FILEMÓN
Marí ke Pablo wakáraꞌaka Filemonjlo purákaꞌaloji iꞌimaká
1
Maare nujwaꞌaté Timoteo, Jesucristo jaꞌapiyá jemaꞌajeri kaja riká wajwaꞌaté. Rijwaꞌaté wawakáraꞌa pijló marí purákaꞌaloji. Jesucristo yukuna nuꞌumaká chona maare nuká inaꞌuké wajákelana chu meꞌetení. Piká, Filemonjlo, wawakáraꞌa marí purákaꞌaloji. Wajápakaꞌala wákeꞌewe piká, palá wapechu pinaku.
2 Wawakáraꞌa kaja marí purákaꞌaloji Jesucristo jaꞌapiyá jemaꞌajeño piñakaré chojé awakákañojlo. Weꞌeweló Apia, eyá Arquipo, kélejlo piyaꞌataje kaja riká. Arquipo jápari kaja Tupánajlo, weká ke kaja.
3 Nuwata Tupana, Riꞌirí Jesucristo waꞌaté, laꞌaká inaku palá. Waraꞌapá wani Tupana, eyá Jesucristo wawakáraꞌajeri wani.
Íkiꞌija Filemón wátaka Tupana yukuna marí
4 Nupuraꞌakó Tupana waꞌaté kewá nupuraꞌakó pinaku, numano rijló pinaku: “Palá pilaꞌaká nuká, remaꞌakale paꞌapiyá”, ke.
5 Nemá kaja nojló pinaku: “Íkiꞌija Filemón wátaka Tupana, rileꞌejena inaꞌukena waꞌaté. Kaphí wani kaja ripechu Jesucristo chojé”.
6 Nupechu, ke kaja pipechu Tupana chojé kaphí. Nupuraꞌó kaja Tupana waꞌaté pinaku, piweꞌepíkaloje richaje, richaje ke, meke Jesucristo laꞌaká iná nakú palá wani nakojé.
7 Puꞌují nupechu pinaku, íkiꞌija piwátakale Tupana, ajopana inaꞌukena waꞌaté. Palá pilaꞌakare iꞌimari kaja palá ajopana Jesucristo jaꞌapiyá jemaꞌajeño nakú, palá nupechu laꞌakó raú.
Pablo wátari Filemón laꞌaká rijwaꞌaté jápajerijlo nakaje yukuna marí
8 Jesucristo jaꞌapiyá jemaꞌajeri piká; raꞌapiyá jemaꞌajeño wakáraꞌajeri nuká. Ñakele nuwátakela, nuwakáraꞌajla pilaꞌaká nakaje numaká ke.
9 Kajrú nuwátaka piká, ñakele numá pijló: Eko pilaꞌá nojló nakaje. Kaja phíyuꞌuke cha nuká; Jesucristo wakáraꞌakarena riyukuna iꞌimajé nakiyana nuká. Inaꞌuké wajákelana chu nuká meꞌetení, nomaꞌakale Jesucristo jaꞌapiyá.
10 Numá pijló: Eko pilaꞌá Onésimojlo nakaje. Maare inaꞌuké wajákelana chu nuꞌumanoja rikeñoꞌó Jesucristo jaꞌapiyá jemaꞌakana, ñakele chuwa kaphí ripechu Jesucristo chojé, nuꞌumakale riyukuna rijló iꞌimaká.
11 Júpimi rijápake pijwaꞌaté. Mapeja wani rijápajika pijló iꞌimajika, unká paꞌaké rijló riwemí. Chuwa, kaliyani riká nojló, ñaké kaja riꞌimajika pijló.
12 Ilé kaꞌajnó nuwakáraꞌaje piño riká, rapumí chuwá pijwaꞌaté jápaje. Eko pipechu iꞌimá palá rinaku, pipechu iꞌimaká nunaku ke kaja.
13 Palani nojló riyuríkelo nujwaꞌaté maare, raꞌakáloje nuñathé maare inaꞌuké wajákelana chu nuꞌumaká ketana; papumí chojé keja riyuríkojla, raꞌakáloje nuñathé. Jesucristo yukuna nuꞌumaká ajopánajlo chona nuká maare inaꞌuké wajákelana chu.
14 Unká nuwátala riyuriko maare, unkaja ke pipechu iꞌimá ñaké kaja rinaku. Unká kaja nuwátala pijló kemakana: “Eko pimá rijló, riyuriko nujwaꞌaté maare”, ke. Piwátajika ee riyuriko, riyurejo maare. Palani kaja nojló, ilé ke pipechu nakú riꞌimajika ee.
15 Apala meketánaja kaꞌajná Onésimo iꞌijnañaaka piꞌimaká, rejomi riꞌimakáloje pijwaꞌaté, ejaꞌawá chu piꞌimajika ketana penaje.
16 Mapeja pijwaꞌaté jápajeri riꞌimajika; chuwa, unká ñakeja kalé riꞌimajika. Palá wani nupechu rinaku. Kajrú kaja piwátajika riká; nuwátaka riká chaje piwátajika riká, pijwaꞌaté jápajeri riꞌimakale. Wejena nakiyana riká chuwa, Jesucristo jaꞌapiyá jemaꞌajeri riꞌimakale.
17 Pipechu iꞌimajika ee nunaku: “Noꞌowé riká”, ke, pajñakani wapechu iꞌimakale kaphí Jesucristo chojé, e ñaké kaja pipechu iꞌimajé rinaku.
18 Apala rilaꞌá kaꞌajná chapú piꞌimaká; re joꞌó kaja kaꞌajná rilewérika pijló. Eko pimá nojló, noꞌokáloje pijló riwemí.
19 Nuká Pablo lanaꞌarí pijló marí nuyátheꞌela aú; nuká aꞌajeri pijló rilewérikare wemí. Iꞌimaká eꞌiyonaja, numá pijló: Nochojé kalé piꞌimaó iꞌimaká, unká naje kalé numá pijló, naka riká numá, kaja piweꞌepíkale naka riká.
20 Noꞌowé piká, pemaꞌakale Jesucristo jaꞌapiyá, nomaꞌaká raꞌapiyá ke kaja. Palá Jesucristo jaꞌapiyá jemaꞌajeño laꞌaká papechúkaka, ñakele pilaꞌá numaká pijló ke. Raú pilaꞌajé nupechu palá.
21 Numá pijló ilé ke, nuweꞌepíkale pilaꞌajika numaká pijló chaje wani.
22 Re apú nakaje nuwata pilaꞌaká: eko pilamáꞌata nopukuna nupé, nuyuríkoloje pijwaꞌaté penaje. Kaja ipuraꞌó Tupana waꞌaté nunaku, náchoꞌotakaloje nuká inaꞌuké wajákelana chiyá penaje, ñakele nuꞌumajé kaꞌajnó ijwaꞌaté.
Kaja penaje Pablo kemakare nakú Filemonjlo marí
23 Epafras kemari pinaku: “Eko palá rijló kaꞌajnó”, ke. Maare riká inaꞌuké wajákelana chu nujwaꞌaté, Jesucristo jaꞌapiyá jemaꞌajeri riꞌimakale.
24 Ñaké kaja Marcos, Aristarco, Demas, Lucas, kele kemaká pinaku: “Eko palá rijló kaꞌajnó”, ke. Neká kalé aꞌañó nuñathé nujápakaꞌala laꞌakana aú.
25 Nuwata wawakáraꞌajeri Jesucristo laꞌaká iká palá kaꞌajnó.
Kaja.