3 Ajopana jewíñaꞌatajika ee nakaje nakú apoꞌojó wani, unká wewíñaꞌatalare wawakáraꞌajeri Jesucristo nakú ke, wapechu iꞌimaká Tupana nakú ke kaja,

4 kajena laꞌañó nekó weꞌepiño ke wani. Unká na nakojé kalé naweꞌepí; unká na chojé kalé kaphí napechu. Wéchiruna kaja neká ajopana waꞌaté akhaꞌákakano nakú, pachá chapú napechu nacháꞌatajeño nakú. Ilé ke nalaꞌaká pachá unká paala neká pajwaꞌatéchaka. Puꞌuwaré kaja napuraꞌakó panakuwáaka; unká inaꞌukélaruna ke napechu panakuwáaka.

5 Kaja apichátakeja ke napechu iꞌimakale najló, nakhaꞌákako pajwaꞌatéchaka. Kaja napechu pajnoꞌó kewákaje purákaꞌaloji liyá, raú napechu nakú: “Weꞌemajé Tupana yukuna ajopánajlo, ajopánajlo ke, raú naꞌajé wajló kajrú liñeru”, ke napechu nakú.

6 Palani inajlo riká, iná laꞌakachu Tupana wátaka ke. Palani kaja inajlo riká, puꞌují iná pechu iꞌimakachu nakaje iná kapi iꞌimakare waꞌateja.

7 Unká na kalé wephata wajwaꞌató marí ejaꞌawá chojé, wamothoꞌoká iꞌimaká wakajé; ñaké kaja watakaꞌajika wakajé, unká kaja na kalé wajñaꞌajé wajwaꞌató.

8 Aꞌarumakaji, ajñakaje, kaje iꞌimakachu inajlo, palani iná iꞌimaká raú.

9 Eyá neꞌiyajena wátaño kajrú nakaje ñaꞌakana najluwa; kajrú nakaje amátaka neká. Iná amátaka kamejérina nayená aú, ke kaja nakaje amátaka rijluwa neká. Ilé kaje aú nakapichata nekó.

10 Kajrú liñeru wátakana najluwa pachá neꞌiyajena yuriño naliyó Tupana chojé iꞌimakana kaphí, raú nalaꞌá puꞌuwaré. Reyá aꞌajná ñoꞌojó kajrú wani namaka chapú kaje yajwé.

11 Eyá piká, Tupana jaꞌapiyá jemaꞌajeri, piꞌimá puꞌupejlú puꞌuwaré laꞌakaná, numakare nakú pijló liyá. Pilaꞌá palá; piweꞌepí pitukumó Tupana wátaka ke laꞌakana; pipechu iꞌimá kaja kaphí Tupana chojé; piyuríniña raꞌapiyá iꞌimakana; piwata kaja íkiꞌija Tupana, ajopana inaꞌukena waꞌaté; pipechu laꞌaniño ujwí ajopana inaꞌukena liyá; pilaꞌaniña kaja pipéchuwa ujwí Tupana jaꞌapiyá jemaꞌakana liyá; pilaꞌaniña kaja pikó weꞌepiri ke wani.

12 Pilaꞌá nakaje Tupana wátaka ke, pipechu lokópaꞌala ejé. Riká aꞌarí pijló kajmuchaji, piꞌimakáloje matajnako jeꞌechú chu raú. Riká penaje iꞌiwapari rijluwa piká, kaja kaphí pipechu richojé. Kaja piꞌimá riyukuna najló íkiꞌiruna inaꞌukena jimaje iꞌimaká.

13 Tupana jimaje ke nuwakáraꞌaka piká. Riká aꞌarí piyukeja ejaꞌawá chu iꞌimakáñojlo napechu, neꞌemakáloje raú penaje. Jesucristo jimaje ke nuwakáraꞌaka piká. Ritáraꞌako Poncio Pilato jimaje wakajé, rimá rijló rinakuwá na inaꞌukeka riꞌimaká.

14 Pemaꞌá noꞌopiyá nuwakáraꞌaka piká ke. Pilaꞌá palá, raú unká na kalé kemájeri pinaku: “Unká paala rilaꞌaká”, ke. Ilé keja pilaꞌajika palá, wawakáraꞌajeri Jesucristo iphájika majó ejená.

15 Riphájika rená chojé rijló ejomi, Tupana wakáraꞌajeri piño Riꞌirí Jesucristo majó. Wakáraꞌajeri wani riká, unká apú iꞌimalá richaje wakáraꞌajeri; weꞌepiri kaja piyukeja nakaje laꞌakana nakojé riká. Ajopana wakáraꞌajeño wakáraꞌajeri riká; ajopana chaje iꞌimakaño, chaje wani kaja riká.

16 Rikaja kalé pajluwaja, unká tajnákajo penaje kalé iꞌimajika. Mejámaꞌatani eꞌiyá riká, unká inaꞌuké iꞌijnalajla rawaꞌajé; unká kaja na kalé amárijla riká; ñakeja wani napuraꞌajiko rinaku palá. Piyukeja nakaje laꞌajerí riꞌimajika waꞌajini wani. Ilé keja riꞌimajika.

17 Pimá kajrú leꞌejepelárunajlo, napechu iꞌimaká piyá nanakuwá ajopana inaꞌukena cháꞌatajeño ke wani. Piwakáraꞌa kaja neká, napechu iꞌimaká piyá kaphí leꞌejepelaji, liñeru, kaje chojé. Meketánaja penaje kele kaje, ñakele unká na penaje kalé iná pechu iꞌimaká kaphí ilé kaje chojé. Rikaja kalé Tupana, iná pechu iꞌimakare chojé kaphí, aꞌarí wajló ñóꞌope nakaje, weꞌemakáloje palá raú penaje.

18 Pimá kaja kajrú leꞌejepelárunajlo, nalaꞌakáloje palá ajopana inaꞌukena nakú. Pimá najló, mamejajné naꞌakáloje ajopana ñathé, nakaje kamuꞌují nalaꞌakare nakú aú.

19 Ilé kaje laꞌakana aú kajrú nakaje palani wani iꞌimajika najló jeꞌechú chu, re iná iꞌimajé palá wani.

20 Timoteo, eko paꞌá pinakojó palá piyukeja nakaje numakare nakú pijló. Pemaꞌaniña mapeja puraꞌajeño jaꞌapiyá. Kaja nayurí Tupana purákaꞌalo jaꞌapiyá iꞌimakana, raú unká na penaje kalé nakaje nemakare nakú. Nemá napurákaꞌalo nakú: “Kajrú weꞌepíkaño leꞌejé riká”, ke, eꞌiyonaja mapéjari ta riká kele napuraꞌakaro nakú.

21 Neꞌiyajena aꞌañó nanakojó ilé kaje purákaꞌaloji, raú nayurí naliyó purákaꞌaloji, wapechu iꞌimakare chojé kaphí.