4
Tupana, Jesucristo waꞌaté, jimaje ke numaká pijló, piꞌimakáloje inaꞌukejlo Tupana yukuna. Jesucristo iphájeri majó, riꞌimakáloje inaꞌuké wakáraꞌajeri penaje. Rejéchami rimájika piyukeja inaꞌuké nakú, mékeka rijló nakaje nalaꞌakare marí ejaꞌawá chu neꞌemaká ketana: palá nalaꞌakare kaꞌajná, puꞌuwaré nalaꞌakare kaꞌajná. Rimaje inaꞌuké kaja takaꞌakaño nakú; rimaje kaja kajmuruna, re joꞌó kaja iꞌimakaño nakú, mékeka rijló nakaje nalaꞌakare.
2 Paꞌapata ajopánajlo Tupana yukuna; piweꞌepí pitukumó riká; piꞌimá riyukuna wátaño remaꞌakánajlo, eyá ijnú wátakaño remaꞌakánajlo waꞌató. Pikaꞌata neꞌiyajé Tupana purákaꞌalo aú, nalaꞌakáloje palá raú penaje; pakhaꞌá kaja neká raú, puꞌuwaré nalaꞌakare pachá. Pilaꞌá kaja ajopana pechu kaphí raú; pewíñaꞌata neká palá. Piyúchaꞌaniño najwaꞌaté, unkaja ke naweꞌepí rinakojé kiñaja.
3 Akijñojo unká inaꞌuké wátalajeño kewákaje purákaꞌaloji jemaꞌakana. Nakaje napechu nakú iꞌimakare, ke kaja nawátajika ajopana jewíñaꞌataka neká. Ñakele nakulaje najluwa ajopana newíñaꞌatajeño penaje, newíñaꞌatakaloje neká nawátakare kaje nakuja penaje.
4 Napajnoꞌotaje napéchuwa kewákaje purákaꞌaloji liyá, keꞌiyapejé yuku ejo.
5 Ñakeja piꞌijnatá palá pipéchuwa; pijñaꞌá kaja chapú kaje panaku. Piweꞌepí pitukumó Tupana iꞌimataka inaꞌuké kapichákajo liyá yukuna iꞌimakana inaꞌukejlo, rikaja kalé piweꞌepeje pitukumó. Pilaꞌá pijápakaꞌala palá.
6 Yewicha riphaka rená chojé nojló, nutaꞌakáloje penaje.
7 Nulaꞌá nujápakaꞌala kaphí nupechu iꞌimaká lokópaꞌalaja. Wátaño ajopana cháꞌatakana jechoꞌokajo aú, jechoꞌoñó naꞌaká rená ejená. Jechoꞌojero pechu ke kaja nupechu nujápakaꞌala laꞌakana nakú. Nutakaꞌajika ejená nuꞌumajé Jesucristo yukuna ajopánajlo; rejená kaja nupechu iꞌimajé Jesucristo chojé kaphí. Unká nóchoꞌolajo richiyá.
8 Wawakáraꞌajeri wani Jesucristo, rikaja kalé weꞌepiri wanaku kemakana palá, mékeka rijló nakaje walaꞌakare marí ejaꞌawá chu weꞌemaká ketana. Riká aꞌajeri nojló riwemí, ripalamane aú nulaꞌakale palá. Ñaké kaja raꞌajika riwemí íkiꞌi wátakaño Jesucristo paꞌakó majó wakajejlo, palani wani iꞌimajíkare.
Nakaje Pablo kemakare nakú Timotéojlo kaja penaje marí
9 Patáꞌajla majó iꞌijnakana nomaje meketana iꞌimajemi.
10 Kaja Demas jaꞌapáñaari nuká; riꞌijná pajimila Tesalónica ejo. Tupana chaje íkiꞌika riwátaka nakaje marí ejaꞌawá chu iꞌimakare, raú kalé raꞌapáñaa nuká. Crescente, eyá Tito, kele unká kaja iꞌimalaño maare. Crescente iꞌijnari ají ke Galacia teꞌeré ejo, eyá Tito iꞌijnari Dalmacia teꞌeré ejo.
11 Rikaja kalé Lucas nujwaꞌaté maare. Eko pikulá Marcos; piwaꞌa riká pijwaꞌató majó, raꞌachí nuñathé maare nujápakaꞌala laꞌakana aú.
12 Kaja nuwakáraꞌa Tíquico pajimila Éfeso ejo.
13 Piꞌijnajika ee majó, pijñaꞌá majó noꞌorumaká nakiyana nuyuríkare pajimila Troas e iꞌimaká, Carpo ñakaré chu riká. Pijñaꞌá kaja majó nupapérane piyuke; richaje íkiꞌika nuwátaka pijñaꞌaká majó nupapérane nulanaꞌakare chojé.
14 Alejandro, pejruꞌuwá nakú jápajeri, laꞌarí nuká chapú wani iꞌimaká. Tupana ko aꞌá rijló chapú rilaꞌakare nuká wemí.
15 Piꞌimá uꞌupejlú riliyá, kaja chapú wani ripechu Tupana purákaꞌalo waꞌapátakare ajopánajlo nakú.
16 Nukeñoꞌoká wakajé wateꞌeré eyaje wakáraꞌajeño waꞌaté puraꞌakano nuchayo, piyuke nujwákeꞌena jaꞌapáñaaño nuꞌumaká. Nuwata Tupana amako nachaje.
17 Unká Tupana jaꞌapáñaala nuká; rilaꞌá kaphí nupechu, nuꞌumakáloje riyukuna penaje. Tupana iꞌimataka inaꞌuké kapichákajo liyá yukuna nuꞌumá unká judíona kalé nakiyánajlo. Tupana iꞌimatari nuká nupinana liyá, nakapichátaka piyá nuká.
18 Tupana iꞌimataje kaja nuká ajopana nupinana liyá. Piyuke chapú kaje yajwé nomájikare liyá waꞌató riꞌimataje nuká, nuꞌumakáloje rijwaꞌaté jeꞌechú chu penaje. Re iꞌimakaño wakáraꞌajeri riká. Palá wani napuraꞌajiko Tupana nakú waꞌajini wani. Marí keja riꞌimajika.
19 Eko palá Prísca, Áquila, kélejlo. Eko palá kaja Onesíforo, riyani jaló, kélejlo.
20 Erasto yuriro pajimila Corinto e. Nuyurí Trófimo Mileto e; ritami riꞌimaká aú nuyurí riꞌimaká rejeja.
21 Patáꞌajla majó iꞌijnakana yawijá piyá. Ebulo, Pudente, Lino, Claudio, piyuke Jesucristo jaꞌapiyá jemaꞌajeño iꞌimakaño maare, kele kemaño pinaku: “Eko palá rijló”, ke.
22 Nuwata wawakáraꞌajeri Jesucristo iꞌimaká pijwákeꞌewe; nuwata kaja Tupana laꞌaká iká palá re iꞌimakaño piyukeja.
Kaja.