Mékeka iná iꞌimaká ajopana Jesucristo jaꞌapiyá jemaꞌajeño waꞌaté yukuna marí
5
Pakhaꞌaniña pheñawilana wani puꞌuwaré nalaꞌakare chona. Pipuraꞌó najwaꞌaté, iná puraꞌakó iná jaraꞌapá waꞌaté ke kaja, napechu palaꞌakóloje puꞌuwaré nalaꞌakare liyá raú. Ñaké kaja pipuraꞌajiko walijímakana waꞌaté. Iná puraꞌakó iná ejena waꞌaté, ke kaja iná puraꞌakó najwaꞌaté.
2 Ñaké kaja piꞌimajika pheñawilana inaana waꞌaté. Iná jaló waꞌaté iná puraꞌakó, ke kaja iná puraꞌakó najwaꞌaté. Ñaké kaja pipuraꞌajiko ináyana waꞌaté, iná eꞌewelona waꞌaté iná puraꞌakó ke kaja. Pipechu iꞌimaniño manai najwaꞌaté puraꞌakano ejéchami.
Iwakajílomina ñathé aꞌakana yukuna marí
3 Iwakajílomina, nekoja wani yuríkaño, unká na kalé aꞌalárena ñathé, ñathé aꞌajé.
4 Eyá kayaniruna kaꞌajná, kalakénaruna kaꞌajná neꞌemajika ee, neká aꞌajeño nanakojó neká, naꞌakáloje nañathé nakaje kamuꞌují nalaꞌakare nakú aú. Nalamáraꞌaka neꞌemaká wemí naꞌajé najló, nañathé aꞌakana aú. Ilé ke laꞌakana palani Tupánajlo.
5 Marí kajena iwakajílomina ñathé aꞌajé: Unká na kalé aꞌakárena ñathé; kaphí Tupana chojé péchuruna iꞌimajika; kajrú puraꞌakaño kaja Tupana waꞌaté. Ilé kajena ñathé aꞌajé.
6 Eyá iwakajílomina, laꞌañó nekó keyajupa napechu keja, ñathé unká aꞌalaje. Kajmuruna neká, eꞌiyonaja kalé kaja kapichákaño ke neká Tupana liyá.
7 Eko piwakáraꞌa nayani, nalakena, kele aꞌaká nañathé, ajopana puraꞌakó piyá nanaku puꞌuwaré.
8 Unkachu iná aꞌalá iná nakojó iná ejena wani, iná yurí iná liyó Tupana jaꞌapiyá jemaꞌakana ke kaja riká. Ilé ke laꞌakana aú iná cháꞌata ajopana, unká jemaꞌalaño Tupana jaꞌapiyá, puꞌuwaré laꞌakaná aú.
9 Marí kajena iwakajílomina ñathé aꞌajé: Phenawilana wani iꞌimajíkaño, sesenta jarechí cha iꞌimajíkaño, pajluwaja kaja yajná iꞌimakayo penájerumi.
10 Ajopana weꞌepéjeño kaja marí ke laꞌajeyo penájerumi ruká: Palá lamáraꞌakayo ruyani ruꞌumaká; roꞌotaké kaja yaꞌajnaya iphájikaño ruñakaré chojé; Jesucristo jaꞌapiyá jemaꞌajeño nakú rulaꞌaké kaja palá; najló jápajeyo keja ruꞌumajika neꞌiyowá; roꞌoké kaja chapú kaje yajwé amájeño ñathé; palá kaja rulaꞌajika inaꞌuké apú nakaje aú, apú nakaje aú ke. Ilé ke iꞌimakaño iwakajílomina ñathé aꞌajé.
11 Eyá iwakajílomina, unká joꞌó pheñawilana wani kalé iꞌimakaño, ií unká iyaꞌatálaje papera kaje chojé, aꞌakáloje nañathé penaje. Ilé kajena ñathé unká aꞌalaje, re joꞌó kaja napechu iꞌimakale wáꞌakakajo nakú. Riká nakojé unká naꞌalaje nanakojó Jesucristo wátaka ke laꞌakana.
12 Raú unká nalaꞌalaje nakaje ajopánajlo, nemaká rinaku najló iꞌimaká: “Riwátaka ke walaꞌajika”, eꞌiyonaja unká nalaꞌalá ñaké. Ilé kaje pachá unká aꞌalaje nañathé.
13 Ají ñoꞌojó, ají ñoꞌojó ke kaja nachiraꞌakó ajopana, ajopana ke, ñakaré chuwá nekó maláraꞌatakana nakú mapeja. Nachapújraꞌo kaja ajopana nakú; mapeja nakeñoꞌótaka najluwa puraꞌakajo.
14 Ñakele palani nojló iwakajílomina, ináyana joꞌó iꞌimakaño, wáꞌakako piño, nayani iꞌimakáloje piño apú waꞌaté, najápakaloje palá nañakaré chu. Ilé kaje aú chapú nanaku péchuruna unká puraꞌalajo nanaku puꞌuwaré.
15 Numá pijló ilé ke, iwakajílomina nakiyana yuríkale Jesucristo jaꞌapiyá jemaꞌakana, raú naꞌó Jiña Chiꞌinárikana waꞌatéjena penájena.
16 Iwakajílomina ejena wani iꞌimajika ee, palani naꞌaká nañathé nakaje nalaꞌakare aú nakú kamuꞌují. Raú Jesucristo jaꞌapiyá jemaꞌajeño aꞌañojla iwakajílomina, unká wani na aꞌalárena ñathé.
17 Palá Jesucristo jaꞌapiyá jemaꞌajeño amájeño amájika ee najwaꞌatéjena, palani aꞌaká najló najápakaꞌala wemí. Chaje wani aꞌajika najló najápakaꞌala wemí, newíñaꞌatakale palá iká Tupana purákaꞌalo nakú.
18 Marí ke Tupana purákaꞌalo kemaká ñaké laꞌakana nakú: “Nachiraꞌátakachu jema pirakana trigo awakátakanami eꞌiyowá, rikaꞌátakaloje richa nakiyá raꞌarú, unká paala rinuma jepoꞌokana, rajñaka piyá rinakiyana. Richa nakiyana rajñákare iꞌimari rijló rijápakaꞌala wemí keja”, ke rimaká. Ñaké kaja apú jápakachu rikariwate waꞌaté, raꞌá rijló palá rijápakaꞌala wemí, rijápakale rijwaꞌaté.
19 Eyá pajluwaja kaꞌajná arukátajika ee pijló pajluwaja pheñawilá nakiyana, paꞌaniña ripurákaꞌalo pinakojó. Puꞌuwaká iyamá kaꞌajná, weji kele kaꞌajná, kemájika ñaké waja rinaku ee, pimaje: “Kewaka kaꞌajná riká nemakare nakú nojló”, ke.
20 Unkájika ee inaꞌuké yurí naliyó puꞌuwaré laꞌakaná, pakhaꞌá neká ajopana Jesucristo jaꞌapiyá jemaꞌajeño jimaje, ajopana keroꞌokóloje ñaké kaja laꞌakana piyá.
21 Tupana, Riꞌirí Jesucristo, eyá rijwaꞌatéjena jeꞌechú chiyájena, kele jimaje numá pijló, pilaꞌakáloje nakaje nuwakáraꞌaka pilaꞌaká ke. Rejenowaja nuwátaka pilaꞌaká palá inaꞌuké nakú.
22 Paꞌaniña maweꞌepíkanaru ke apú, riꞌimakáloje Jesucristo jaꞌapiyá jemaꞌajeño amájeri penaje. Apala puꞌuwaré laꞌajerí joꞌó kaꞌajná riká. Paꞌajika ee riká, piꞌimajé rijwákeꞌewe ke puꞌuwaré laꞌakaná nakú. Pamá palá pikó, pilaꞌaká piyá puꞌuwaré ajopana waꞌaté.
23 Methú ke pilaꞌakono pitami piwó chiyá, raú numá pijló, piꞌirakáloje wejápaja nakaje jalá amúraꞌatakanami, juni waꞌaté, piwó tepé penaje.
24 Puꞌuwaká puꞌuwaré neꞌiyajena laꞌaká amako; unká chiyó na puraꞌó najwaꞌaté rinaku, kaja ajopana weꞌepiño puꞌuwaré laꞌajeño neká. Eyá neꞌiyajena laꞌañó meꞌechú puꞌuwaré, eꞌiyonaja kalé ajopana weꞌepeje kaja puꞌuwaré nalaꞌakare nakojé.
25 Ñaké kaja puꞌuwaká neꞌiyajena laꞌaká palá amako, raú iná weꞌepí palá laꞌajeñoka neká. Eyá neꞌiyajena laꞌañó namichoꞌojnoja palá, eꞌiyonaja kalé ajopana weꞌepeje kaja palá laꞌajeñó kaja neká.