Iná puraꞌakóloje Tupana waꞌaté piyukeja inaꞌukena nakú yukuna marí
2
Apú nakaje chaje nuwátaka piyukeja Jesucristo jaꞌapiyá jemaꞌajeño puraꞌakó Tupana waꞌaté piyukeja inaꞌukena nakú. Iná kejaꞌa riliyá nakaje najló; iná kemá kaja rijló palá rilaꞌakare neká nakú.
2 Iná puraꞌó kaja rijwaꞌaté iná teꞌeré eyá wakáraꞌajeño nakú, ñaké kaja ajopana teꞌeré eyá wakáraꞌajeño nakú. Iná puraꞌó rijwaꞌaté nanaku, neꞌemakáloje palá pajwaꞌatéchaka, napechu iꞌimakáloje Tupana nakuja, raú rejenowaja iná iphákaloje palá raꞌapí.
3 Ilé ke laꞌakana palani weꞌematájeri Tupánajlo.
4 Riká wátari piyukeja inaꞌukena iꞌimatákana kapichákajo liyá; riwata kaja naweꞌepika kewákaje purákaꞌaloji nakojé.
5 Pajluwaja wachiꞌinárikana, riká piyukeja inaꞌuké Chiꞌinárikana. Re kaja pajluwaja inaꞌuké, ripalamane aú piyukeja inaꞌukena iꞌimajla palá Tupana waꞌaté. Jesucristo riká, lamáꞌatari raꞌapiyá jemaꞌajeño pechu Tupánajlo, raú wapechu iꞌimakáloje palá panakojéchaka ke.
6 Riyurí nenoka riꞌimaká, ritakaꞌakáloje piyuke inaꞌuké chaya. Riphaka rená chojé rijló wakajé, raꞌá rikó riꞌimatákaloje iná kapichákajo liyá. Ilé ke rilaꞌakale wachaya aú, waweꞌepí Tupana wátaka weꞌemakó piyukeja kapichákajo liyá.
7 Ñakele raꞌá nuꞌumaká, nuꞌumakáloje riyukuna ajopánajlo, ajopánajlo ke, napechu iꞌimakáloje kaphí richojé raú. Unká judíona kalé iꞌimakáñojlo nuꞌumá riyukuna. Kewaka nakaje numakare nakú, unká nupajlala.
8 Nuwata piyuke inaꞌuké puraꞌakó Tupana waꞌaté, palá napechu iꞌimakáloje rinaku. Iyurí iliyó iyuchá, ipuraꞌakóloje palá rijwaꞌaté. Ipechu iꞌimaniña rinaku: “Apala unká kaꞌajná raꞌalaje rinakojó nupurákaꞌalo”, ke.
9 Inaana nuwata iꞌimaká marí ke ijwaꞌaté: Nuwata naꞌaká nanakuwá aꞌarumakaji mapéjari, mawemí nojé kemachi. Naꞌajé nanakuwá aꞌarumakaji, nanapona amako piyá puꞌuwaká. Unká kaja naꞌatalaje nekó apoꞌojó wani; unká kaja naꞌalaje nanúrupi nakuwá nejnewá palá nojé wani, oro nakiyá laꞌakanami, aꞌarumakaji kawemí nojé, kajémaka.
10 Naweꞌepeje natukumó Tupana wátaka ke laꞌakana, nalaꞌakáloje palá raú, raꞌapí iphájeño neꞌemakale. Palá amákaño, ke kaja riꞌimajika najló.
11 Awakájiko kewá Tupana purákaꞌalo jemaꞌajé, unká inaana puraꞌalajo; manumarú kaja nemaꞌajika newíñaꞌatajeño jaꞌapiyá, nalaꞌakáloje rimaká ke penaje.
12 Eyá unká kaja nuyurila inaana jewíñaꞌataka Tupana purákaꞌalo nakú inaꞌuké nawakákaꞌalo ñakarelana chu. Unká kaja nuyurila inaana wakáraꞌaka achiñana. Nuwata nemaꞌaká manumarú kaja Ripurákaꞌalo nakú jewíñaꞌatajeño waꞌaté.
13 Ilé ke nuwátaka inaana iꞌimaká, Tupana keñoꞌótakale paineko achiñá, rejomi inanaru. Adán, Eva waꞌaté, iꞌimaño paineko wani iꞌimaká.
14 Unká Adán waꞌaté kalé Jiñá Chiꞌinárikana pajlá iꞌimaká, Eva waꞌaté ripajlá. Ruká jemaꞌayó raꞌapiyá iꞌimaká, raú rulaꞌá puꞌuwaré.
15 Eꞌiyonaja inaana iꞌimajeñó kapichákajo liyá, kaphí napechu iꞌimajika ee Tupana chojé, palá kaja nemaꞌajika ee raꞌapiyá, íkiꞌija nawátajika ee riká. Raú palá kaja nalamáraꞌajika nayani.