Unká jemaꞌalaño Tupana jaꞌapiyá yukuna marí
4
¿Naje nókakajo nakú, eyá akhaꞌákakajo kaje nakuja iká pajwaꞌatéchaka? Chapú ipechu iꞌimakale panakuwáaka, iká ilé ke pajwaꞌatéchaka.
2 Kajrú wani iwátakajla nakaje ijluwa, eꞌiyonaja unká meke laꞌajé ijñaꞌalá ijluwa riká, pachá kaꞌajná inó inaꞌuké, akhaꞌákako kaja pajwaꞌatéchaka rijimaje. Ilé ke ilaꞌaká eꞌiyonaja, unká ijñaꞌalaje nakaje iwátakare ijluwa, unká pachá ikejáꞌala Tupana liyá riká.
3 Ikejáꞌakachu nakaje riliyá, unká raꞌalá ijló riká, ikejáꞌakale riliyá riká, ilaꞌakáloje raú iwátaka ke penaje.
4 ¡Meke unká wani ta iwátala Tupana jaꞌapiyá jemaꞌakana, iwátakale kajrú ijluwa nakaje marí ejaꞌawá chu iꞌimakare! Kaja iweꞌepí iná wátakachu kajrú inajluwa nakaje marí ejaꞌawá chu iꞌimakare, lanakiya unká iná wátalaje kajrú Tupana.
5 Ripurákaꞌalo kemari: “Noꞌó inaꞌuké nakiyánajlo Nupechu, riꞌimakáloje nawakáraꞌajeri penaje. Nupechu mejajnena neká, unká riwátala inaꞌuké yurika noꞌopiyá jemaꞌakana”, ke rimaká.
6 Kajrú Tupana aꞌaká wañathé. Ripurákaꞌalo kemari: “Unká Tupana aꞌalá kajrú laꞌakaño nanakuwá ñathé; eyá unká laꞌalaño kajrú nanakuwá ñathé raꞌá”, ke rimaká.
7 Jemaꞌá palá Tupana purákaꞌalo jaꞌapiyá. Itáraꞌo kamachá Jiñá Chiꞌinárikanajlo, raú riñaajó iliyá.
8 Iwata Tupana iꞌimaká ijwákeꞌewe, raú riꞌimajé ijwákeꞌewe. Iꞌijnatániña ipéchuwa puꞌuwaré laꞌakaná nakú; iyurí iliyó rilaꞌakana. Kaja iwátajla Tupana jaꞌapiyá jemaꞌakana, eꞌiyonaja ñaké kaja iwátaka ijluwa nakaje ejaꞌawá chu iꞌimakare. Ñakele iꞌijnatá ipéchuwa richuwaja naka iwata laꞌakana.
9 Apala kamuꞌují ipechu nakaje puꞌuwaré ilaꞌakare iꞌimaká aú, pachá kaꞌajná kajrú iyaka. Jupejé kajrú iꞌichajika, eyá chuwa amaka chapú kaje yajwé, raú kamuꞌují wani ipechu.
10 Ilaꞌá inakuwá maliyáruna ke Tupánajlo, raú rilaꞌajé inaku palá wani.
11 Nojena, ipuraꞌaniño puꞌuwaré panakuwáaka. Puraꞌaró puꞌuwaré rinakiyana nakú, kemari kaꞌajná rinaku, Tupana wajákaloje riká penaje. Puraꞌaró kaja puꞌuwaré Ripurákaꞌalo nakú, laꞌarí rinakuwá Tupana chaje ke, remaꞌaká piyá raꞌapiyá.
12 Pajluwa yuriri wajló Ripurákaꞌalo. Rikaja kaja kalé kemájeri wanaku mékeka walaꞌakana iꞌimajika: riꞌimataje kaꞌajná weká, rikapichátaje kaꞌajná weká. Eyá piká, ¿na chi piká, pimakáloje apú nakú mékeka rilaꞌakana iꞌimajika?
Unká waweꞌepila mékeka weꞌemajika muní ke yukuna marí
13 Jemaꞌá, iꞌijnataño ipéchuwa marí ke: “Chuwajá kaꞌajná, apala muní kaꞌajná, weꞌejnajika pajimila ejo. Re weꞌemajé pajluwaja jarechí ketana kaꞌajná nakaje warúwaꞌakana nakú, eyá nakaje aꞌakana nakú ajopánajlo, ñaké wakánakaloje kajrú liñeru wajluwa”, ke.
14 Mapeja wani ipuraꞌakó ilé ke, unkale iweꞌepila mékeka iꞌimajika muní ke, ijamani keja weꞌemakale. Meketánaja ijamani witúkaꞌaka, rejomi rikapichó kiñaja. Ñaké kaja weká ejaꞌawá chu.
15 Marí ke imakela palani: “Wawakáraꞌajeri Tupana wátajika ee, weꞌemajé ejaꞌawá chu walaꞌakáloje nakaje”, ke.
16 Eꞌiyonaja kajrú wani ipuraꞌakó, raú ilaꞌakáloje inakuwá ajopana cháꞌatajeño ke wani. Ilé ke laꞌakaná unká wani paala.
17 Weꞌepiri palá laꞌakaná nakojé, unkachu rilaꞌalá riká ñaké, rilaꞌá puꞌuwaré raú.