Nanakiyana yurika Tupana jaꞌapiyá jemaꞌakana yukuna marí
4
Palá Tupana Pechu iꞌimaká wajló ejaꞌawá iphájika rená chojé, kaja penaje wakajé yukuna. Unká paala nalaꞌajika riwakajé. Neꞌiyajena yuréjeño Tupana purákaꞌalo jaꞌapiyá iꞌimakana, lanakiya naꞌajé nanakojó pajlakaje purákaꞌaloji. Jiñana purákaꞌalo nakú newíñaꞌataje neká.
2 Nemaꞌajé pajlákachina jaꞌapiyá. Neká laꞌajeño nanakuwá palá laꞌajeñó ke inaꞌuké ijlú chu, unká ñaké laꞌajeñó kalé neꞌemajika eꞌiyonaja. Puꞌuwaré wani nalaꞌajika, eꞌiyonaja unká wani napechu kawílaꞌalajo rinakojé.
3 Netaje kaja pajwaꞌatéchaka wáꞌakakano apu. Nakaje ajñakaje penaje iꞌimakare nakú nemaje: “Ajñániña riká”, ke. Unká paala ilé ke inaꞌukejlo kemakana, Tupana keñoꞌótakale aꞌajnejí, iná ajñákaloje riká penaje. Iná kemá rijló, “Palá pilaꞌaká nuká raú”, ke.
4 Piyukeja nakaje, rikeñoꞌótakare ajñakaje penaje waja, palani riꞌimakale, ñakele unká na penaje rinaku kemakana iꞌimalá: “Ajñániña riká”, ke. Tupana jaꞌapiyá jemaꞌajeño puraꞌakó rijwaꞌaté kewá, nemaká rijló: “Palá pilaꞌaká weká marí aꞌajnejí aú”, ke. Rejomi najñá riká.
5 Kaja Tupana kemá piyukeja aꞌajnejí nakú: “Palani riká”, ke. Ripalamane riꞌimakale, iná ajñá riká. Ñakele iná kemá rijló: “Palá pilaꞌaká nuká raú”, ke.
Palani Jesucristo waꞌaté jápajeri yukuna marí
6 Pewíñaꞌata ajopana Jesucristo jaꞌapiyá jemaꞌajeño nakaje noꞌopátakare yukuna pijló iꞌimaká nakú, raú piꞌimakáloje palá rijwaꞌaté jápajeri. Kaja kaphí Tupana chojé péchuri piká, paꞌakale pinakojó Ripurákaꞌalo.
7 Paꞌaniña pinakojó mapéjari yuku, unká na penaje kalé iꞌimakare. Tupana purákaꞌalo paꞌá pinakojó, pilaꞌakáloje riwátaka ke penaje.
8 Iná laꞌakachu kaphí, iná péchuwa iꞌimakáloje peyajweni penaje, palani inajlo riká. Eyá iná weꞌepíkachu iná tukumó Tupana wátaka ke laꞌakana, chaje palani inajlo riká. Raú palá iná iꞌimajika marí ejaꞌawá chu, ñaké kaja iná iꞌimajika palá jeꞌechú chu ripalamane aú.
9 Kewaka riká numakare nakú. Palani piyuke inaꞌukejlo riká, neꞌemakáloje raꞌapiyá penaje.
10 Raꞌapátakana ajopánajlo penaje wajapa kajrú; wajñaꞌá kaja chapú kaje yajwé panaku rijimaje. Ilé ke wajló riká, wapechu iꞌimakale Tupana chojé kaphí. Kapechuni riká, unká nachiꞌinárikana jenami ke kalé riká, piyukeja inaꞌuké iꞌimatájeri penaje riká. Jemaꞌañó raꞌapiyá palá, riꞌimataje kapichákajo liyá.
11 Piwakáraꞌa nalaꞌaká nakaje numakare nakú pijló; pewíñaꞌata kaja neká rinaku.
12 Pilaꞌá palá, napechu iꞌimaká piyá pinaku: “Mapéjari keja riká; unká phíyuꞌuke kalé, walijímaka joꞌó riꞌimakale”. Pamata ajopana Jesucristo jaꞌapiyá jemaꞌajeño palani purákaꞌaloji nakú puraꞌakano aú. Piꞌimá palá; piwata kaja íkiꞌija neká; pilaꞌá kaja kaphí pikó Tupana chojé, památakaloje palá neká raú.
13 Ilé kaje laꞌakana nakú piꞌimajé najwaꞌaté, nuphájika pinaku ejená. Awakájiko kewá, pipuraꞌó kaja Tupana purákaꞌalo lanaꞌakéjami waꞌaté najló. Pewíñaꞌata kaja neká rinaku, napechu iꞌimakáloje kaphí richojé raú.
14 Paꞌá pinakojó weꞌepíkaje Tupana aꞌakare pijló iꞌimaká. Pheñawilana toꞌotaka nayátheꞌela pinakojé iꞌimaká wakajé, naꞌapata Ripurákaꞌalo pijló. Nemá pijló Tupana Pechu kemaká najló ke, nakaje pilaꞌajíkare nakú. Riwakajé raꞌá pijló weꞌepíkaje, pilaꞌakáloje raú pijápakaꞌala rijló riwátaka ke.