6
Chuwa, unká wemalaje piño ijló purákaꞌaloji iná kemakare nakú wajé keñoꞌokaño Tupana purákaꞌalo jemaꞌakánajlo ke. Najló iná kemá paineko, napechu iꞌimakáloje kaphí Jesucristo chojé, riꞌimatákaloje neká kapichákajo liyá, nayuríkaloje puꞌuwaré laꞌakaná naliyó. Kaja pulapecha iká jemaꞌaká riyukuna, ñakele unká nuꞌumalaje piño ijló riyukuna. Maare eyá weꞌejnataje wapéchuwa, walaꞌakáloje piyukeja nakaje Tupana wátaka ke nakú.
2 Unká kaja nowíñaꞌatalaje iká bautismo kaje nakú; unká kaja nowíñaꞌatalaje iká iná yátheꞌela toꞌotákana Jesucristo jaꞌapiyá jemaꞌajeño nakiyana nakojé, neꞌemakáloje Tupana waꞌaté jápajeño raú. Unká kaja nowíñaꞌatalaje iká kaja takaꞌakaño makápoꞌojiko piño nakú; unká kaja numalaje ijló mékeka Tupana wajájika ñakeja wani unká jemaꞌalaño raꞌapiyá nakú.
3 Tupana wátajika ee, wemaje ijló apú nakaje nakú.
4 Neꞌiyajena keñoꞌoñó Jesucristo jaꞌapiyá jemaꞌakana; naweꞌepí kaja mékeka nakaje iꞌimajika najló jeꞌechú chu nakojé; nakeñoꞌó kaja Tupana Pechu jaꞌapiyá iꞌimakana;
5 palá napechu Tupana purákaꞌalo nakú. Namá kaja mékeka Tupana laꞌaká palá nakaje, rikaja kalé laꞌakare, raú naweꞌepí meke laꞌajérika riká.
6 Ilé kaje nakojé weꞌepéjeño neꞌemaká eꞌiyonaja, nayurí naliyó Tupana chojé iꞌimakana kaphí, raú napechu pajnoꞌó riliyá. Unká meke iná laꞌalajla neká, napalaꞌatákoloje piño napéchuwa puꞌuwaré nalaꞌakare liyá. Unká inaꞌukélaruna iꞌimakaño nenoke aꞌawaná apiyákakanami nakojé iꞌimajika. Unká ilé ke laꞌajerí kalé Jesucristo iꞌimaká, eꞌiyonaja nenó ñaké riꞌimaká. Kaja yuríkaño naliyó raꞌapiyá jemaꞌakana, laꞌañó riká unká inaꞌukélari ke najluwa. Raú nalaꞌá piño namákaja riká.
7 Nakaje ichá ijí, iná ejátakare teꞌerí eꞌiyajé, ke inaꞌukena nakiyana. Juni jaꞌakó reꞌiyajé aú palá nakaje icha ijí iphaka reꞌiyá. Ñaké kaja Tupana palamane aú neꞌiyajena laꞌaká palá.
8 Eyá kawichicha kaꞌajná iná iꞌikakapere, lukú kaje, jimichi kaje iphákale reꞌiyá aú, unká na penaje kalé riꞌimakale, iná káraꞌa riká. Ñaké kaja Tupana laꞌaká neká unká wátalaño raꞌapiyá iꞌimakana. Neká kajena amájeño riwajájika neká yajwé, unkale nalaꞌalá palá ripalamane aú.
9 Eyá ijló nojena, nuwátakarena, unká ñaké kalé riꞌimajika. Waweꞌepí palá Tupana laꞌajika iká, riꞌimatákarena kapichákajo liyá iꞌimakale.
10 Iká unká yurílaño iliyó raꞌapiyá jemaꞌakana. Riweꞌepí palá ilaꞌakare nakojé; riweꞌepí kaja palá aꞌajika ajopana Jesucristo jaꞌapiyá jemaꞌajeño ñathé. Ñakeja joꞌó aꞌaká nañathé meꞌetení.
11 Puꞌují ipechu palá laꞌakaná nakú. Wawata iꞌimaká ñakeja laꞌakana nakú, aꞌajná Jesucristo paꞌajiko piño majó ejená, raú nakaje jeꞌechú chu iꞌimakare yuréjero ijló.
12 Ñakele ilaꞌaniña ijnú nakaje ilé kaje chaya. Ajopana, kaphí péchuruna Tupana chojé, unká laꞌalaño napéchuwa ujwí raꞌapiyá jemaꞌakana nakú, chapú kaje yajwé namaka eꞌiyonaja. Raú raꞌajé najló nakaje rimakare nakú najló iꞌimaká ke.
13 Júpimi Tupana kemari Abraham michujlo iꞌimaká, nakaje palani rilaꞌajíkare rijló nakú. Unkale na apú iꞌimalá richaje wani péchuri. Rimá rijló rinakuwaja, riweꞌepíkaloje ñakeka riꞌimajika rijló.
14 Tupana kemari rijló: “Nulaꞌajé pinaku palá, ñakele kajrú pilakénami iꞌimajika”, ke rimaká.
15 Riká wátakana nakú riꞌimá, unká riyurila riliyó riwátakana. Kaja ewaja riꞌimá Abrahamjlo, rimaká rijló iꞌimaká ke.
16 Pajluwa kemakachu apujlo: “Nulaꞌajé numaká pijló ke”, rimakachu apú nakú rapumí chojé ke, richaje péchuri nakú, kaja keja nemakare nakú yuríjiko najló. Rejomi unká na puraꞌalajo piño rinaku.
17 Palá Tupana laꞌaká inaꞌuké nakú. Riwata naweꞌepika rimaká ke wani laꞌajérika riká. Riwata kaja naweꞌepika unká rapiyákalaje ripechu rilaꞌakana liyá; rimaká keja riꞌimajika.
18 Tupana kemari wanaku, rilaꞌajé wanaku palá. Rimá kaja rinakuwá, waweꞌepíkaloje rimaká ke, keja riꞌimajika wajló. Unká méñoꞌojo Tupana pajlala. Kaphí richojé iꞌimakaño, iꞌimajeño palá. Ilé kaje nakojé weꞌepíkana laꞌarí wapechu kaphí, wáchoꞌoko piyá riliyá.
19 Tupana iꞌimatájeri weká kapichákajo liyá, wapechu iꞌimakale kaphí Jesucristo chojé. Waweꞌepí kaja nakaje, jeꞌechú chu iꞌimakare, iꞌimajika wajló.
20 Kaja Jesucristo iꞌijná watukumá rejo, Tupana awaꞌá riká meꞌetení. Purákaꞌaloji lamáꞌatajeño wakáraꞌajeri wani riká inaꞌuké chaya Tupana waꞌaté. Kaja keja riꞌimajika. Melquisedec iꞌimaká purákaꞌaloji lamáꞌatajeri inaꞌuké chaya iꞌimaká, ke kaja Jesucristo iꞌimajika.