Mékeka inaꞌuké laꞌajika kaja penaje wakajé yukuna marí
3
Pemaꞌá marí: Kaja penaje ejaꞌawá iphájika rená chojé wakajé, kajrú inaꞌukena amájika chapú kaje yajwé.
2 Marí ke inaꞌuké iꞌimajika riwakajé: Khaí weꞌepíkaño nanakuwá iꞌimajeño kajrú riwakajé. Liñeru iꞌimajeri nawajwé wani; nalaꞌajé nanakuwá ajopana cháꞌatajeño ke wani. Unká kaja nayani jemaꞌalaje nachiꞌiná jaꞌapiyá. Unká kaja naweꞌepílaje “Palá pilaꞌaká weká”, ke kemakana palá laꞌakaño nekajlo. Unká kaja nawátala Tupana nakojé weꞌepíkana;
3 unká kaja naweꞌepílaje khaí inaꞌuké nakú; unká kaja naweꞌepílaje inaꞌuké muꞌují. Kajrú kaja nachapújraꞌajiko panakuwáaka. Namanáicho laꞌakana apú waꞌaté, apú waꞌaté ke, iꞌimajeri nawakáraꞌajeri ke. Chapú wani kaja nalaꞌajika ajopana inaꞌukena; unká wani nawátalaje palá laꞌakaná.
4 Nemaje kaja nanakiyana nakú, chapú nanaku péchurunajlo, nalaꞌakáloje neká chapú penaje. Mapechuru ke nalaꞌajika nakaje. Nalaꞌajé nanakuwá nakaje nakuwá weꞌepéjeño ke wani. Tupana chaje nawátaje nakaje laꞌakare napechu puꞌují.
5 Nalaꞌajé nanakuwá mapeja Tupana jaꞌapiyá jemaꞌajeño wani ke, eꞌiyonaja nakaje nalaꞌajíkare aú iná weꞌepeje unká ñaké kalé neká, unkale nayurila Tupana apiyákaka napechu. Ilé kajena iꞌimakaño, piꞌimaniña najwákeꞌewe.
6 Nanakiyana iꞌijnaño ajopana ñakaré chojé, ajopana ñakaré chojé ke, napajlákaloje inaana, unká kaphí kalé péchuruna iꞌimakaño najló waꞌaté, kaja ñaké kaja puꞌuwaré laꞌakana iꞌimakale napechu nakú.
7 Kajena inaana wátaño ajopana purákaꞌalo, ajopana purákaꞌalo ke jemaꞌakana, eꞌiyonaja napechu jeꞌeló kewákaje purákaꞌaloji jaꞌapejé. Neká kajena waꞌaté napajlá.
8 Júpimi Janes michú, Jambres michú, kele unká wani wátalaño Moisés michú purákaꞌalo jaꞌapiyá jemaꞌakana iꞌimaká. Ñaké kaja neká numakárena nakú, unká wani naꞌalá nakojó kewákaje purákaꞌaloji, unká napechu iphala rilokópaꞌala.
9 Meketánaja neꞌemajika ñaké. Rejomi piyuke inaꞌuké weꞌepéjeño mapechúruna neká, Janes michú, Jambres michú waꞌaté, iꞌimaká ke kaja. Unká wátalaño Moisés michú neꞌemaká. a
10 Eyá piká laꞌarí palá, nowíñaꞌataka piꞌimaká ke; nupechu ke kaja pipechu meꞌetení; nulaꞌaká riꞌimaká, ke kaja pilaꞌaká nópumi riká; nakaje nuweꞌepíkare laꞌakana nutukumó, ke kaja piweꞌepika rilaꞌakana pitukumó; kaphí nupechu iꞌimaká Tupana chojé, ke kaja pipechu kaphí richojé. Unká nupechu iꞌimalá ujwí Tupana nakú; ñaké kaja piká, unká pipechu iꞌimalá ujwí rinaku. Unká kaja nomala ujwí ajopana inaꞌukena; ñaké kaja piká, unká pamala ujwí ajopana inaꞌukena. Kaliyani nuká Tupana jápakaꞌala laꞌakanajlo; kaliyani kaja piká, pilaꞌakáloje ñaké penaje.
11 Nalaꞌaké nuká chapú, nomaꞌakale Jesucristo jaꞌapiyá; ñaké kaja nalaꞌajika piká chapú. Nujñaꞌá kaja chapú kaje yajwé panaku. Kaja piweꞌepí mékeka nalaꞌajika nuká chapú wani iꞌimajika, pajimila Antioquía e nuꞌumaké wakajé. Ñaké kaja nalaꞌaká nuꞌumaká pajimila Ikonio e, Listra e nuꞌumaké wakajé. Chapú nalaꞌajika nuká rewá iꞌimaká, eꞌiyonaja kalé Tupana iꞌimatari nuká naliyá.
12 Marí keja riká: Iná weꞌepíkachu iná tukumó Jesucristo wátaka ke laꞌakana, ajopana inaꞌukena laꞌajeño iná chapú.
13 Puꞌuwaré laꞌajeñó laꞌañó richájeno ke wani puꞌuwaré. Ñaké kaja pajlákachina pajlaka richájeno ke wani pajwaꞌatéchaka. Kajrú kaja napajlaka ajopana inaꞌukena waꞌaté; nemaꞌá kaja pajlakaje naꞌapiyá.
14 Pijló numá: Piꞌimá ñakeja wani kewákaje purákaꞌaloji jaꞌapiyá jemaꞌakana nakú. Kaja newíñaꞌata piká rinaku iꞌimaká; kaja piweꞌepí pijluwa kewaka riká; piweꞌepí kaja mékajenaka jewíñaꞌataño piꞌimaká.
15 Pijyuwako eyá piweꞌepí Tupana purákaꞌalo lanaꞌakéjami nakojé maárejecha, raú piweꞌepí mékeka Tupana iꞌimataka iná kapichákajo liyá. Tupana purákaꞌalo kemari marí ke: “Iná pechu iꞌimakachu kaphí Jesucristo chojé, Tupana iꞌimatari iná kapichákajo liyá”.
16 Piyuke Tupana purákaꞌalo lanaꞌakéjami nalanaꞌá raꞌapiyá iꞌimaká, rewíñaꞌatakaloje weká Tupana nakú. Raú kaja rilaꞌá wenakú, walaꞌakáloje palá raꞌapiyá jemaꞌakana aú, ñakele palani inajlo Tupana purákaꞌalo. Rewíñaꞌata iná palá kewákaje purákaꞌaloji nakú; rakhaꞌá kaja weká puꞌuwaré walaꞌakare pachá; rimá kaja wajló puꞌuwaré ajopana laꞌakare nakú, walaꞌaká piyá ñaké kaja. Palá wani Tupana purákaꞌalo jewíñaꞌataka weká, weꞌemakáloje palá raꞌapiyá penaje.
17 Tupana jaꞌapiyá jemaꞌajéñojlo penaje Tupana purákaꞌalo lanaꞌakéjami, naweꞌepíkaloje keꞌiyapejé palá laꞌakaná nakojé raú penaje.