3 Nuꞌujnaká majó Macedonia teꞌeré ejo iꞌimaká piyá wakajé, mawó numaká pijló iꞌimaká, piyuríkoloje Éfeso e penaje, pimakáloje neꞌiyajénajlo newíñaꞌataka piyá inaꞌuké apoꞌojó, kewákaje purákaꞌaloji liyá,

4 pimakáloje kaja najló, nayuríkaloje naliyó naꞌajútaya michuna purákaꞌalomi aꞌakana nanakojó. Waphereni wani nayukúnami, unká méñoꞌojo iná tajátalajla riyukuna iꞌimakana. Mapéjari yuku kaje nakuja napuraꞌó pajwaꞌatéchaka, unká na penaje ilé kaje nakú puraꞌakano iꞌimalá. Rinakojé unká newíñaꞌatala neká palá Tupana jaꞌapiyá jemaꞌakana nakú.

5 Ñakele nuwata pewíñaꞌataka neká, napechu iꞌimakáloje kaphí Tupana chojé, raú nawátakaloje íkiꞌija pekowáaka, palá péchuruna neꞌemakáloje raú. Ilé ke riꞌimakáloje najló rewá penaje nuwakáraꞌa pewíñaꞌataka neká.

6 Kaja neꞌiyajena yurí naliyó palani purákaꞌaloji, lanakiya napuraꞌó meꞌetení pajwaꞌatéchaka mapéjari purákaꞌaloji nakú.

7 Nawata kaja inaꞌuké jewíñaꞌatakana Tupana purákaꞌalo, Moisés michú lanaꞌakare iꞌimaká, nakú, eꞌiyonaja unká naweꞌepila palá meke kemakánaka riká newíñaꞌatakare nakú.

8 Iná weꞌepíkachu na penájeka Tupana purákaꞌalo, júpimi riyuríkare inaꞌuké jemaꞌakáloje raꞌapiyá penaje, palani rinakojé weꞌepíkana.

9 Re Ripurákaꞌalo puꞌuwaré laꞌajéñojlo, raú naweꞌepíkaloje kapichájeño penájenaka neká, puꞌuwaré nalaꞌakare pachá. Marí ke iꞌimakáñojloja riká: Re inaꞌuké unká wani aꞌalaño nanakojó kewákaje purákaꞌaloji; re kaja neká unká jemaꞌalaño Tupana jaꞌapiyá, unká kaja nemaꞌalá nawakáraꞌajeño jaꞌapiyá; re kaja chapú péchuruna, unká inaꞌukélaruna kaja neká; re kaja namanáicho laꞌajeñó; re kaja neká unká iphálaño Tupana jaꞌapí, unká kaja nephala Ripurákaꞌalo jaꞌapí. Re nayani noño nachiꞌiná, ajopana noño kaja ajopana.

10 Re kaja achiñana, inaana, kele nakiyana laꞌañó namanáicho ajopana, unká naluna kalé iꞌimakaño waꞌaté. Re kaja achiñana nakiyana pajnoꞌoñó panakuwáaka. Re kaja ajopana patañó najluwa inaꞌuké, nawakáraꞌakaloje najápaka najló mapeja. Re kaja pajlákachina. Re kaja ajopana aꞌañó Tupana ií mapeja, unká kewaka kalé nakaje nemakare nakú rií aꞌakana aú. Piyukeja neká laꞌañó apoꞌojó kewákaje purákaꞌaloji liyá, penaje Tupana purákaꞌalo riyuríkare piyuke inaꞌukejlo iꞌimaká.

11 Jesucristo palamane aú Tupana iꞌimatá iná kapichákajo liyá, raú wapuraꞌó palá wani Tupana nakú. Riyukuna iꞌimajeri penaje riwakáraꞌa nuká.

12 “Palá pilaꞌaká nuká”, ke numaká Tupánajlo, rilaꞌakale kaphí nupechu nojló, nulaꞌakáloje nujápakaꞌala penaje. Numá kaja rijló: “Palá pilaꞌaká nuká”, ke, ripechu watánaꞌakale nunakojé, raú raꞌá nuꞌumaká rijwaꞌaté jápajeri penaje.

13 Júpimi unká ñaké kalé nuꞌumajika, puꞌuwaré wani nupuraꞌajiko Jesucristo nakú. Nulaꞌaké kaja chapú raꞌapiyá jemaꞌajeño, raú chapú wani nulaꞌajika riká, eꞌiyonaja kalé raꞌá nuꞌumaká rijwaꞌaté jápajeri penaje. Riweꞌepí numuꞌují, unká nupechu iꞌimalá kaphí richojé riwakajé eꞌiyonaja. Riwakajé nulaꞌaké puꞌuwaré wani, eꞌiyonaja unká nuweꞌepike na aú ka nulaꞌajika puꞌuwaré.

14 Palá wani Tupana laꞌaká nuká, chuwa kaja Jesucristo pechu chuwá nupechu; ripalamane aú nuwata íkiꞌija riká, ajopana inaꞌukena waꞌaté. Chuwa kaphí nupechu richojé ripalamane aú.

15 Jesucristo iphari marí ejaꞌawá nakojé iꞌimaká, riꞌimatákaloje puꞌuwaré laꞌajeñó kapichákajo liyá. Palani piyuke inaꞌukejlo riyukuna jaꞌapiyá jemaꞌakana, kewaka riyukuna. Ajopana chaje nulaꞌajíkano puꞌuwaré,

16 eꞌiyonaja Tupana weꞌepiri numuꞌují iꞌimaká, unká kaja Jesucristo yúchaꞌalo nuchá, rijñaꞌá panaku puꞌuwaré nulaꞌajíkare riwakajé. Ilé ke riꞌimaká nujwaꞌaté paineko, raú ajopana weꞌepiño mékeka Tupana weꞌepika iná muꞌují nakojé. Riweꞌepika numuꞌují iꞌimaká, ke kaja riweꞌepika ajopana muꞌují. Nunakojé ajopana weꞌepiño ilé ke laꞌajérika Tupana, napechu iꞌimakáloje richojé kaphí, nupechu iꞌimaká richojé kaphí ke kaja, raú neká iꞌimajeño kaja jeꞌechú chu matajnako rijwaꞌaté.

17 Iná iphákare wani jaꞌapí Tupana; palá rilaꞌakare nakú napuraꞌajó ñakeja wani. Weꞌemakana wani riká; unká tajnákajo penaje kalé riká; iꞌimajeri wani penaje riká; unká kaja iná amálare riká. Pajluwaja Tupana, iná Chiꞌinárikana. Ñaké riꞌimajika.

18-19 Timoteo, nuꞌurí ke nojló piká. Ñakele nuwakáraꞌa pitaká naliyá pajlakaje purákaꞌaloji nakú jewíñaꞌatakana, apú newíñaꞌataka piyá pajlakaje purákaꞌaloji nakú. Pilaꞌá riká, wanakiyana kemaká Tupana jaꞌapiyá ke pinaku iꞌimaká. Pilaꞌá kaphí pipéchuwa, paꞌapátakaloje neká puꞌuwaré nalaꞌakare liyá. Páchoꞌoniño, ilé pipechu iꞌimakare kaphí Tupana chojé chiyá. Re pipechu nakú nakaje laꞌakana palá, rilokópaꞌalaja pilaꞌá najló nakaje palá rewá. Neꞌiyajena unká laꞌalaño palá napechu nakú riꞌimaká lokópaꞌala, raú napichata naliyó riká, ñakele chuwa unká nemaꞌalá Jesucristo jaꞌapiyá.

20 Ñaké Himeneo, Alejandro, kele laꞌaká iꞌimaká. Raú kaja nuyurí neká Jiñá Chiꞌinárikanajlo, napuraꞌakó piyá puꞌuwaré piño Tupana nakú.