5
Israel lakénami nakiyana eꞌiyayá Tupana aꞌaké apú, apú ke, purákaꞌaloji lamáꞌatajeño wakáraꞌajeri penaje, riká lamáꞌatakaloje purákaꞌaloji inaꞌuké chaya rijwaꞌaté. Raꞌaké kaja nakaje mapeja Tupánajlo; rinoke kaja pirájina nakiyana, inaꞌuké apumí chojé ke rijló, puꞌuwaré nalaꞌajíkare chaya.
2 Riweꞌepike kaja inaꞌuké palaꞌatákana puꞌuwaré nalaꞌajíkare liyá. Neká ke kaja riꞌimakale, riweꞌepike kaja mékajenaka neꞌemajika, mapeja jaꞌajíkaño puꞌuwaré laꞌakaná chojé, unkale napechu iꞌimaké palá laꞌakaná nakú. Raú riweꞌepike nañathé aꞌakana. Riweꞌepike kaja palani purákaꞌaloji chiyá jáchoꞌojeño ñathé aꞌakana.
3 Puꞌuwaré laꞌajerí kaja riꞌimakale, ajopana ke kaja, rinoke paineko napirana nakiyana puꞌuwaré rilaꞌakare chaya, rejomi puꞌuwaré ajopana laꞌakare chaya.
4 Unká na kalé aꞌakeri rikó, riꞌimakáloje purákaꞌaloji lamáꞌatajeño wakáraꞌajeri penaje, Tupánaja kalé aꞌakeri neká. Paineko raꞌakare iꞌimaká ií iꞌimari Aarón.
5 Unká kaja rikoja kalé Jesucristo aꞌaká rikó iꞌimaká, riꞌimakáloje purákaꞌaloji lamáꞌatajeño wakáraꞌajeri. Tupana aꞌarí riꞌimaká, rimá rinaku:
“Nuꞌurí piká; chuwa, piyukeja weꞌepíjika Nuꞌurí piká”.
6 Rimá kaja rijló:
“Ñakeja piꞌimajika purákaꞌaloji lamáꞌatajeri inaꞌukejlo nujwaꞌaté,
Melquisedec iꞌimaká purákaꞌaloji lamáꞌatajeri iꞌimaká, ke kaja”,
ke rimaká.
7 Maare ejaꞌawá chu nenoka Jesucristo yámona iꞌimaká wakajé, ripuraꞌó Tupana, weꞌepiri iná iꞌimatákana takaꞌakaje chiyá waꞌaté, raꞌakáloje wani riñathé. Riwakajé rawíyoꞌoko ripuraꞌakó rijwaꞌaté, riyako waꞌató. Tupana jemaꞌarí raꞌapiyá riꞌimaká, riwátaka ke laꞌajerí riꞌimakale.
8 Tupana iꞌirí riꞌimaká eꞌiyonaja, rijñaꞌá chapú kaje yajwé panaku, palá remaꞌakale Raraꞌapá jaꞌapiyá.
9 Nalaꞌajika riká chapú, eꞌiyonaja remaꞌá Raraꞌapá jaꞌapiyá, rilaꞌakáloje piyuke riwátaka ke. Raú Tupana aꞌá riꞌimaká, riꞌimatákaloje raꞌapiyá jemaꞌajeño kapichákajo liyá, neꞌemakáloje matajnako rijwaꞌaté jeꞌechú chu.
10 Ñaké iꞌimakale, Tupana aꞌá Riꞌirí purákaꞌaloji lamáꞌatajeño wakáraꞌajeri inaꞌuké chaya penaje, Melquisedec iꞌimaká ke kaja.
Richaje, richaje ke napechu iꞌimakáloje kaphí Jesucristo chojé penaje yukuna marí
11 Re joꞌó kaja joꞌó ñóꞌope riyukuna, numakáloje rinaku ijló penaje, eꞌiyonaja nuweꞌepí puwichani ijló rinakojé weꞌepíkana, ijnú iwátakale remaꞌakana.
12 Jupichúnami iká Jesucristo jaꞌapiyá jemaꞌajeño, ñakele chuwa jewíñaꞌatajla kaja ajopana rinaku, eꞌiyonaja kalé unká joꞌó iweꞌepila palá rinakojé. Raú re joꞌó kaja apú jewíñaꞌataka iká rinaku. Puꞌuwakatani Tupana purákaꞌalo nakú aú jewíñaꞌatakana palani, kerákoꞌopana ke iꞌimakale rinakojé weꞌepíkanajlo. Naló chuꞌuchúreja kerákoꞌopana weꞌepí iꞌirakana, unkale naweꞌepila naꞌajnewá ajñakana, pheñawilana ajñaka naꞌajnewá ke. Neká ke kaja iꞌimakale, unká na jewíñaꞌatala iká Tupana purákaꞌalo puwicha nojé nakú.
13 Kerákoꞌopana ke piyukeja, unká weꞌepílaño Tupana purákaꞌalo nakojé; unká kaja naweꞌepila palá laꞌakaná nakojé, puꞌuwaré laꞌakaná liyá.
14 Eyá pheñawilá ke iꞌimakaño weꞌepiño Tupana purákaꞌalo nakojé palá, raú nalaꞌá palá rimaká ke. Naweꞌepí kaja palá laꞌakaná nakojé, nalaꞌaká piyá ñaké puꞌuwaré.