Chapú kaje ñaꞌakana panaku yukuna marí
2
Nuꞌurí ke nojló piká, Timoteo. Jesucristo palamane weká, ñakele pipechu iꞌimá kaphí, ripalamane piꞌimakale.
2 Piꞌimaká nujwaꞌaté wakajé, nowíñaꞌatajika kajrú inaꞌukena Tupana purákaꞌalo nakú. Riká purákaꞌalo, pemaꞌakare riwakajé nakú, pewíñaꞌataje ajopana achiñana, naꞌapátakaloje kaja riyukuna ajopánajlo. Kaliyáruna, eyá palá weꞌepíkaño inaꞌuké jewíñaꞌatakana, pewíñaꞌataje rinaku, naꞌapátakaloje riyukuna ajopánajlo penaje.
3 Suráana ñaꞌañó chapú kaje panaku, nemaꞌakale nawakáraꞌajeri jaꞌapiyá. Ñaké kaja pijñaꞌaká chapú kaje yajwé panaku, pemaꞌakale piwakáraꞌajeri Jesucristo jaꞌapiyá.
4 Unká suráana laꞌalá najápakaꞌala nañakajela ewá. Nawakáraꞌajeri kemaká najló, keja nalaꞌaká nakaje piyuke.
5 Ñaké kaja bola nakú kátajeñojlo riká: unká naꞌalá najló nacháꞌataka wemí, unkachu nakátalo namájeri kemaká najló ke.
6 Kamenani jápari rimena eꞌiyá, aꞌajnejí iꞌimakáloje rijló penaje. Kachuwa nakú nakaje tawáꞌako rijló reꞌiyá. Riphaka rená chojé wakajé, riká iꞌijnari paineko nakaje ñaꞌajé rijluwa reꞌiyayá.
7 Piꞌijnatá palá pipéchuwa riká numakare pijló nakú; Jesucristo laꞌajeri palá pipechu, piweꞌepíkaloje rinakojé penaje.
8 Piweꞌepí mékeka Jesucristo iꞌimaká. Neꞌemakana David michú lakemi riꞌimaká marí ejaꞌawá chu. Ritakaꞌaká iꞌimaká ejomi, rimakápoꞌo piño. Tupana iꞌimataka iná kapichákajo liyá yukuna nuꞌumá najló noꞌopaka ewá.
9 Nujñaꞌá chapú kaje panaku meꞌetení, nuꞌumakale riyukuna ajopánajlo. Kaja jepoꞌokeja nuká kureti aú noꞌonapitá, nuꞌumá nakiyá waꞌató. Unká inaꞌukélari ke wani nalaꞌaká nuká, eꞌiyonaja unká meke nalaꞌalaje ajopana inaꞌukena, nemaꞌaká piyá Tupana purákaꞌalo.
10 Nujñaꞌá panaku riká, nuwátakale neká, Tupana iꞌiwapakárena rijluwa ajopana inaꞌukena eꞌiyayá, iꞌimakó kapichákajo liyá Jesucristo palamane aú, neꞌemakáloje matajnako jeꞌechú chu.
11 Marí purákaꞌaloji wemakare nakú, kewaka wani:
“Kaja takaꞌakaño ke weká, Jesucristo takaꞌakale
wapumí chojé iꞌimaká.
Ñakele weꞌemajé piño rijwaꞌaté jeꞌechú chu.
12 Wajñaꞌajika ee chapú kaje yajwé panaku maare ejaꞌawá chu,
jeꞌechú chu weꞌemajika wakajé, weꞌemajé ajopana wakáraꞌajeño rijwaꞌaté.
Wamichoꞌotájika ee richaya maare,
ñaké kaja rimichoꞌotájika wachaya re.
13 Unká kaꞌajná walaꞌalá piyukeja nakaje Tupana wakáraꞌaka ke,
eꞌiyonaja ñakeja rilaꞌajika wanaku palá rimaká ke.
Unká méñoꞌojo Tupana laꞌalá apoꞌojó nakaje rimaká liyá”, ke wemaká.
Tupana waꞌaté jápajeri yukuna marí
14 Eko pimá piño pijwaꞌatéjenajlo Tupana jimaje ke, nakhaꞌákako piyá pajwaꞌatéchaka mapéjari purákaꞌaloji jimaje. Unká na penaje pajwaꞌatéchaka akhaꞌákakano iꞌimalá, rapichátaja remaꞌajeño pechu.
15 Pilaꞌá palá pipechu lokópaꞌalaja, piꞌimakáloje palá Tupana waꞌaté jápajeri penaje riwátaka ke, raú unká papáñaꞌalo nakaje pilaꞌajíkare jaꞌapí. Pewíñaꞌo kaja palá Tupana purákaꞌalo nakú, pewíñaꞌatakaloje inaꞌuké rinaku palá.
16 Pipuraꞌaniño ajopana waꞌaté mapéjari purákaꞌaloji, unká na penaje kalé iꞌimakare nakú, unká Tupana liyaje kalé riká. Ilé kaje purákaꞌaloji jemaꞌakana pachá iná yurí iná liyó Tupana purákaꞌalo jaꞌapiyá jemaꞌakana.
17 Cheꞌerá ajñátaka iná napona nakiyá iná wejápano, wejápano, keja kaja rikaꞌaká iná pechu nakiyá Tupana purákaꞌalo wejápano wejápano ke. Ñaké kaja Himeneo, Fileto waꞌaté, jewíñaꞌataka neká rinaku.
18 Kaja nayurí naliyó kewákaje purákaꞌaloji jaꞌapiyá iꞌimakana. Chuwa marí ke nemaká: “Inaꞌuké takaꞌakaño iꞌimaká, kaja makápoꞌoño piño iꞌimaká”, ke. Ilé kaje aú napichata neꞌiyajena pechu, napechu iꞌimaká piyá kaphí Jesucristo chojé.
19 Unká na kalé apiyákajeri nakaje Tupana kemakare nakú; rimaká rinaku keja riꞌimajika. Rimá iꞌimaká: “Wawakáraꞌajeri Tupana weꞌepiri mékajenaka inaꞌukena rileꞌejena”, ke. Rimá piño marí ke: “Piyuke Jesucristo jaꞌapiyá iꞌimakaño yuriño naliyó puꞌuwaré laꞌakana”, ke rimaká.
20 Pají ñópoꞌojlo chu re kajrú nakaje piyukeja, re waja nakaje richu: tiyela, paratú, iꞌichilá, kaje maká. Re kaja nakaje uwiru (oro) nakiyá laꞌakanami kaꞌajná, sereni nakiyá laꞌakanami kaꞌajná richu; re kaja richu nakaje pukapé nakiyá ipukánami; re kaja richu nakaje mirapewa nakiyá laꞌakanami kaje; re kaja richu iꞌichí, iná akhoꞌokare chojé juni weꞌechú kaꞌalá keja; re kaja richu tiyela palá lamáꞌatakanami, nakhoꞌokáloje nakaje jalá richojé nachaje iphákañojlo penaje. Riká penájeja kalé nawata riká tiyela.
21 Ñaké wajló riká. Iná kaꞌá piyuke puꞌuwaré iná laꞌakare iná nakiyó, raú palani iná Tupánajlo, riwakáraꞌakaloje iná laꞌaká nakaje palá rijló. Ilé tiyela iꞌimaká paminajlo, ke kaja iná iꞌimaká rijló raú.
22 Piꞌimá uꞌupejlú pimanáicho laꞌakana liyá, kajrú walijímakana laꞌaká ke. Pipechu iꞌimá kaphí Tupana chojé; piwata kaja íkiꞌija riká, ajopana inaꞌukena waꞌaté. Pipechu iꞌimá kaja palá; pikaꞌá pipechu nakiyá nakaje pikawílaꞌakaro nakú. Ilé ke piꞌimajika ajopana Tupana jaꞌapiyá jemaꞌajeño waꞌaté. Rijwaꞌaté puraꞌajeño neká, kaja Tupana kaꞌá nanakiyá puꞌuwaré nalaꞌakare.
23 Paꞌaniña kaja pinakojó purákaꞌaloji mapéjari iꞌimakare, napuraꞌakaro nakú. Ilé kaje purákaꞌaloji jimaje nakhaꞌákako pajwaꞌatéchaka.
24 Unká Tupana waꞌaté jápajeri iꞌimalá akhaꞌákakajo nakú. Palá riká piyukeja inaꞌuké waꞌaté; palá kaja rewíñaꞌataka neká; unká kaja riyúchaꞌalo kiñaja nachá.
25 Tupana waꞌaté jápajeri laꞌarí kaja unká jemaꞌalaño Tupana jaꞌapiyá jenakú, nalaꞌakáloje palá penaje. Unká kaja rilaꞌalá rikó weꞌepiri ke najló. Ilé kaje aú kaꞌajná Tupana aꞌajeri nañathé, napajnoꞌotákaloje napéchuwa Tupana ejo, puꞌuwaré nalaꞌakare liyá, neꞌemakáloje reyá aꞌajná ñoꞌojó kewákaje purákaꞌaloji jaꞌapiyá. Penaje iná puraꞌó najwaꞌaté,
26 raú kaꞌajná nalaꞌajé kewaka riká, eyá nayureje naliyó Jiñá Chiꞌinárikana wátaka ke laꞌakana. Kaja kamejeri patajona chu ke neká, ñakele nalaꞌá riwakáraꞌaka ke.