Purákaꞌaloji yukuna marí
3
Nojena, unká paala kajrú inakiyana wátakajla Tupana purákaꞌalo nakú jewíñaꞌatajeño penaje iꞌimakana. Piyukeja Ripurákaꞌalo nakú jewíñaꞌatajeño nakú rimaje rikoja ajopana chaje, mékeka nakaje nalaꞌakare rijló iꞌimaká.
2 Piyuke weká laꞌañó nakaje unká paala. Eyá apala pajluwa kaꞌajná weꞌepiri wani ripurákaꞌalo nakú kemakana, ripuraꞌakó piyá puꞌuwaré. Riká palá laꞌajerí, riweꞌepíkale palá ripechu wakáraꞌakana.
3 Kamuꞌujini iná numá, iná puraꞌó chiyá, eꞌiyonaja iná kemá kajrú nakaje nakú richiyá. Kamuꞌujini kaja pejruꞌuwá naꞌá kawarú numá chojé ritewíyoꞌojona penaje. Kajruni kawarú, eꞌiyonaja riká aú rinaku jaꞌapájeri tewíyoꞌo riká riwátaka iꞌijnakana ejo.
4 Ñaké kaja wapuru: kajruni wani riká, eꞌiyonaja kamuꞌujini ritewíyoꞌojona. Kaphí karená jaꞌapátaka riká, eꞌiyonaja raꞌapátajeri jaꞌapátari riká riwátaka ejo ritewíyoꞌojona kamuꞌujini aú.
5 Ñaké kaja wanuma: kamuꞌujini wani riká, eꞌiyonaja wemá kajrú purákaꞌaloji nakú richiyá. Kamuꞌujini keraꞌathani, eꞌiyonaja iná káraꞌakachu iná iꞌikakapere eꞌiyá raú, kajrú wani rilukúnaꞌako.
6 Keraꞌathani ke, purákaꞌaloji wemakare nakú wanuma chiyá, ñakele neꞌiyajena laꞌañó chapú wani ajopana napurákaꞌalo, puꞌuwareni nemakare nanaku, aú. Puꞌuwaré wapuraꞌakaro pachá wakapichata wekó; pachá kaja walaꞌá Jiñá Chiꞌinárikana wátaka ke.
7 Inaꞌuké weꞌepiño piyukeja ejaꞌawá yajné, eyá juni yajné, kajena laꞌakana manaꞌikena. Yuriná iꞌimakaño waꞌató, naweꞌepí kaja laꞌakana manaꞌikena.
8 Eyá iná numá, unká joꞌó wani na weꞌepila meke rilaꞌakana, iná puraꞌakó piyá puꞌuwaré richiyá. Riká puꞌuwaré kaje unká wani na cháꞌatalare, kaja puwini, chapú wani laꞌaká iná, ke riꞌimakale.
9 Wanuma chiyá wapuraꞌó palá wachiꞌinárikana Tupana nakú; richiyaja kaja wapuraꞌó unká wani paala inaꞌuké, Tupana keñoꞌótakarena renámiwa nakojé iꞌimaká, nakú.
10 Rikaja, iná numá chiyá, iná kemá palani purákaꞌaloji nakú; richiyá kaja iná kemá puꞌuwaré nojé purákaꞌaloji nakú. Nojena, ilé kaje unká wani paala.
11 Unká meke laꞌajé pajluwa muthú chiyá juni jáchoꞌolojla keꞌiyapé: ipijílani kaꞌajná, pumélani waꞌaté, kajiparálani kaꞌajná waꞌaté pajñakani.
12 Ñaké kaja, unká meke laꞌajé pipirí aꞌalajla richawá punama icha, ke kaja; unká kaja meke laꞌajé kajmú arúkaꞌalajla piriyé icha, ke kaja.
Kewaka nakojé weꞌepíkana yukuna marí
13 Re kaꞌajná eꞌiyá pajluwa weꞌepiri wani kajrú nakaje nakojé. Rilaꞌare palá nakaje ajopana eꞌiyowá. Rilaꞌañina kalé rinakuwá ajopana chaje wani weꞌepika ke, kapechuni wani riꞌimaká eꞌiyonaja.
14 Eyá chapú pipechu iꞌimakachu ajopana cha, nacháꞌatakale piká, unká Tupana liyaje kalé ilé ke iná péchuwa iꞌijnatákana. Akhaꞌákakajo nakú kaꞌajná piká ajopana waꞌaté, raú unká kewákaje purákaꞌaloji jaꞌapiyá iꞌimaká ke kalé piká.
15 Unká Tupana liyaje kalé ilé ke iná péchuwa iꞌijnatákana, Jiñá Chiꞌinárikana liyaje riká. Puꞌuwaré laꞌakaná nakuja inaꞌuké pechu iꞌimakale, iná laꞌá ilé keja.
16 Chapú ipechu iꞌimakale panakuwáaka, akhaꞌákako pajwaꞌatéchaka, ñakele unká paala iká pajwaꞌatéchaka.
17 Eyá Tupana aꞌakárenajlo kajrú weꞌepíkaje iꞌimaño palá pajwaꞌatéchaka. Rejenowaja nalaꞌaká piyuke inaꞌuké nakú palá, Tupana jaꞌapiyá neꞌemakale. Naꞌá kaja chapú kaje yajwé amájeño ñathé.
18 Wátaño palá inaꞌuké waꞌaté iꞌimakana, laꞌañó palá ajopana nakú, raú palá wani neꞌemajika pajwaꞌatéchaka.