4
Re joꞌó kaja Tupana kemaká inaꞌuké nakú, nawatánaꞌakaloje nakaje nalaꞌakare liyá, neꞌemakáloje rijwaꞌatéjena penaje. Ñakele wamachi wekó palá, riꞌimaká piyá apoꞌojó wajló.
2 Tupana iꞌimataka inaꞌuké kapichákajo liyá yukuna neꞌemá najló iꞌimaká, neꞌemaká wajló riyukuna iꞌimaká ke kaja. Eꞌiyonaja unká na penaje riyukuna iꞌimalá najló, unkale napechu iꞌimalá kaphí Tupana chojé.
3 Eyá weká, raꞌapiyá jemaꞌajeño pechu kaphí richojé, raú kalé rijwaꞌatéjena weká chuwa. Ñakele watánaꞌakaje rimakare nakú yuriro wajló. Tupana kemari júpimi iꞌimakaño nakú marí ke iꞌimaká:
“Nuyúchaꞌakole nachá,
unká wani nephálaje teꞌerí norukákare najló iꞌimaká ejo.
Unká kaja watánaꞌakaje iꞌimalaje najló.
Numaká nanaku iꞌimaká, keja riꞌimajika najló”.
Tupana keñoꞌótari ejaꞌawá, jeꞌechú, eyá piyukeja richu iꞌimakare waꞌató. Piyukeja riñapátaka rijápakaꞌala laꞌakana iꞌimaká wakajé riwátanaꞌa.
4 Tupana keñoꞌótari piyukeja nakaje iꞌimaká. Ripurákaꞌalo lanaꞌakéjami eꞌiyá rimá iyamá kuwáꞌata ke kala laꞌaká (7) nakú:
“Iyamá kuwáꞌata ke kala iꞌimaká wakajé,
Tupana watánaꞌa rijápakaꞌala laꞌakana liyá”.
5 Eyá Tupana kemari desierto eꞌiyowá chiraꞌakaño iꞌimaká nakú:
“Unká nephálaje teꞌerí, najlojé penaje iꞌimakare ejo, unkale nemaꞌalá noꞌopiyá.
Ñakele najló unká nawatánaꞌakaje iꞌimalaje nujwaꞌaté”,
ke rimaká.
6 Tupana iꞌimatari inaꞌuké kapichákajo liyá. Paineko jemaꞌakaño riyukuna iꞌimaká, unká wani aꞌalaño nanakojó riyukuna iꞌimaká, pachá unká nawatánaꞌala rijwaꞌaté iꞌimaká. Ñakele ajopánajlo re watánaꞌakaje, nawatánaꞌakaloje riwakajé Tupana waꞌaté.
7 Waweꞌepí ñaké riká, Tupana kemakale apú weꞌechú kaꞌalá nakú, inaꞌuké watánaꞌakáloje rapi penaje. Re kaja wajló kele nemakare nakú, wawatánaꞌakaloje rapumí Tupana waꞌaté. Júpimi iꞌimakaño yámojo, David michú kemari kaja rinaku Tupana Pechu jaꞌapiyá ke marí ke:
“Chuwaka neꞌemajika ee Tupana yukuna ijló,
ijnúchaꞌaniño naꞌapiyá remaꞌakana nakú”.
8 Josué michú wáꞌari Israel lakénami teꞌerí, Tupana arukákare najló iꞌimaká ejo. Watánaꞌakaje iꞌimakela najló riwakajé, unká Tupana kemalajla piño apú watánaꞌakaje nakú.
9 Ñakele chuwa re watánaꞌakaje raꞌapiyá jemaꞌajéñojlo.
10 Tupana watánaꞌaka nakaje rilaꞌakare liyá iꞌimaká, ke kaja nawatánaꞌaka chuwa nakaje nalaꞌakare liyá.
11 Walaꞌachí chuwa wapechu lokópaꞌala palá, raú weꞌemakáloje Tupana waꞌaté watánaꞌakaje pukuna chu. Ilé ke walaꞌajika ee, unká weꞌemalaje, unká jemaꞌalaño Tupana jaꞌapiyá iꞌimaká ke kaja.
12 Unká weꞌemalaje neká ke, Tupana purákaꞌalo laꞌakale weká kapechúruna wani. Piyukeja nakaje laꞌajerí riká. Puweꞌení jajalu, iyamá pumitanó irerí, ke riká, rimujlúkaꞌakalejla yaꞌajnaje nakaje iná joꞌokare eꞌiyajé. Ñaké kaja Tupana purákaꞌalo iphaka yaꞌajnaje iná pechu eꞌiyajé, raú iná weꞌepí mékeka rijló nakaje iná iꞌijnatákare iná péchuwa nakú. Raú iná weꞌepí kaja mékeka rijló nakaje iná wátakare laꞌakana.
13 Piyukeja nakaje Tupana keñoꞌótakare eꞌiyowá, unká na iꞌimalá rijló michoꞌotákeja ke; puꞌuwaká waja rijló piyukeja nakaje. Piyukeja weꞌemajika rijimaje jeꞌechú chu. Re rimaje wajló mékeka rijló nakaje walaꞌakare marí ejaꞌawá chu weꞌemaká ketana iꞌimaká.
Purákaꞌaloji lamáꞌatajeri wani Jesucristo wachaya Tupana waꞌaté. Riyukuna marí
14 Tupana iꞌirí Jesucristo. Jeꞌechú chu riká, rikaja kalé pajluwa purákaꞌaloji lamáꞌatajeño wakáraꞌajeri wani. Wachaya rilamáꞌata purákaꞌaloji Tupana waꞌaté; ilé ke riꞌimakale wajló, ipechu iꞌimá kaphí Ripurákaꞌalo jaꞌapiyá iꞌimakana nakú. a
15 Wapurákaꞌalo lamáꞌatajeri wajló riká. Riweꞌepí kaja wamuꞌují, riweꞌepíkale mékajenaka weká, unká wapechu iphala palá laꞌakaná lokópaꞌala. Riweꞌepí kaja mékeka nakaje iꞌimajika wajló, inaꞌuké riꞌimakale iꞌimaká, weká ke kaja. Rijñaꞌá chapú kaje yajwé panaku iꞌimaká. Puꞌuwaré laꞌakaná aꞌaká wameꞌé rijluwa, ke kaja raꞌaká rimeꞌé rijluwa iꞌimaká, eꞌiyonaja unká wani rilaꞌalá puꞌuwaré iꞌimaká.
16 Weká ke kaja Jesucristo iꞌimakale, walaꞌachí chuwa wapéchuwa kaphí, wapuraꞌakóloje rijwaꞌaté piyukeja nakaje nakú penaje. Ripalamane weꞌemakale, riweꞌepí wamuꞌují; raꞌá kaja wañathé piyukeja nakaje walaꞌakare kamuꞌují nakú aú.