Jesucristo jaꞌapiyá jemaꞌajeño amájeño yukuna marí
3
Pajluwa kaꞌajná wátari Jesucristo jaꞌapiyá jemaꞌajeño amájeri iꞌimakana. Palani jápakaje riká riwátakare laꞌakana.
2 Ñakele marí ke iꞌimajika, iꞌimajeri amájeri: Unká wani laꞌalá puꞌuwaré; pajluwájaru inanaru waꞌaté wáꞌakajomi kaja riꞌimajika; weꞌepéjeri ripéchuwa iꞌijnatákana palá riꞌimajika; kaphí kaja péchuri riꞌimajika; inaꞌuké iphákare jaꞌapí riꞌimajika; palá kaja aꞌatajika yaꞌajnaya iphájikaño rinaku riñakaré chojé; palá kaja weꞌepika inaꞌuké jewíñaꞌatakana. Ilé ke iꞌimakaño iꞌimajeño amájeño penaje.
3 Eyá marí ke iꞌimakaño, unká meke laꞌajé iꞌimalaje amájeño penaje: Yuwéraꞌakachona, nókakachina, íkiꞌi wátakaño liñeru najluwa. Marí ke iꞌimakáñoja kalé iꞌimáñojla namájeño penaje: Inaꞌuké wani iꞌimakaño; unká yuriná kalé iꞌimakaño; unká kaja akhaꞌákalaño; unká kaja wátalaño íkiꞌi liñéruja najluwa.
4 Weꞌepiño kaja nañakaré chiyájena wakáraꞌakana palá; weꞌepiño kaja nayani lamáraꞌakana palá, nephákaloje naꞌapí penaje.
5 Unkachu naweꞌepila nañakaré chiyájena wakáraꞌakana palá nayani waꞌaté, ¿meke laꞌajé chi naweꞌepijla Jesucristo jaꞌapiyá jemaꞌajeño amákana palá?
6 Meyale keja keñoꞌoká Jesucristo jaꞌapiyá jemaꞌakana, unká meke laꞌajé iꞌimalajla namájeri. Apala rilaꞌá rinakuwá najló weꞌepiri ke wani, Jiñá Chiꞌinárikana laꞌaká rinakuwá iꞌimaká ke kaja, pachá rikapichó Tupana liyá iꞌimaká.
7 Namájeri penaje iꞌimajika iꞌimajeri marí ke: Palá laꞌajerí riꞌimajika, raú unká jemaꞌalaño Tupana jaꞌapiyá waꞌató iphájeño kaja raꞌapí, unká napechu iꞌimalaje Tupana nakú: “Mapéjari riká”, ke. Palá laꞌajerí riꞌimajika ee, unká rilaꞌalaje Jiñá Chiꞌinárikana wátaka ke. Riká aꞌarino iná meꞌé rijluwa, iná laꞌakáloje puꞌuwaré penaje.
Marí ke iꞌimakaño iꞌimajeño Jesucristo jaꞌapiyá jemaꞌajeño ñathé aꞌajeño
8 Marí ke iꞌimakaño iꞌimajeño namájeño ñathé aꞌajeñó: Palájneꞌekena, palá ajopana inaꞌukena pechu iꞌimakárena nakú, pajluwaja chuwá péchuruna. Nemaká inaꞌukejlo, keja laꞌakaño nakaje; unká yuwéraꞌalaño; unká kaja wátalaño kajrú liñeru najlúwaja;
9 kewákaje purákaꞌaloji nakojé iꞌirakaño; unká laꞌalaño nakaje napechu iꞌimakare nakú: “Unká paala ñaké laꞌakana”, ke.
10 Iꞌimá namájeño ñathé aꞌajeñó koꞌoná paineko, aꞌajika neká yámona. Iyurí naꞌaká nañathé meketánaja, amáijla mékeka nalaꞌaká najápakaꞌala. Palá nalaꞌajika ee riká, aꞌá neká namájeño ñathé aꞌajeñó penaje.
11 Ñakeja kaja naluna iꞌimajika. Piyuke inaꞌuké iphájikarena jaꞌapí; unká kaja kachapújreꞌekena kalé neꞌemajika; palá iꞌijnatákaño napéchuwa neꞌemajika; pajluwaja chuwá péchuruna kaja neꞌemajika; laꞌañó piyuke nakaje, nemaká rinaku chuwá neꞌemajika.
12 Eyá achiñá, nañathé aꞌajerí penaje iꞌimajika, iꞌimajeri pajluwájaruja inanaru waꞌaté wáꞌakakajomi. Palá kaja weꞌepika riyani wakáraꞌakana, riñakaré chiyájena waꞌaté.
13 Nalaꞌakachu palá najápakaꞌala, palá kaja ajopana inaꞌukena pechu nanaku. Raú unká na nakú kalé nakawílaꞌo, napechu iꞌimakale kaphí Jesucristo chojé.
Purákaꞌaloji weꞌemakare jaꞌapiyá yukuna marí
14 Meketana iꞌimajemi nuwata pichaje iꞌijnakana, eꞌiyonaja kalé nulanaꞌá pijló marí purákaꞌaloji kaꞌajnó.
15 Apala numaláraꞌajo kemachi re joꞌó kaja maare, raú nuwakáraꞌa pijló marí purákaꞌaloji, piweꞌepíkaloje mékeka iná iꞌimaká palá Tupana leꞌejena inaꞌukena eꞌiyowá. Kajmuni riká; raꞌá wañathé, wamejñátakaloje Ripurákaꞌalo, napiyákaka piyá riká apoꞌojó.
16 Kaphí Jesucristo chojé péchuruna weká, weꞌepiño kewaka riyukuna. Meꞌechuje riyukuna iꞌimaká, unká chiyó Tupana aꞌá majó wajló puꞌuwaká riꞌimaká. Riká chojé wapechu kaphí. Ripurákaꞌalo kemari Jesucristo nakú:
“Inaꞌuké riꞌimaká.
Wanapona ke kaja rinapona iꞌimaká.
Tupana Pechu jaꞌapiyá ke rilaꞌakale nakaje, unká wani rilaꞌalá puꞌuwaré iꞌimaká.
Tupana waꞌatéjena, jeꞌechú chiyájena, amaño kaja riꞌimaká.
Riyukuna iꞌimajeño iꞌimaño kaja riyukuna ajopana teꞌeré eyájenajlo, ajopana teꞌeré eyájenajlo ke,
raú neꞌiyajena, ajopana, ajopana ke iꞌimakaño, jemaꞌañó raꞌapiyá.
Kaja riwaꞌa Riꞌirí Jesucristo jeꞌechú chojé”,
ke Ripurákaꞌalo lanaꞌakéjami kemaká Jesucristo nakú iꞌimaká.