Jupejé, ajopana teꞌeré ewájena warúwaꞌakeño inaꞌuké nakiyana, najápakaloje najló mapeja. Unká nawarúwaꞌajeño aꞌaké najló najápakaꞌala wemí; aꞌajnejí, aꞌarumakaji, kajeja naꞌakeno najló.

Riwakajé re pajluwa iꞌimari, rií iꞌimari Onésimo. Rikariwate ií iꞌimari Filemón, Jesucristo jaꞌapiyá jemaꞌajeri riꞌimaká. Filemonjlo Onésimo jápake mapeja, unká raꞌaké rijló rijápakaꞌala wemí; unká raꞌaké rijló liñeru. Kaja ewaja Onésimo ataꞌá rikariwate nane nakiyana, raú riñaó reyá, iꞌijnari ají ke yaꞌajnaje pajimila Roma ejo. Re riphata Pablo. Kaja nakaꞌá Pablo inaꞌuké wajákelana chojé, Jesucristo yukuna riꞌimaká ajopánajlo, ajopánajlo ke jimaje. Ñakele re ramá Pablo. Riká iꞌimari Jesucristo yukuna rijló, raú remaꞌá Jesucristo jaꞌapiyá. Ripechu iꞌimá kaphí Jesucristo chojé. Meketánaja riꞌimaká Roma e, rejomi Pablo wakáraꞌari ripaꞌakó rapumí chuwá rikariwate ejo. Rijwaꞌaté riwakáraꞌa marí purákaꞌaloji: