Piyuke Jesucristo jaꞌapiyá jemaꞌajeño laꞌakáloje palá penaje yukuna marí
3
Pimá kaja pijwaꞌatéjenajlo, nemaꞌakáloje piyuke nawakáraꞌajeño jaꞌapiyá. Pimá kaja najló, neꞌemakáloje wéchiruna piyuke nakaje palani laꞌakana nakú.
2 Pimá kaja najló, napuraꞌakó piyá puꞌuwaré inaꞌuké nakú; pimá kaja najló, nakhaꞌákako piyá pajwaꞌatéchaka; pimá kaja najló, neꞌemakáloje inaꞌuké wani piyuke inaꞌuké waꞌaté, eyá nalaꞌaniña nanakuwá ajopana cháꞌatajeño ke piyuke inaꞌuké waꞌaté.
3 Re inaꞌuké nakiyana unká wani napechu iꞌimalá najló palá. Ñaké kaja weꞌemaká júpimi, kapichájeño penájena weꞌemaké wakajé. Puꞌuwaré walaꞌajika; unká paala walaꞌajika; unká kaja wemaꞌaké Tupana jaꞌapiyá; wéchirunaja weꞌemajika puꞌuwaré laꞌakaná nakú; unká inaꞌukélaruna kaja weꞌemajika; chapú kaja wapechu iꞌimajika ajopana inaꞌukena nakú, nacháꞌatajikale weká. Ñaké kaja napechu iꞌimajika wanaku chapú. Ilé kajé aú wapechu iꞌimajika chapú panakuwáaka.
4 Eꞌiyonaja weꞌematájeri Jesucristo weꞌepiri wamuꞌují. Waweꞌepí íkiꞌija wani Tupana wátaka inaꞌuké,
5 aú kalé riweꞌepí wamuꞌují, riꞌimatá weká kapichákajo liyá rijluwa. Unká na kalé walaꞌá palá, riꞌimatákaloje weká penaje, eꞌiyonaja kalé riꞌimatá weká kapichákajo liyá. Rikaꞌá kaja wanakiyá puꞌuwaré walaꞌakare; raꞌá kaja wajló Ripechu, weꞌemakáloje wajé péchuji chuwá penaje.
6 Jesucristo palamane aú Tupana aꞌarí wajló Ripechu, weꞌemakáloje palá wani raꞌapiyá penaje.
7 Ripalamane aú palánija weká meꞌetení Tupánajlo, weꞌemakáloje rijwaꞌaté matajnako jeꞌechú chu raú penaje. Riká wátakana nakú weká meꞌetení.
8 Kewaka wani marí nakaje numakare nakú, ñakele nuwata pilaꞌaká nenakú, naweꞌepíkaloje rinakojé palá raú. Piꞌimá kaja Tupana jaꞌapiyá jemaꞌajéñojlo riyukuna, riꞌimakáloje napechu nakuja penaje, nalaꞌakáloje palá ajopana inaꞌukena raú. Marí ke laꞌakana palani piyuke inaꞌukénajlo.
9 Pipuraꞌaniño najwaꞌaté mapéjari purákaꞌaloji nakú. Re nayukupere, nachiꞌiná michuna yukuna, nakhaꞌákono pajwaꞌatéchaka Moisés purákaꞌalomi jimaje. Unká na penaje kalé nakaje napuraꞌakaro nakú iꞌimaká.
10 Re kaꞌajná apú ijwaꞌaté, apichátari inakiyana pechu ripurákaꞌalo aú. Eko pimá rijló, riyuríkaloje riliyó riká. Pimá rijló rinaku pajluwape, iyaampe kaꞌajná, unkaja ke remaꞌá paꞌapiyá, páchoꞌota riká inakiyana eꞌiyayá.
11 Kaja piweꞌepí ilé kajena inaꞌukena pechu laꞌakó apoꞌojó, nayuríkale kewákaje purákaꞌaloji naliyó. Puꞌuwaré nalaꞌakare aú iná weꞌepí Tupana wajájikarena penájena neká.
Kaja penaje Pablo kemakare nakú Títojlo yukuna marí
12 Nuwakáraꞌaje ilé kaꞌajnó Artemas kaꞌajná, Tíquico kaꞌajná. Riphájika ilé ñoꞌojó lanakiya, piꞌijnajé majó nomaje pajimila Nicópolis ejo. Pilaꞌá mawó pikó, piꞌijnakáloje rejo penaje. Rewá nuwata iꞌimakana yawijá iꞌimajika ketana.
13 Eko paꞌá Zenas, Apolos, kele ñathé. Inaꞌuké chaya puraꞌajero Zenas. Eko paꞌá najló nakaje nawátajikare kaje, nalaꞌaká piyá kamuꞌují nakaje nakú naꞌapájika ewá.
14 Eko pimá pijwaꞌatéjenajlo, naꞌachí inaꞌuké ñathé nakaje nalaꞌakare kamuꞌují nakú aú. Ilé ke laꞌakana aú pijwaꞌatéjena laꞌajeño palá, unká neꞌemalaje mapeja marí ejaꞌawá chu.
15 Piyuke nujwaꞌaté iꞌimakaño maare kemaño pinaku: “Eko palá rijló kaꞌajnó. Eko palá kaja Jesucristo jaꞌapiyá jemaꞌajeño re iꞌimakáñojlo”. Pajñakani wemaꞌaká Jesucristo jaꞌapiyá najwaꞌaté. Nuwata Tupana laꞌaká iká palá piyukeja.
Kaja.