Moisés michú iꞌimaká, chaje péchuri Jesucristo iꞌimaká. Riyukuna marí
3
Nojena, Jesucristo jaꞌapiyá jemaꞌajeño iká. Ñakele Tupana aꞌarí iká, iꞌimakáloje rileꞌejena inaꞌukena penaje. Chuwa, iꞌijnatá ipéchuwa Jesucristo nakú. Ripurákaꞌalo jaꞌapátajeri penaje Tupana wakáraꞌa riꞌimaká majó, eyá chuwa, rilamáꞌata wachaya purákaꞌaloji Tupana waꞌaté. Kaphí wapechu riká, wemakare nakú ajopánajlo chojé.
2 Ramákaloje rileꞌejena penaje, Tupana aꞌarí Moisés iꞌimaká. Palá ramájika neꞌemajika. Ñaké kaja Jesucristo laꞌajika palá nakaje najló, Tupana wakáraꞌajika ke.
3 Moisés pechu iꞌimaká chaje wapechu palá Jesucristo nakú, ripalamane weꞌemakale Tupana leꞌejena. Wamájeri penaje iꞌimaká chaje riká, aꞌarí inaꞌuké Tupana leꞌejena penaje.
4 Iná amákachu ñakareji, iná weꞌepí re rilaꞌajeri. Ñaké kaja Tupana, piyukeja nakaje ejaꞌawá chu iꞌimakare, eyá jeꞌechú chu iꞌimakare waꞌaté keñoꞌótajeri, ñakele rileꞌejé waja nakaje piyuke.
5 Palá Moisés amaka Tupana leꞌejena inaꞌukena iꞌimaká, rijwaꞌaté jápajeri riꞌimakale. Nakaje rilaꞌajíkare aú naweꞌepike kaja mékeka nakaje iꞌimajika aꞌajná ñoꞌojó chami.
6 Palá Jesucristo aꞌaká rinakojó rileꞌejena inaꞌukena, Tupana iꞌirí riꞌimakale. Puꞌují péchuruna weꞌemajika, wapechu iꞌimajika ee kaphí richojé, aꞌajná watakaꞌajika ejená.
Re watánaꞌakaje Tupana leꞌejena inaꞌukénajlo. Riyukuna marí
7 Tupana Pechu kemari:
“Naꞌapátajika ee Tupana purákaꞌalo yukuna ijló,
8 ijnúchaꞌaniño naꞌapiyá remaꞌakana aú,
aꞌajútaya michuna laꞌajika, desierto chu neꞌemaká wakajé ke.
9 Iyamá inaꞌuké leꞌejé kele (40) jarechí ketana
aꞌajútaya michuna amaka nulaꞌaká nakaje palá neꞌiyowá iꞌimaká.
Eꞌiyonaja nalaꞌaké apoꞌojó wani nakaje nuwátaka liyá, namákaloje mékeka nulaꞌaká raú.
10 Ilé ke nalaꞌaká iꞌimaká pachá, nuyúchaꞌo nachá,
raú numá nanaku: Apú kajé purákaꞌaloji chuwá napéchuwa iꞌijnatájeño neká ñakeja.
Unká wani nawátala napéchuwa iꞌijnatákana Nupurákaꞌalo chuwá.
11 Puꞌuwaré nalaꞌajíkare pachá, nuyúchaꞌako nachá.
Raú numá nanaku:
Unká wani nephálaje teꞌerí, norukákare najló iꞌimaká, ejo.
Ilé kaje pachá, unká kaja nawatánaꞌalaje mapeja chiraꞌakano nakú liyá”.
12 Nojena, iꞌimá kapechúruna, iyurika piyá Tupana jaꞌapiyá jemaꞌakana. Apala eꞌiyajena unká weꞌepila Tupana, raú unká wani napechu iꞌimalá rinaku. Kajmuni, kapechuni riká, ñakele ipechu pajnoꞌoniño riliyá.
13 Apoꞌojó ilaꞌá ilé kaje liyá; iweꞌepí Tupana iꞌimataka kaphí Jesucristo chojé péchuruna kapichákajo chiyá. Ilaꞌá penakúchaka, ipechu laꞌakó piyá ujwí Tupana liyá. Ujwí péchuruna nakiyana laꞌañó apoꞌojó riwátaka ke liyá.
14 Jesucristo waꞌatéjena weꞌemajika, unkaja ke wayurí waliyó richojé iꞌimakana kaphí. Júpimi eyá wakeñoꞌó kaphí richojé iꞌimakana; ñakeja wapechu iꞌimajika ee kaphí richojé watakaꞌajika ejená, weꞌemajé rijwaꞌatéjena wani.
15 Tupana purákaꞌalo lanaꞌakéjami kemari:
“Neꞌemajika ee Tupana yukuna ijló, ijnúchaꞌaniño naꞌapiyá remaꞌakana nakú,
júpimi aꞌajútayami chuna iꞌimaká desierto chu iꞌimaká, ke kaja.
Iꞌimaniña neꞌemaká ke.
Neká núchaꞌaño noꞌopiyá jemaꞌakana nakú iꞌimaká”.
16 Neká, Moisés jáchoꞌotakarena Egipto teꞌeré eyá iꞌimaká, jemaꞌañó Tupana purákaꞌalo iꞌimaká, eꞌiyonaja kalé nejnúchaꞌo raꞌapiyá jemaꞌakana nakú.
17 Desierto chu neꞌemaká wakajé, neꞌiyajena laꞌakeño puꞌuwaré, pachá nakapichó iꞌimaká, Tupana yúchaꞌakole nachá. Iyamá inaꞌuké leꞌejé kele (40) jarechí ketana neꞌemaká desierto eꞌiyá.
18 Unká jemaꞌalaño Tupana jaꞌapiyá nakú rimá: “Unká nephálaje teꞌerí, norukákare najló iꞌimaká ejo. Unká kaja watánaꞌakaje iꞌimalaje najló, nawatánaꞌakaloje mapeja chiraꞌakano liyá”.
19 Unká pachá nemaꞌalá raꞌapiyá, unká riyurila nephaka teꞌerí rarukákare najló iꞌimaká ejo.