Tupana iꞌimataka inaꞌuké kapichákajo liyá yukuna marí
2
Ñaké iꞌimakale, waꞌajé wani wanakojó chuwa Jesucristo yukuna wemaꞌakare iꞌimaká, wapechu iꞌimaká piyá riliyá apoꞌojó.
2 Júpimi Tupana wakáraꞌa rijwaꞌatéjena, jeꞌechú chiyájena, jaꞌapátaka inaꞌukejlo Ripurákaꞌalo iꞌimaká. Neꞌemakárenajlo riyukuna júpimi iꞌimaká riwajá, unká pachá naꞌalá nanakojó Ripurákaꞌalo.
3 Unká wani weꞌemalajo kapichákajo liyá, walaꞌajika ee mapeja ke wajluwa palá wani rilaꞌakare wachaya iꞌimaká. Wawakáraꞌajeri Jesucristo iꞌimari paineko Tupana iꞌimataka inaꞌuké kapichákajo liyá yukuna iꞌimaká. Raꞌapiyá jemaꞌajeño weꞌepiño kewaka riꞌimaká, raú naꞌapata kaja wajló Ripurákaꞌalo iꞌimaká.
4 Eyá Tupana laꞌarí kaja kajrú nakaje weꞌiyá, waweꞌepíkaloje raú kewaka riꞌimaká. Ripechu aꞌarí raꞌapiyá jemaꞌajeño nakiyánajlo weꞌepíkaje apujlo, apujlo ke, riwátaka ke, raú walaꞌakáloje palá ajopana nakú riwátaka ke.
Inaꞌuké, weká ke kaja Jesucristo iꞌimaká. Riyukuna marí
5 Apú ejaꞌawá iꞌimajeri piño. Riwakajé re kaja richu iꞌimajíkaño wakáraꞌajeño iꞌimajika. Unká Tupana aꞌalaje rijwaꞌatéjena, jeꞌechú chiyájena nakiyana, rewájena wakáraꞌajeño penaje.
6 Re Tupana purákaꞌalo lanaꞌakéjami chu riyukuna, pajluwa kemari Tupánajlo:
“¿Meke chi pijló inaꞌuké, paꞌakáloje pinakojó neká penaje?
7 Piká wakáraꞌari neká, neꞌemakáloje pijwaꞌatéjena,
jeꞌechú chiyájena jaꞌapejé, neꞌemajika meketánaja.
Palá wani pipechu nanaku.
Palá pilaꞌaká neká, ajopana inaꞌukena pechu iꞌimakáloje palá nanaku raú.
Piyuke nakaje pilaꞌakare iꞌimakáloje naleꞌejé penaje, paꞌajé kaja neká.
Paꞌajé kaja neká, neꞌemakáloje ajopana wakáraꞌajeño penaje,
8 neꞌemakáloje kaja piyukeja nakaje minaná penaje”,
ke rimaká Tupánajlo.
Tupana kemari inaꞌuké nakú: “Noꞌojé neká piyukeja inaꞌukena wakáraꞌajeño penaje; piyukeja nakaje iꞌimajíkare minaná neꞌemajika”, ke rimaká. Maárejecha, unká joꞌó wamala ñaké riká.
9 Maare ejaꞌawá chu Jesucristo iꞌimaká wakajé, riꞌimá Tupana waꞌatéjena, jeꞌechú chiyájena jaꞌapejé. Íkiꞌija wani Tupana wátaka inaꞌuké, ñakele riwata Jesucristo takaꞌaká nachaya iꞌimaká. Raú rilaꞌá palá piyukeja inaꞌukena nakú.
10 Tupana leꞌejé waja piyukeja nakaje, rikeñoꞌótakale riꞌimaká. Riwakáraꞌa Riꞌirí Jesucristo ñaꞌaká chapú kaje yajwé panaku, raú riꞌimatákaloje inaꞌuké kapichákajo liyá. Raú rilaꞌá palá piyukeja Tupana wátakare kaje. Neꞌematájeri riꞌimakale, piyukeja raꞌapiyá jemaꞌajeño ripalamane.
11 Tupana unká wajálaje raꞌapiyá jemaꞌajeño puꞌuwaré nalaꞌakare pachá, Jesucristo aꞌakale neká rijwaꞌatéjena penaje. Jesucristo jaraꞌapá Tupana. Neká, raꞌakárena rijwaꞌatéjena penaje, jaraꞌapá riká. Raú Jesucristo kemari nanaku: “Nojena neká”, ke. Unká rapáñaꞌalo ñaké nanaku kemakana jaꞌapí.
12 Tupana purákaꞌalo lanaꞌakéjami kemari Jesucristo nakú meke rimaká Raraꞌapajlo iꞌimaká:
“Tupana, nuꞌumajé piyukuna nojénajlo.
Notaneje kaja piyale kajrú inaꞌukena awakákaꞌalo eꞌiyá”.
13 Rimá kaja rijló:
“Kaphí nupechu iꞌimajika pichojé.
Eyá piyani, paꞌajíkarena nojló, waꞌaté nuꞌumajé maare”,
ke rimaká Raraꞌapajlo.
14 Rimakárena nakú: “Piyani neká”, ke, inaꞌuké neká rimá nakú ñaké. Jesucristo aꞌakáloje penaje wañathé, riꞌimá weká ke kaja inaꞌuké. Ñaké riꞌimakale wajwaꞌaté, ritakaꞌá wachaya iꞌimaká, raú rikapichátakaloje Jiñá Chiꞌinárikana jápakaꞌala raꞌapiyá jemaꞌajeño liyá. Jiñá Chiꞌinárikana pachá inaꞌuké kapichó.
15 Kajmuruna inaꞌukena iꞌimaká ketana, nakeroꞌokó takaꞌakaje piyá. Nakeroꞌokó piyá takaꞌakaje piyá aú, Jesucristo takaꞌarí inaꞌuké chaya iꞌimaká.
16 Unká raꞌakáloje Tupana waꞌatéjena, jeꞌechú chiyájena, ñathé penaje kalé riphá majó iꞌimaká. Riphá majó, raꞌakáloje kaphí Tupana chojé péchuruna. Abraham pechu iꞌimaká richojé kaphí, ke kaja péchuruna ñathé aꞌajé riphá.
17 Raꞌakáloje nañathé penaje riꞌimá najwaꞌaté neꞌewé ke, ñakele riweꞌepí namuꞌují. Aꞌawaná apiyákakanami nakojé ritakaꞌá inaꞌuké chaya iꞌimaká, ripalamane aú ramákoloje kaphí richojé péchuruna chaje. Ilé ke laꞌakana aú rilamáꞌata inaꞌuké Tupánajlo. Purákaꞌaloji lamáꞌatajeri inaꞌuké chaya Tupana waꞌaté penaje riká.
18 Puꞌuwaré laꞌakaná aꞌarí kaja Jesucristo meꞌé rijluwa iꞌimaká, rilaꞌakáloje puꞌuwaré penaje, eꞌiyonaja unká rilaꞌalá puꞌuwaré iꞌimaká. Ilé ke riꞌimakale rijló iꞌimaká, riweꞌepí wañathé aꞌakana, walaꞌaká piyá puꞌuwaré, puꞌuwaré laꞌakaná aꞌakachu wameꞌé rijluwa.