TITO
San Pablo wakáraꞌari marí purákaꞌaloji Títojlo iꞌimaká
1
Tupana waꞌaté jápajeri nuká; Jesucristo iꞌiwapakárena rijwaꞌatéjenawa penaje nakiyana kaja nuká. Riwakáraꞌa nuꞌujnaká riyukuna iꞌimajé ajopánajlo, ajopánajlo ke, kaphí napechu iꞌimakáloje richojé raú, waꞌaté naweꞌepíkaloje kewákaje purákaꞌaloji nakojé.
2 Ripalamane raꞌapiyá jemaꞌajeño iꞌimajeño matajnako rijwaꞌaté jeꞌechú chu, rimaká nanaku ke. Ilé ke rimaká nanaku iꞌimaká, unká chiyó rikeñoꞌota ejaꞌawá; unká wani pajlákachi kalé Tupana, kewaka rimaká.
3 Chuwa, kaja riphá rená chojé, ñakele chuwa raꞌá puꞌuwaká riyukuna wajló, raú waweꞌepíkaloje rinakojé penaje. Riká weꞌematájeri, wakáraꞌari nuká riyukuna iꞌimajeri penaje.
4 Tito, pijló nuwakáraꞌa marí purákaꞌaloji. Nujewemi pikeñoꞌó Jesucristo jaꞌapiyá jemaꞌakana iꞌimaká; chuwa, kaja pajñakani wapechu kaphí richojé. Eko waraꞌapá Tupana, weꞌematájeri Jesucristo waꞌaté, laꞌá piká palá.
Nakaje Pablo wátakare Tito laꞌaká Creta teꞌeré nakú yukuna marí
5 Creta teꞌeré nakú nuyurí piꞌimaká Jesucristo jaꞌapiyá jemaꞌajeño waꞌaté, pilamáꞌatakaloje nakaje najló rewá penaje. Nuyurí piꞌimaká re, paꞌakáloje achiñana nakiyana namájeño penaje. Piyukeja pajimila, rewá iꞌimakare ewá, nuwata paꞌaká nanakiyana namájeño penaje. Numaká pijló iꞌimaká ke nuwátaka paꞌaká neká.
6 Marí ke iꞌimakaño paꞌajé namájeño penaje: Achiñana nemakárena nakú: “Unká na kalé nalaꞌá puꞌuwaré”, ke. Pajluwaja lúnaruna kaja neká. Marí ke kaja namájeño yaní iꞌimajika: Jesucristo jaꞌapiyá jemaꞌajeño neꞌemajika, unká nemalárena nakú: “Puꞌuwaré laꞌajeñó neká”, ke. Palá jemaꞌakaño nachiꞌiná jaꞌapiyá kaja neꞌemajika.
7 Namájeño aꞌajeño nanakojó inaꞌuké, naꞌakáloje nañathé Tupana wátaka ke laꞌakana aú. Ñakele marí kajena paꞌajé namájeño penaje: Unká puꞌuwaré laꞌajeñó kalé; unká kaja najnúchaꞌalo; unká kaja yúchaꞌalaño kiñaja; unká kaja yuwéraꞌalaño; unká kaja wátalaño nókakajo; unká kaja nawajwela liñeru;
8 kemaño kaja yaꞌajnaya iphákañojlo, nayuríkoloje najwaꞌaté nañakaré chu penaje; wéchiruna iꞌimakaño kaja neká palá laꞌakaná nakú; weꞌepiño kaja natukumó palá laꞌakaná; iꞌijnataño kaja palá napéchuwa; palá péchuruna kaja iꞌimakaño neká; laꞌañó kaja palá, naweꞌepíkare nakojé lokópaꞌalaja.
9 Nemaꞌajé kaja palá wewíñaꞌatakare nakú jaꞌapiyá; kewaka wani riká, napechu iꞌimakáloje kaphí richojé penaje. Nemaꞌajé raꞌapiyá, newíñaꞌatakaloje ajopana rinaku penaje, nalaꞌakáloje nenakú raú naweꞌepíkaloje unká paala, unkachu nalaꞌalá kewákaje purákaꞌaloji kemaká ke. Ilé ke iꞌimakaño paꞌajé namájeño penaje.
10 Paꞌajé neká Jesucristo jaꞌapiyá jemaꞌajeño amájeño penaje, marí ke neꞌiyajena inaꞌukena iꞌimakale: Re kajrú inaꞌukena unká wani aꞌalaño nanakojó kewákaje purákaꞌaloji. Chaje wani judíona nakiyana, unká wani aꞌalaño nanakojó riká, ñakele unká na penaje kalé napurákaꞌalo iꞌimalá, eꞌiyonaja napajlá kajrú inaꞌukena waꞌaté raú.
11 Inaꞌuké jemaꞌaká piyá naꞌapiyá, namájeño jaꞌapátajeño najló kewákaje purákaꞌaloji. Kaja napichata neꞌiyajena inaꞌukena pechu nakaje newíñaꞌatakare neká unká wani paala aú. Liñeru chaya newíñaꞌata neká.
12 Ilé, piꞌimakare e, pajluwa inaꞌuké iꞌimari. Nayukupere yukuna iꞌimajeri penaje riꞌimaká. Riká kemari riteꞌeré eyájena nakú: “Pajlákachina wani Creta teꞌeré e iꞌimakaño; yuriná kaja neká; ijnuruna wani kaja neká; kawaleꞌekena wani kaja neká”, ke rimaká riteꞌeré eyájena nakú.
13 Kewaka rimaká nanaku, ñaké iꞌimakale, pakhaꞌajé neká, napechu iꞌimakáloje palá Tupana purákaꞌalo chuwá penaje,
14 nayuríkaloje naliyó judíona yukupere nakeñoꞌótakare najluwa jaꞌapiyá jemaꞌakana. Kaja nayurí naliyó kewákaje purákaꞌaloji. Neká penájemina jewíñaꞌataño ajopana nayukupere nakú, nekó nakeñoꞌótakare najluwa. Pakhaꞌá neká, naꞌaká piyá nanakojó riká.
15 Palá péchurunajlo palani piyuke nakaje Tupana keñoꞌótakare; eyá chapú péchurunajlo unká na iꞌimalá palani, unkale naꞌalá nanakojé kewákaje purákaꞌaloji, aphichátakeja napechu iꞌimakale.
16 Nemá nanakuwá: “Palá péchuruna weká Tupana nakú”, eꞌiyonaja nakaje nalaꞌakare aú iná weꞌepí unká ñaké kalé neká. Chapú nawó ajopana cha; unká kaja nemaꞌalá Tupana jaꞌapiyá; mejluruna ke wani neká palá laꞌakanajlo.