Kewákaje purákaꞌaloji yukuna marí
2
Pewíñaꞌatajika ee inaꞌuké, piꞌijnatá pipurákaꞌalo palá kewákaje purákaꞌaloji chuwá.
2 Pimá achiñana pheñawaꞌanijlo, neꞌemaká piyá kejátakachina, ajopana iphákaloje naꞌapí penaje. Pimá kaja najló, neꞌejnatákaloje napéchuwa palá, napechu iꞌimakáloje kaphí Tupana chojé, ñaké kaja Ripurákaꞌalo chojé. Pimaje kaja najló, nawátakaloje íkiꞌija Tupana, ajopana inaꞌukena waꞌaté. Pimá kaja najló, neꞌemakáloje kawajwéruna Tupana jaꞌapiyá jemaꞌakana nakú, namákachu chapú kaje yajwé.
3 Ñaké kaja pimájika inaana pheñawaꞌanijlo, nephákaloje Tupana jaꞌapí, nalaꞌakáloje piyuke nakaje palá, riwátaka ke. Pimá kaja najló, nachapújraꞌako piyá pajwaꞌatéchaka. Pimá kaja najló, nayuwéraꞌako piyá. Pimá kaja najló, nalaꞌakáloje palá, raú namátakaloje ajopana ñaké kaja laꞌakana aú.
4 Palá laꞌakaná aú newíñaꞌataje ináyana, nawátakaloje íkiꞌija naluna, nayani, kele penaje.
5 Palá nalaꞌajíkare aú namátaje ináyana, neꞌemakáloje jápakachina penaje; namátaje kaja neká, neꞌemakáloje palá péchuruna penaje; namátaje kaja neká, neꞌemakáloje palá naluna jaꞌapiyá jemaꞌajeño penaje. Ilé ke inaana pheñawaꞌaní laꞌajika ináyana jenakú, neꞌemakáloje palá laꞌakaño raú penaje. Ajopana puraꞌakó piyá puꞌuwaré Tupana purákaꞌalo nakú, nalaꞌajé ilé ke.
6 Ñaké kaja pimájika walijímakanajlo, neꞌemakáloje jápakachina.
7 Piká amátajeri kaja neká palá laꞌakaná aú. Pewíñaꞌatajika neká kewá, piphá wani kewákaje purákaꞌaloji jaꞌapí.
8 Pimá kaja palá nakaje nakú, nemaká piyá pinaku: “Unká paala ripurákaꞌalo”, ke. Palá laꞌakaná aú chapú péchuruna wanaku apáñaꞌajo naꞌapiwá, unkale na nachapújraꞌalajo wanaku.
9 Marí ke pimájika Jesucristo jaꞌapiyá jemaꞌajeño, jápaño ajopana waꞌatejlo: Pimá najló, nemaꞌakáloje nakariwate jaꞌapiyá palá, nalaꞌakáloje piyuke nakaje nakariwate wátaka ke penaje. Pimá kaja najló, napiyákaka piyá nanakojó nakariwátena.
10 Pimá kaja najló, nataꞌaká piyá nakaje naliyá. Ilé ke laꞌakana aú palá nakariwátena pechu watánaꞌajika nanakojé, raú kaja naweꞌepeje palánija riká wewíñaꞌatakare neká weꞌematájeri Jesucristo nakú.
11 Kaja Tupana laꞌá puꞌuwaká nakaje riwátakare laꞌakana inaꞌukéjloje penaje, piyuke inaꞌuké iꞌimakólojejla kapichákajo liyá raú.
12 Iná iꞌimaká aú ripalamane, unká iná laꞌalá apoꞌojó ke nakaje rimaká ke liyá; iná yurí kaja puꞌuwaré laꞌakaná iná liyó. Ripalamane aú kaja iná iꞌimá palá péchuri Tupana wátaka ke laꞌakana nakú.
13 Ilé kaje laꞌakana nakú weꞌemajé, aꞌajná Jesucristo iphájika majó ejená. Ripaꞌajó piño majó, rimaká iꞌimaká ke. Riwátakana nakú weká maare. Palá wapuraꞌajiko weꞌematájeri, wachiꞌinárikana wani Jesucristo nakú.
14 Riká takaꞌarí wachaya iꞌimaká, raú riꞌimatá weká puꞌuwaré walaꞌakare liyá. Riꞌimatá weká, weꞌemakáloje rileꞌejena inaꞌukena, palá péchuruna rijló, wéchiruna palá laꞌakaná nakú penaje.
15 Pewíñaꞌata inaꞌuké marí numakare nakú; piꞌimá riyukuna najló, kaphí napechu iꞌimakáloje raú penaje. Unkaja ke naꞌá nanakojó riká, pakhaꞌá neká. Nawakáraꞌajeri piká, marí ke pilaꞌakáloje penaje noꞌó piꞌimaká; marí ke pilaꞌajika neká, napechu iꞌimaká piyá mapéjari keja pinaku.