Rejenowaja iná wátakaloje pekowáaka, yukuna marí
2
Nojena, kaphí péchuruna iká Jesucristo, piyukeja laꞌajerí chojé. Ñakele unká paala ipechu iꞌimaká neꞌiyajena nakuja kalé palá, eyá ajopana nakú kaꞌajná ujwí.
2 Apala awakako Tupana purákaꞌalo jemaꞌajé, e kaꞌajná pajluwa inaꞌuké mujlúkaꞌari awakákaꞌalo ñakarelana chojé. Palani raꞌarumaká waꞌaté, palani kaja anillo, uwiru (oro) nakiyá laꞌakanami riyatewana nakú ke. Rijwaꞌaté ke kaja kaꞌajná apú, puꞌuwareni wani aꞌarumakari iphaka.
3 Ilé palani aꞌarumakárijlo kaꞌajná imajla: “Piyaꞌo maare palani ñákaꞌajori chu”, ke. Eyá apú kamuꞌují laꞌakajlo imajla kaꞌajná: “Ilérejeja pitáraꞌo, aꞌajná teꞌerí eꞌiyá piyaꞌo piwátajika ee”, ke kaꞌajná imakajla rijló.
4 Ilé ke laꞌakana unká wani paala Tupánajlo, unkale ilaꞌalá inaꞌuké nakú palá pajimato. Namákana aú ja amá neká palá kaꞌajná, ujwí kaꞌajná. Unká paala ipechu iꞌimaká, ilaꞌakale ñaké.
5 Nojena, íkiꞌija nuwátakarena, jemaꞌá marí: Tupana iꞌiwapari rijluwa inaꞌuké eꞌiyayá neká, nemakárena nakú kamuꞌují laꞌakaño neká, ke. Eꞌiyonaja rijló kajrú laꞌakaño ke neká, napechu iꞌimakale kaphí richojé. Raú raꞌajé najló nakaje rarukákare piyukeja riwátajeñojlo.
6 Eyá iká, kajrú laꞌakaño inakuwá, iphaño jaꞌapiwá kajrú wani kamuꞌují laꞌakáñojlo. Eyá kajrú leꞌejepeláruna nakú ipechu palá, nalaꞌaká iká chapú eꞌiyonaja. Neká wáꞌañono iká apala ke iwakáraꞌajeño ejo, nawajákaloje iká penaje.
7 Neká, kajrú leꞌejepeláruna nakiyana, puraꞌañó kaja puꞌuwaré wawakáraꞌajeri Jesucristo nakú. Rijwaꞌatéjena iká. Riká, palá wapuraꞌakaro nakú, napuraꞌó nakú puꞌuwaré.
8 Palá ilaꞌaká, ilaꞌakachu Tupana purákaꞌalo, riyuríkare ijló iꞌimaká, wakáraꞌaka iká ke. Riká kemari: “Iwata íkiꞌija ajopana inaꞌukena, iwátaka ikó ke kaja”. Ilé ke laꞌakana aú iná laꞌá palá wani, apú nakaje chaje wani palaka.
9 Ipechu iꞌimakachu neꞌiyajena nakuja kalé palá, eyá neꞌiyajena nakú ipechu ujwí, unká paala ilaꞌaká, unkale ilaꞌalá Tupana purákaꞌalo kemaká ke. Raú ilaꞌá puꞌuwaré.
10 Apala ilaꞌá piyukeja palá, Ripurákaꞌalo kemaká ke, eꞌiyonaja kalé pajluwaja kaꞌajná unká ilaꞌalá palá, raú unká na penaje palá ilaꞌakare iꞌimalá ijló.
11 Tupana kemari kalúyuna iꞌimakaño nakú, nalaꞌaká piyá namanáicho ajopana waꞌaté. Rimá kaja: “Inóniña inaꞌuké”. Apala unká kaꞌajná pilaꞌalá pimanáicho ajopana waꞌaté, eꞌiyonaja pinó kaꞌajná inaꞌuké, raú unká pilaꞌalá Ripurákaꞌalo kemaká ke.
12 Chuwa wajé purákaꞌaloji jaꞌapí iká, Jesucristo jaꞌapiyá jemaꞌajeño iꞌimakale. Ripurákaꞌalo aꞌakana inakojó aú ilaꞌajé palá. Tupana kemájeri inaꞌukejlo meke nalaꞌakana iꞌimajika piyukeja nakaje nalaꞌakare iꞌimaká, eyá nakaje nemakare nakú iꞌimaká lokópaꞌala.
13 Tupana kemájeri piyukeja inaꞌukena, pajluwano kejlo, mékeka rijló piyukeja nakaje nalaꞌakare marí ejaꞌawá chu neꞌemaká ketana iꞌimaká. Unkachu naweꞌepila inaꞌuké muꞌují, unká kaja riweꞌepílaje namuꞌují riwakajé. Naweꞌepíkachu inaꞌuké muꞌují meꞌetení, palani neꞌemajika rijló riwakajé.
Kaphí iná pechu iꞌimakachu Jesucristo chojé, palá iná laꞌaká nakaje. Riyukuna marí
14 Nojena, re kaꞌajná pajluwa inakiyana kemá rinakuwá: “Kaphí nupechu Jesucristo chojé”, ke, eꞌiyonaja unká rilaꞌalá palá ajopana inaꞌukena nakú, raú unká na penaje ilé ke rimakare rinakuwá iꞌimalaje rijló.
15 Re kaꞌajná inakiyana laꞌañó kamuꞌují aꞌarumakaji nakú, ñaké kaja aꞌajnejí nakú.
16 Raú kaꞌajná apú inakiyana kemá najló: “Eko iꞌijná palá kaꞌajnó. Rejo kaꞌajná aꞌarumakaji iꞌimajé ijló; palá kaja kaꞌajná ajñájika aꞌajnewá rewá”, ke. Eyá unkájika ee raꞌá najló nakaje kamuꞌují nalaꞌakare nakú, unká na penaje ilé ke rimakare najló iꞌimalaje.
17 Ñaké kaja riká inajlo: kaphí kaꞌajná iná pechu Tupana chojé, eꞌiyonaja unká kaꞌajná iná laꞌalá palá ajopana nakú, raú unká na penaje riꞌimalaje inajlo.
18 Apala pajluwa kaꞌajná kemá apujlo: “Piká kemari pinakuwá: ‘Kaphí nupechu Tupana chojé’, ke, eꞌiyonaja unká pilaꞌalá na palá. Eyá nuká laꞌarí nakaje palá, kaphí nupechu iꞌimakale Tupana chojé. Nakaje palá nulaꞌakare aú iweꞌepí kewaka kaphí nupechu richojé”.
19 Apala piꞌijnatá pipéchuwa: “Re pajluwaja wachiꞌinárikana, Tupana”. Palani pipéchuwa iꞌijnatákana ilé ke, eꞌiyonaja kalé ñaké kaja jiñana iꞌijnataka napéchuwa Tupana nakú, akuwaná nakeroꞌó kajrú wani ripiyá.
20 Piꞌimaniña mapechuru wani. Kewaka pipechu iꞌimakejla kaphí richojé, pilaꞌajla palá nakaje.
21 Tupana kemari waꞌajuta Abraham michú nakú iꞌimaká: “Unká japi rilaꞌalá puꞌuwaré iꞌimaká ke nojló riká, rilaꞌakale numaká rijló ke, rinókalejla nojló riꞌirí puꞌuwaré nalaꞌakare chaya iꞌimaká”.
22 Ilé ke rilaꞌaká aú, iná weꞌepí kaphí wani ripechu iꞌimaká Tupana chojé. Remaꞌakale raꞌapiyá, rilaꞌá palá rimaká rijló ke.
23 Ilé ke rilaꞌaká aú rilaꞌá Tupana purákaꞌalo kemaká rinaku júpimi iꞌimaká ke. Rimá rinaku: “Kaphí Abraham pechu iꞌimakale Tupana chojé aú, rimá rinaku: ‘Unká japi rilaꞌalá puꞌuwaré iꞌimaká ke nojló riká’ ”. Ilé ke laꞌajerí riꞌimakale, riyuró Tupana wákeꞌewe ke.
24 Tupana kemari wanaku: “Palá laꞌajeñó ke neká nojló, napechu iꞌimakale kaphí nochojé, raú piyukeja nakaje nalaꞌakare palá waja”.
25 Ñaké kaja Tupana kemaká Rahab micholo nakú. Ñujuꞌukeru ruꞌumaká. Palá rulaꞌaká Tupana leꞌejena inaꞌukena nakú, nephaka ruñakaré ejo iꞌimaká wakajé. Rumá najló iꞌimaká, nayuríkoloje rujwaꞌaté ruñakaré chu. Rejomi ruwakáraꞌa napaꞌakó apú iñeꞌepú chuwá, napinana noka piyá neꞌemaká. Ilé ke rulaꞌakale nanaku palá, Tupana kemari runaku: “Unká japi laꞌalayo puꞌuwaré iꞌimaká ke nojló ruká”.
26 Unkákela iná pechu iꞌimajla iná napona eꞌiyá, unká na penaje iná napona iꞌimalajla rejéchami. Ñaké kaja riká pijló. Pimakachu pinakuwá: “Kaphí nupechu Tupana chojé”, ke, eyá unkachu pilaꞌalá palá, unká na penaje ilé ke pimakare pinakuwá iꞌimalaje pijló.