Waweꞌepíkaloje Jesucristo watukumó penaje yukuna marí
12
Kajrú wapiyá, kaphí Tupana chojé péchuruna iꞌimaká. Ñakele wayurichi waliyó nakaje kawílaꞌari wapechu nakú iꞌimakare, ñaké kaja puꞌuwaré laꞌakaná, riká kechíraꞌakale wajló wapechu. Weꞌejnatachi kaphí wapéchuwa nakaje watukumó iꞌimajíkare laꞌakana nakú, walaꞌakáloje piyuke palá, Tupana wátaka ke.
2 Chuwa, waweꞌepíjika Jesucristo ja kalé watukumó, ripalamane aú wapechu iꞌimakale kaphí richojé. Ñakeja wapechu iꞌimajika kaphí richojé, kaja penaje ejená. Aꞌawaná apiyákakanami nakojé nenó riꞌimaká, unká inaꞌukélarunaja kalé nenoke ñaké iꞌimajika. Ñakele paini wani ilé ke takaꞌakana iꞌimaká, eꞌiyonaja unká raꞌalá rinakojó riꞌimaká, riweꞌepíkale puꞌují ripechu iꞌimajika rejomi. Chuwa Tupana awaꞌá riká; ajopana chaje riká; Tupana waꞌaté wakáraꞌajeri kaja riká.
3 Iꞌijnatá ipéchuwa Jesús nakú: chapú wani puꞌuwaré laꞌajeñó pechu iꞌimaká rinaku, raú nalaꞌá riꞌimaká chapú wani. Ñakele numá ijló: Ilaꞌaniña ujwí raꞌapiyá jemaꞌakana nakú; jáchoꞌoniño kaja raꞌapiyá jemaꞌakana chiyá.
4 Iká ñaꞌanó chapú kaje panaku, eꞌiyonaja unká joꞌó puꞌuwaré laꞌajeñó nola iká.
5 Tupana yaní iká, ¿kaja chi ipechu kapicháñaa rilaꞌakare jenakú iꞌimaká? Tupana kemari wanaku:
“Nuꞌurí, nuwajájika ee piká, piweꞌepeje napenájeka riká.
Apala numaje kaja pijló nakaje pilaꞌakare nakú: ‘Unká paala riká’, ke.
Pilaꞌaniña ujwí pikó raú.
6 Nuká, iwakáraꞌajeri, wajari íkiꞌija nuwátakarena.
Nuyani iꞌimakale, nuwajá iká, jáchoꞌokoloje palá péchuruna penaje”, a
ke Tupana kemaká wanaku.
7 Ñakele ijñaꞌá chapú kaje yajwé panaku. Iná jaraꞌapá wajari iná, iná jáchoꞌokoloje palá rijló raú penaje. Iná jaraꞌapá wajaka iná, ke kaja Tupana wajaka iká chapú kaje yajwé amákana aú, reyá aꞌajná ñoꞌojó ilaꞌakáloje palá penaje. Amaka aú chapú kaje yajwé, iweꞌepí riyánika iká. Unká na kalé iꞌimari, unká raraꞌapá wajálare.
8 Unkachu Tupana wajala iká, unká riyani ke wani kalé iká rijló.
9 Yuwaná weꞌemaké wakajé, wachiꞌiná laꞌakeño wenakú, wephákaloje raú naꞌapí penaje. Richaje wani palaka Tupana laꞌaká weká. Raú wayureje wachó rijló, waweꞌepíkale riwajaka weká, weꞌemakáloje palá rijwaꞌaté jeꞌechú chu.
10 Meketánaja iná marí ejaꞌawá chu, eꞌiyonaja iná chiꞌiná laꞌá iná jenakú, iná jáchoꞌokoloje palá najló. Eyá Tupana wajari weká wajlúwaje penaje, weꞌemakáloje riká ke kaja raú unká japi laꞌalaño puꞌuwaré ke rijló penaje.
11 Riwajaka weká ketánaja kalé wapechu laꞌakó kamuꞌují, unká wawátalare. Reyá aꞌajná ñoꞌojó, kaja waweꞌepí palá laꞌakaná watukumó, palá wapechu iꞌimakale raú.
Iná jáchoꞌoko piyá Tupana jaꞌapiyá iꞌimakana chiyá yukuna marí
12 Ipechu iꞌimá piño kaphí; jáchoꞌo ujwí kaje ipechu chiyá.
13 Iꞌijnatá kaja ipéchuwa palani purákaꞌaloji nakú, jáchoꞌoko piyá richiyá, iꞌimakáloje palá laꞌajeñó penaje. Raú aꞌajé unká weꞌepílaño palá, Tupana wátaka ke laꞌakana nakojé ñathé.
14 Atáꞌajla palá iꞌimakana piyukeja inaꞌukena waꞌaté; atáꞌajla kaja puꞌuwaré laꞌakaná yuríkana iliyó. Unká na kalé iꞌimajé wawakáraꞌajeri Jesucristo waꞌaté, wátari re joꞌó kaja puꞌuwaré laꞌakaná nakú.
15 Aꞌá inakojó pekowáaka, jáchoꞌoko piyá Tupana palamane jaꞌapiyá iꞌimakana chiyá. Aꞌá kaja inakojó pekowáaka, inakiyana pechu iꞌimaká piyá chapú Tupana nakú. Chapú napechu iꞌimajika ee rinaku, napichátaje kajrú inakiyana pechu riliyá.
16 Ilaꞌaniña imanáicho ajopana waꞌaté; ilaꞌaniña kaja Tupana yukuna mapéjari ke ijluwa. Ilé ke Esaú michú laꞌaká iꞌimaká. Nakaje raraꞌapá michú yurijla rijló iꞌimaká, napheꞌé riꞌimakale, eꞌiyonaja kewí meꞌepijí iꞌimaká rijló wakajé, rijmeremi kemari rijló: “Noꞌojé pijló aꞌajnejí, piyuríjika ee nuká nakaje jaꞌapiyá papumí chojé”, ke. Remaꞌá raꞌapiyá, raú rijmerémijlo nakaje yuró.
17 Kaja iweꞌepí meke riꞌimaká Esaujlo. Riwata nakaje yuriko rijló, eꞌiyonaja raraꞌapá itari rapu rijló. Unká méñoꞌojo rapiyákala nakaje rimakare nakú reꞌewejlo, raú chapú riwó iꞌimaká richó. Iyakaje waꞌaté riwata raraꞌapá apiyákaka rimakare nakú reꞌewejlo, eꞌiyonaja unká rapiyákakana iꞌimalá rijló.
18 Unká riꞌimalá ijló, riꞌimaká Israel lakénamijlo júpimi iꞌimaká ke. Tupana aꞌarí Moisés michujlo Ripurákaꞌalo jipa nakú lanaꞌakéjami, ipuré jiꞌiwata nakú riꞌimaká wakajé. Riwakajé kajrú keraꞌathani lukúnaꞌako ipuré nakiyá iꞌimaká. Kalájmaꞌani japi riꞌimaká; kaphí wani karená aphoꞌoká iꞌimaká.
19 Unká kaja jemaꞌalá luwiluwí kaje mejé, nemaꞌaká ke; unká kaja jemaꞌalá Tupana puraꞌakó ijwaꞌaté, nemaꞌaká ke. Mawó nemaká rijló: “Pipuraꞌaniño wajwaꞌaté”, ke.
20 Ilé ke nemaká Tupánajlo, rimakale nanaku paineko: “Na kaꞌajná, inaꞌuké kaꞌajná, ipirana kaꞌajná, iphájika ee ipuré nakojé, inó riká jipa aú, wejrukú aú kaꞌajná”, ke rimaká iꞌimaká.
21 Kajrupi wani nakaje namájikare iꞌimajika najló, raú Moisés kemari najló: “Kajrú nukurúkaka, nukeroꞌokó aú”.
22 Eyá ijló, unká ñaké kalé riká. Tupana jaꞌapiyá jemaꞌajeño iꞌimakale, iꞌimajé rijwaꞌaté jeꞌechú chu. Re Tupana, unká mapeja kalé riyukuna. Kajmuni riká, waꞌaté iꞌimajé re. Íkiꞌiruna wani rijwaꞌatéjena, jeꞌechú chiyájena (ángeles), waꞌaté iꞌimajé. Re ipuraꞌajó palá Tupana nakú.
23 Tupana yaní iká, re iꞌimajé piyukeja riyani, ipiyá iꞌimakaño waꞌaté. Re napéchumi rijwaꞌaté meꞌetení. Tupana weꞌepiri mékajenaka iꞌimajika re, kaja lanaꞌakéjami neí ripapérane chu. Neká rijló unká japi laꞌalaño puꞌuwaré ke. Nanaku rimaje pajluwánojlo, pajluwánojlo, mékeka rijló nakaje nalaꞌakare iꞌimaká.
24 Iká iꞌimajeño Jesucristo waꞌaté jeꞌechú chu. Re iꞌimajé wajé purákaꞌaloji jaꞌapiyá. Ichaya puraꞌajero Tupana waꞌaté Jesucristo. Ritakaꞌaká wachaya wakajé, rírami iꞌijnari itapuwa aphumi chiyá wajlojé penaje, raú Tupana amó wachaje puꞌuwaré walaꞌakare liyá. Unká ñaké kalé riꞌimaká Caín noka Abel wakajé. Rírami iꞌijnari kaja raphú chiyá, pachá Tupana wajari Caín iꞌimaká.
25 Tupana wajari ejaꞌawá chujena nakiyana iꞌimaká, unká aꞌalaño nanakojó Ripurákaꞌalo riyuríkare Moisesjlo iꞌimaká. Richaje wani riwajájika neká, unká aꞌalaño nanakojó Ripuraꞌakó jeꞌechú chiyá.
26 Tupana yurika Moisejlo Ripurákaꞌalo wakajé, teꞌerí ñakaꞌaró Tupana puraꞌakó rijwaꞌaté aú. Ñaké kaja riꞌimajika piño. Marí ke rimaká rinaku iꞌimaká: “Nukurúkataje piño ejaꞌawá, unká rikaja kalé, jeꞌechú waꞌató”, ke rimaká.
27 Rimá piño: “Nukurúkataje piño ejaꞌawá”, ke, raú waweꞌepí rimaká nakaje rikeñoꞌótakare nakú iꞌimaká. Riká kapichájero. Reyá aꞌajná ñoꞌojó, nakaje yuréjero, unká kapichákajo penaje kalé iꞌimajíkare.
28 Unká kapichákajo penaje kalé nakaje rewá iꞌimakare, ñakele wemá Tupánajlo: “Palá pilaꞌaká weká”, ilé ke riꞌimajíkale wajló. Ipechu iꞌimá puꞌují Tupana nakú; iweꞌepí kaja re rijwaꞌaté iꞌimakana itukumó; iphá kaja raꞌapí palá, ilaꞌakáloje piyuke nakaje palani rijló iꞌimakare.
29 Keraꞌathani kapichátaka nakaje, ke kaja Tupana kapichátajika piyukeja nakaje, unká riliyá iꞌimalare.