3 Tupana waꞌaté nupuraꞌakó kewá nupuraꞌakó pinaku. “Palá pilaꞌaká nuká”, ke numaká rijló. Rijwaꞌaté jápajeri nuká. Palá nupechu nakú nakaje iꞌimaká ejé nulaꞌá rijló nakaje, nuchiꞌiná michuna laꞌaká rijló nakaje iꞌimaká ke kaja.

4 Re joꞌó kaja nuweꞌepika meke pipechu laꞌakó kamuꞌují wani, noꞌopáñaaka piꞌimaká wakajé. Kajrú piyaka nuꞌumaká. Chuwa nuwata wani pichaje iꞌijnakana, puꞌují nupechu iꞌimakáloje raú.

5 Nuweꞌepí kewaka pipechu kaphí Tupana chojé. Pipiyá kaphí paló Eunice pechu iꞌimaká, ñaké kaja piruta Loida pechu iꞌimaká kaphí richojé. Nuweꞌepí napechu iꞌimaká ke kaja pipechu Tupana chojé kaphí.

6 Ñaké iꞌimakale numá pijló marí ke: Notoꞌotaka nuyátheꞌela pinakojé iꞌimaká wakajé, Tupana aꞌarí pijló weꞌepíkaje, pilaꞌakáloje nakaje riwátaka ke raú penaje. Meꞌetení pipaꞌó piño rilaꞌajé ñaké.

7 Unká Tupana aꞌalá wajló Ripechu, weꞌemakáloje keroꞌokajo nakú. Ripechu jaꞌapiyá iꞌimakana aú wawata Tupana íkiꞌija, ajopana inaꞌukena waꞌaté, raú kaja wapechu iꞌimá kaphí. Ripechu aú kaja iná palaꞌatá iná péchuwa, iná laꞌaká piyá puꞌuwaré.

8 Ñaké iꞌimakale, papáñaꞌaniño Jesucristo nakú puraꞌakano jaꞌapí; papáñaꞌaniño kaja noꞌopí. Inaꞌuké wajákelana chu nuká meꞌetení, nomaꞌakale Jesucristo jaꞌapiyá. Tupana iꞌimataka iná kapichákajo liyá yukuna iꞌimakana jimaje neꞌiyajena laꞌañó iná chapú. Nalaꞌajé kaja chapú piká rijimaje, eko pijñaꞌá panaku riká.

9 Tupana iꞌimatari weká kapichákajo liyá, weꞌemakáloje rileꞌejena inaꞌukena. Unká na kalé walaꞌá iꞌimaká, riꞌimatákaloje weká kapichákajo liyá; Jesucristo palamane aú ja kalé riꞌimatá weká richiyá. Kaja keja Tupana pechu nakú walaꞌakana iꞌimaká, íkiꞌija wani riwátakale weká. Unká chiyó rikeñoꞌota ejaꞌawá iꞌimaká, weꞌemá ripechu nakú.

10 Kaja chuwa waweꞌepí riwajwena wani weká, riwakáraꞌakale Jesucristo majó iꞌimaká weꞌematájeri penaje. Jesucristo cháꞌatari takaꞌakaje iꞌimaká. Tupana iꞌimatari iná kapichákajo liyá Jesucristo palamane aú, iná iꞌimakáloje matajnako rijwaꞌaté jeꞌechú chu.

11 Ñaké iꞌimakale, Tupana wakáraꞌari nuká, nuꞌumakáloje riyukuna ajopánajlo. Raꞌá kaja nuká Jesucristo wakáraꞌakarena nakiyana penaje, nowíñaꞌatakaloje ajopana, unká judíona kalé iꞌimakáñojlo rinaku.

12 Rijimaje nalaꞌá nuká chapú meꞌetení, eꞌiyonaja kalé unká nopáñaꞌalo raú, kaphí nupechu iꞌimakale Tupana chojé. Kaja nuyurí nokó rijló, raú nuweꞌepí palá raꞌajika rinakojó nuká, aꞌajná nuꞌumajika rijwaꞌaté wakajé ejená.

13 Palá nowíñaꞌataka piꞌimaká kewákaje purákaꞌaloji nakú, richojé pilaꞌá kaphí pipéchuwa. Íkiꞌija Tupana wátakarena weká, Jesucristo jaꞌapiyá jemaꞌajeño weꞌemakale.

14 Eko Tupana Pechu, weká raꞌapiyá jemaꞌajeño eꞌiyá iꞌimakare, aꞌá piñathé paꞌakáloje pinakojó palani purákaꞌaloji noꞌopátakare pijló iꞌimaká.

15 Kaja piweꞌepí piyukeja maare nujwaꞌaté, Asia teꞌeré eyájena iꞌimakaño, yurika nuká nokó. Figelo, Hermógenes waꞌaté, jaꞌapáñaaño kaja nuká.

16 Nuwata Tupana laꞌaká palá wani Onesíforo, riyajalo, riyani, kele nakú. Pulapé ripalaꞌataka nojló nupechu, inaꞌuké wajákelana chu nuꞌumaká wakajé, unká rapáñaꞌalo noꞌopí iꞌimaká.

17 Roma ejo riphaka iꞌimaká wakajé, rikulá nuꞌumaká, aꞌajná riphátaka nuká ejená.

18 Éfeso e weꞌemaké wakajé, rilaꞌá kaja wanaku palá iꞌimaká, piweꞌepíkare nakojé. Ilé ke rilaꞌakale nuká palá, nuwata Tupana laꞌaká riká palá wani, jeꞌechú chu riꞌimajika wakajé. Re Jesucristo kemájeri piyukeja inaꞌuké nakú mékeka rijló nakaje nalaꞌakare, marí ejaꞌawá chu neꞌemaká ketana.