaꞌapiyá weká, ritakaꞌakale wachaya iꞌimaká. Matajnako weꞌemajika raꞌapiyá.

21 Eko Tupana laꞌá ipechu palá. Nuwata raꞌaká ijló piyukeja nakaje riliyá iꞌimakare, ilaꞌakáloje palá riwátaka ke raú; nuwata kaja rilaꞌaká iká palá Jesucristo palamane aú; nuwata kaja inaꞌuké puraꞌakó palá wani rinaku ñakeja wani, kaje nuwata ijló.

22 Nojena, jemaꞌá marí purákaꞌaloji nuwakáraꞌakare ijló jaꞌapiyá. Ilaꞌaniña ipéchuwa tuꞌujné apú nakaje nakú, jemaꞌaká piyá ijluwa riká. Metajlani aú ja nuꞌumá ijló riyukuna.

23 Kaja náchoꞌota Timoteo inaꞌuké wajákelana chiyá. Riphájika ee majó nóchoꞌojiko piyá, riꞌijnajé kaja nujwaꞌaté ichaje. Riwakajé amaje riká.

24 Eko palá jewíñaꞌataño iká Tupana purákaꞌalo nakujlo. Eko palá kaja piyuke Jesucristo jaꞌapiyá jemaꞌajéñojlo. Raꞌapiyá jemaꞌajeño, maare Italia e iꞌimakaño, kemaño kaja inaku: “Eko palá najló kaꞌajnó”, ke.

25 Nuwata iꞌimaká palá Tupana palamane aú.